Հայաստանը ևս 6 պետություն է ներառել հարկման ազատաականացման հատուկ համակարգեր ունեցող երկրների ցուցակում

Արմինֆո.  Հայաստանը ևս 6 պետություն է ներառել հարկման ազատականացման հատուկ համակարգեր ունեցող երկրների ցուցակում (աշխարհագրական տարածքներ): Այդ մասին որոշում է կայացվել փետրվարի 1-ի կառավարության նիստում: Ինչպես ԱրմԻնֆո-ին հաղորդեցին կառավարության տեղեկատվության և հասարակայնության հետ կապերի վարչությունից, գործադիրը փոփոխություններ և լրացումներ է կատարել նախկինում ընդունած որոշումներից մեկում՝ «օֆշորային գոտի» եզրույթը ՀՀ հարկային օրենսգրքով ամրագրված նոր եզրույթին համապատասխանեցնելու նպատակով: Ըստ հիմնավորման՝ Հարկային նոր օրենսգրքով վերանայվել է հարկման տեսանկյունից ՀՀ հարկային համակարգի համեմատ «ոչ խելամիտ» հարկման դրույքաչափեր կամ ազատական համակարգեր ունեցող երկրները բնութագրելու նպատակով կիրառվող «օֆշորային գոտի» եզրույթը: Բացի այդ, նախատեսվում է ընդլայնել որոշմամբ սահմանված երկրների «աշխարհագրական տարածքների» ցանկը:

Ներկայացնելով որոշման նախագիծը` ֆինանսների նախարար Վարդան Արամյանը հաղորդել է, որ նման որոշում է կայացվել օտարերկրյա, մասնավորապես, Լյուքսեմբուրգի գործընկերների հետ քննարկումներից հետո. խոսքը վերաբերում է Ամերիկյան Սամոային, Թունիսին, Հարավային Կորեային, Մոնղոլիային, Նամբիային, Տրինիդադ և Տոբագոյին: