Հետազոտություն. Հայաստանում բանկի հաճախորդների ընդամենը 2%-ն է օգտվում հեռահար բանկինգից

Արմինֆո.  Հայաստանում 2014 թ. բանկի հաճախորդների ընդամենը 2%-ն է օգտվել հեռահար բանկինգի ծառայությունից՝ 2013 թ. 1,3%-ի փոխարեն: Ըստ որում, բնակչության շրջանում հեռահար բանկինգից օգտվողների տոկոսը կազմել է 0,9%՝ մեկ տարի առաջվա 0,7%-ի փոխարեն: Այդ մասին են վկայում ՙԱմերիա՚ խորհրդատվական ընկերության կողմից անցկացված ՙԻնտերնետ և հեռահար բանկինգ. Հայաստանի զարգացման նախադրյալները՚ հետազոտության արդյունքները, որը ներկայացվել է հոկտեմբերի 30-ին բանկերի /HSBC և Ամերիաբանկ/, հեռահաղորդակցական ընկերությունների /Beeline և Ucom/, պրովայդերների և ՏՏ փորձագետների միջև պանելային քննարկման ժամանակ: Պանելային քննարկման կազմակերպիչն է Ամերիաբանկը:

«Ամերիա՚ կառավարման խորհրդատվական ծառայությունների ավագ հետազոտող Արտաշես Շաբոյանի ներկայացրած զեկույցի համաձայն, չնայած բնակչության 57%-ն օգտվել է բանկային ծառայություններից, բայց միայն 5%-ն է քարտով հաճախակի վճարումներ կատարել և միայն 3%-ն է ակտիվ օգտվում էլ. առևտրի հնարավորությունից: Էլեկտրոնային առևտրի 80%-ը արտերկրից ապրանքների գնմանն է բաժին ընկնում: Հայաստանում գործող 21 բանկից միայն 3-ը հեռահար սպասարկման ծառայություն չի մատուցում:

Ամերիա ընկերությունների խմբի մեջ մտնող Ամերիաբանկի ցուցանիշների առնչությամբ Ա. Շաբոյանը նշել է, որ 2015թ. սկզբի դրությամբ Ամերիաբանկի հաճախորդ ֆիզ. անձանց 17.5%-ն օգտվել է օնլայն բանկինգից, որից ակտիվ օգտագործող է 3.5% -ը: ՙԱյս թիվը գրեթե երկու անգամ գերազանցում է երկրի ցուցանիշը, սակայն զգալիորեն զիջում է զարգացած երկրների տվյալներին՚,- նշել է մասնագետը: Նա տեղեկացրել է, որ Ամերիաբանկի կորպորատիվ հաճախորդներն ավելի ակտիվ են օգտվում internet-banking-ից: Մասնավորապես,

2015թ. սկզբի դրությամբ Ամերիաբանկի հաճախորդ իրավ. անձանց 24.2%-ն օգտվել է օնլայն բանկինգից, որից 23.2%-ն ակտիվ են:

Հետազոտության արդյունքում նաև պարզվել է, որ Երևանում ավելի ակտիվ են օգտվում հեռահար բանկային ծառայություններից, քան մարզերում: ՙԴա վկայում է այն մասին, որ որքան բարձր է անձի եկամուտը, այնքան ավելի շատ է օնլայն բանկինգից օգտվելու հակվածությունը՚,- ասել է Ամերիաբանկի մանրածախ գործառնությունների գծով տնօրեն Արման Բարսեղյանը:

Այուամենայնիվ, նա գտնում է, որ սպասարկման նման ուղիների զարգացումը Հայաստանում այլընտրանք չունի, և դա ընդամենը ժամանակի հարց է, քանի որ դրանք հնարավորություն են տալիս հաճախորդներին օպտիմալացնել իրենց ծախսերը և ժամանակ խնայել, իսկ բանկերին՝ կրճատել ծախսերը, և որպես հետևանք՝ բարելավել ծառայությունների սակագները և ընդհանուր առմամբ բարձրացնել իրենց գործունեության արդյունավետությունը: ՙԲայց դա չի նշանակում, որ բանկի մասնաճյուղերը կանհետանան կամ կկորցնեն իրենց նշանակությունը: Պարզապես ժամանակի ընթացքում դրանք կկրճատեն իրենց  գործառնական ֆունկցիաները և կվերափոխվեն խորհրդատվական կենտրոնների, որտեղ յուրաքանճյուր հաճախորդի համար անհատական սպասարկում կիրականացվի՚,- նշել է Ա. Բարսեղյանը:

Հետազոտության ներկայացմանը ներկա գտնվող ՙHSBC Բանկ Հայաստանի՚ բանկային մանրածախ ծառայությունների դեպարտամենտի տնօրեն Միհրան Մուրադյանը, պատասխանելով այն հարցին, թե որքանով է հեռանկարային հեռահար բանկային ծառայությունների զարգացումը Հայաստանում՝ զարգացած մասնաճյուղային ցանցերի պայմաններում, նշել է, որ բանկերի ապագան թվային տեխնոլոգիաներին է պատկանում: ՙՄեր բանկի ռազմավարական խնդիրներից մեկը բանկային թվային տեխնոլոգիաների նշակումը և ներդրումն է, որոնք ամբողջովին բացառում են մարդկային ռեսուրսի օգտագործումը՚,- ասել է նա: