
ԱրմԻնֆո. Հայաստանն ու Արգենտինան քննարկել են տնտեսական հարաբերությունների ակտիվացման հնարավորությունները։ Այս մասին հայտնում է Հայաստանի էկոնոմիկայի նախարարության մամուլի ծառայությունը՝ վկայակոչելով էկոնոմիկայի նախարարի տեղակալ Արման Խոջոյանի՝ արգենտինական ProCordoba գործակալության պատվիրակության հետ հանդիպման արդյունքները, որը գլխավորում էր ղեկավար Պաբլո Դե Կիարան։
Աղբյուրի համաձայն՝ արգենտինական պատվիրակությունը նշել է Հայաստանի հետ համագործակցության հնարավորությունները անասնաբուծության, կենդանիների գենետիկայի և կերերի արտադրության ոլորտներում, ինչպես նաև Հայաստան գետնանուշի և եգիպտացորենի մատակարարումների հարցում։
Պաբլո Դե Կիարան նշել է, որ անհրաժեշտ է կատարելագործել մատակարարման շղթաները և ընդլայնել Հայաստանի ու Արգենտինայի միջև առևտրային կապերը։
Իր հերթին Արման Խոջոյանը հավելել է, որ Հայաստանը վարում է օտարերկրյա ներդրումների ներգրավմանն ուղղված բաց քաղաքականություն։ Նա նաև ընդգծել է, որ Հայաստանի կառավարությունը հետևողականորեն աշխատում է ոչ միայն արտահանման, այլև ներմուծման շուկաների դիվերսիֆիկացման ուղղությամբ։
Նշենք, որ ProCordoba-ն Արգենտինայի Կորդոբա նահանգի արտահանման խթանման և ներդրումների ներգրավման գործակալությունն է, որը ստեղծվել է
2001 թվականին։ Պետական և մասնավոր հատվածների մասնակցությամբ կազմակերպությունն աջակցում է տեղական ընկերությունների, առաջին հերթին՝ փոքր և միջին բիզնեսի, միջազգային շուկաներ դուրս գալուն, նահանգային արտադրանքի և ծառայությունների արտերկրում առաջխաղացմանը, ինչպես նաև առևտրատնտեսական կապերի զարգացմանը։ Գործունեության 25 տարիների ընթացքում գործակալությունն աջակցություն է ցուցաբերել ավելի քան 2 600 ընկերության։
Մաքսային ծառայության տվյալներով՝ 2026 թվականի առաջին կիսամյակում Հայաստանից Արգենտինա արտահանվող ապրանքների մաքսային արժեքը մի քանի անգամ կրճատվել է՝ կազմելով $7.2 հազ., իսկ ներմուծումն աճել է 2.8 անգամ՝ հասնելով $6.9 մլն-ի։