ԱրմԻնֆո գործակալությունը սերտիֆիկատներ է հանձնել ՙԼավագույն մրցակից՚ միջբանկային հարցման հաղթողներին

Հարցումն իրականացվել է բանկինգի այն ոլորտներում ու հատվածներում, ինչպիսիք են`մենեջմենտի մակարդակը, կորպորատիվ կառավարումը, ՓՄՁ ֆինանսավորմանը մասնակցելը, խոշոր բիզնեսի վարկավորումը, սպառողական և հիփոթեքային վարկավորման շուկայում ունեցած ակտիվությունը, գործունեությունն արտարժույթի շուկայում, քարտային բիզնեսի ոլորտում ունեցած ակտիվությունը, դրամական փոխանցումների, պետական արժեթղթերի և կորպորատիվ պարտավորությունների շուկաներում իրականացրած գործունեությունը: Գնահատականներ է տրվել նաև մրցակիցների տեխնոլոգիական հագեցվածությանը: Երկրի 19 առևտրային բանկերի 60 TOP-մենեջերների շրջանում իրականացված հերթական միջբանկային հարցման արդյունքում ձևավորվել է առաջատարներ 8 բանկերի ցուցակը: Դրանք են` ACBA-Credit Agricole Bank-ը, HSBC Բանկ Հայաստանը, Արդշինինվեստբանկը, Ինեկոբանկը, Յունիբանկը, Հայէկոնոմբանկը, Արմսվիսբանկը և Ամերիաբանկը:

ՙՄենեջմենտի մակարդակ՚ և ՙՓՄՁ ֆինանսավորմանը մասնակցության մակարդակ՚ անվանակարգերով հաղթողի սերտիֆիկատը հանձնվեց ACBA-Credit Agricole Bank-ին, ՙԿորպորատիվ կառավարման մակարդակ՚ և ՙՏեխնոլոգիական հագեցվածության մակարդակ՚ անվանակարգերով`HSBC Բանկ Հայաստանին, ՙԽոշոր բիզնեսի վարկավորման մակարդակ՚ և ՙԱրտարժույթի շուկայում գործունեություն՚ անվանակարգերով`Արդշինինվեստբանկին, ՙՀիփոթեքային շուկայում ունեցած ակտիվության մակարդակ՚ և ՙԴրամական փոխանցումների շուկայում ունեցած ակտիվության մակարդակ՚ անվանակարգերով`Յունիբանկին, ՙՊլաստիկ քարտերի շուկայում ակտիվության մակարդակ՚ անվանակարգով` Հայէկոնոմբանկին, ՙՊետպարտատոմսերի շուկայում ունեցած ակտիվության մակարդակ՚ անվանակարգով`Արմսվիսբանկին, իակ ՙԿորպորատիվ պարտավորությունների շուկայում ունեցած ակտիվության մակարդակ՚ անվանակարգով հաղթողի սերտիֆիկատը հանձնվեց Ինեկոբանկին:

Բոլոր անվանակարգերով հարցումների վերջնական արդյունքները, այսինքն միջինացված տոկոսային միավորները, ցույց են տվել, որ շուկայի արհեստավարժ մասնակիցները բավականին բարձր են գնահատում առաջատարների հնգյակում տեղ գրաված բանկերի գործունեությունը, որոնց թվում են` ACBA-Credit Agricole Bank`48.3% (100%-ից), Հայէկոնոմբանկը`47.3%, Կոնվերս Բանկը`47.3%, Արդշինինվեստբանկը`46.7% և HSBC Բանկ Հայաստանը` 46.6%: Առաջատարների տասնյակում են նաև`Յունիբանկը, Ինեկոբանկը, Արարատբանկը, ՎՏԲ Հայաստան Բանկը և Ամերիաբանկը:

Նշենք, որ սկսած 2005 թվականից, երբ անցկացվեցին առաջին հարցումները, առաջատարի իրենց դիրքերը պահպանել են Հայէկոնոմբանկը`պլաստիկ քարտերով և Ինեկոբանկը`սպառողական վարկերով: 2007 թվականից երկու անվանակարգերով (կորպորատիվ կառավարման մակարդակը և տեխնոլոգիական հագեցվածությունը) առաջատարների շարքում է HSBC Բանկ Հայաստանը, իսկ դրամական փոխանցումների ծավալներով`Յունիբանկը: Հետաքրքիր է, որ Հայաստանի բանկային հանրության սուբյեկտիվ արհեստավարժ կարծիքը, որն իր տեղն է գտել հարցման արդյունքներում, ինչպես նախորդ հետազոտություններում, հիմնականում, նախնական շեղումներով, արտացոլում են բանկինգի այս կան այն ոլորտներում բանկերի ակտիվության իրական պատկերը: