
ԱրմԻնֆո. ԵԱՏՀ մաքսային համագործակցության նախարար Սերգեյ Շկլյաևը պատմել է 2026 թվականին ԵԱՏՄ մաքսային օրենսգրքում փոփոխությունների երկու փաթեթների նախապատրաստման մասին, որոնք պետք է դյուրացնեն լոգիստիկան, աջակցեն բարեխիղճ բիզնեսին և պայմաններ ստեղծեն Միությունում մաքսային գործընթացների հետագա թվային վերափոխման համար։ Փոփոխությունների առաջին փաթեթը՝ գործառնությունների արագացում և "գորշ" սխեմաների դեմ պայքար։ Այս մասին հայտնել է Եվրասիական տնտեսական հանձնաժողովի մամուլի ծառայությունը։
Փոփոխությունները կվերաբերեն օրենսգրքի բոլոր բաժիններին, իսկ դրանց գլխավոր նպատակը ենթակառուցվածքային խոչընդոտների վերացումն է։ Ներկայացվող փոփոխությունները կդյուրացնեն ապրանքների առանձին կատեգորիաների, այդ թվում՝ բեռնարկղերի, տեղափոխումը, ինչպես նաև կկարգավորեն կոնտրեյլերային և կաբոտաժային փոխադրումները։ Բացի այդ, նախատեսված է "կեղծ տարանցման" սխեմաների դեմ հակազդման մեխանիզմ, որը երկար ժամանակ անբարեխիղճ շուկայի մասնակիցների համար բաց էր թողնում։ Փաստաթուղթը գտնվում է ներպետական ընթացակարգերի իրականացման եզրափակիչ փուլում, իսկ դրա ստորագրումը Միության երկրների ղեկավարների կողմից նախատեսվում է 2026 թվականի դեկտեմբերին։
Փոփոխությունների երկրորդ փաթեթը՝ տեխնոլոգիական վերակառուցում և բարեխիղճ բիզնեսի աջակցություն Փոփոխությունները հիմք են դնում մաքսային ծառայության աշխատանքի տեխնոլոգիական վերակառուցման համար։ Հիմնական նորամուծությունը լիազորված արտահանողների ինստիտուտի ստեղծումն է, որը թույլ կտա զգալիորեն նվազեցնել բարեխիղճ բիզնեսի վարչական բեռը։ Ամրագրվում է էլեկտրոնային եղանակով նախնական տեղեկատվության ներկայացման առաջնահերթությունը և հնարավորություն է ստեղծվում ապրանքները մակնշել անմիջապես ժամանակավոր պահպանման պահեստներում և մաքսային պահեստներում, ինչը զգալիորեն կարագացնի լոգիստիկ շղթաները։ Այս փաստաթուղթը մշակվել է Հանձնաժողովի հարթակում՝ Միության պետությունների հետ համատեղ, և այժմ անցնում է կարգավորող ազդեցության գնահատում։
Ինչպես ընդգծել է Սերգեյ Շկլյաևը, Միության մաքսային օրենսգրքում փոփոխությունների կատարումը մաքսային կարգավորման կատարելագործմանն ուղղված աշխատանքի կարևոր տարրերից մեկն է՝ բիզնեսի համար անխափան միջավայր ստեղծելու նպատակով։ Դրան զուգահեռ Հանձնաժողովը կշարունակի միավորել մաքսային մարմինների և ԱՏԳ մասնակիցների միջև էլեկտրոնային փաստաթղթաշրջանառությունը և զարգացնել տեղեկատվական փոխգործակցությունը Միության ընդհանուր գործընթացների շրջանակներում։