ԻՆԵԿՈԲԱՆԿ-ը IFC-ի օժանդակությամբ ձեռք է բերում ՊրոԿրեդիտ Բանկը

Արմինֆո. Հայկական ԻՆԵԿՈԲԱՆԿ-ը IFC օժանդակությամբ ձեռք է բերում ՊրոԿրեդիտ Բանկը: Ինչպես ԱրմԻնֆո գործակալությանը տեղեկացվել է Միջազգային ֆինանսական կորպորացիայի (IFC) մամուլի ծառայությունից, ընդունվել է Ինեկոբանկին 20 մլն.դոլար տրամադրելու մասին որոշում` ՊրոԿրեդիտ Բանկի հետ միավորվելու նպատակով:  

Աղբյուրը նշում է, որ Համաշխարհային բանկի խմբի անդամ Միջազգային ֆինանսական կորպորացիան (IFC) առաջին անգամ նպաստում է Հայաստանի բանկային հատվածի՝ շուկայով պայմանավորված համախմբմանը և փոքր ու միջին ձեռնարկությունների համար ֆինանսավորման հասանելիության խթանմանը: Ավելի մանրամասն տեղկատվույթունը կտրամադրվի դեկտեմբերի 10-ին կայանալիք միջոցառման ընթացքում:

Ինչպես նշում են ԱրմԻնֆո գործակալության ֆինանսական տեղեկատվության ծառայության վերլուծաբանները, ԻՆԵԿՈԲԱՆԿ-ի և ՊրոԿրեդիտ Բանկի միավորումն առաջինի ընդհանուր կապիտալը կավելացնի 9.2 մլրդ.դրամով, մինչև 38.3 մլրդ.դրամ, ինչը բարձր է 30 մլրդ.դրամ նորմատիվային ցուցանիշից, որն ուժի մեջ կմտնի 2017 թվականից: Ընդհանուր կապիտալի նման բարձր մակարդակով ԻՆԵԿՈԲԱՆԿ-ը հավակնում է տեղ զբաղեցնել Հայաստանի առաջատար բանկերի հնգյակում:

Հոկտեմբերի 1-ի արդյունքներով, ԻՆԵԿՈԲԱՆԿ-ի ընդհանուր կապիտալում կուտակված շահույթը կազմել է 47% (4-րդ տեղը բացարձակ արտահայտությամբ, տարեկան աճը` 52.3%), կանոնադրական կապիտալը կազմել է 42%: 2015 թվականի հոկտեմբերի 1-ի դրությամբ ԻՆԵԿՈԲԱՆԿ-ի մեծամասնությունը բաժնետերերն են` Ավետիս Բալոյանը`35.23%, Կարեն Սաֆարյանը` 30.34%, KfW բանկային խմբի անդամ Deutsche Investitions-und Entwicklunsgesellschaft mbH (DEG) - 12,58% և Միջազգային ֆինանսական կորպորացիան - 9.32%: ՊրոԿրեդիտԲանկի միակ սեփականատերն է ProCredit Holding AG & Co-ն: ՊրոԿրեդիտԲանկի ընդհանուր կապիտալում կուտակված վնասը կազմել է 8% (16 տեղը բացարձակ արտահայտությամբ, տարեկան անկումը`26,2%), ինչի պատճառով կանոնադրական կապիտալը գերազանցում է ընդհանուր կապիտալը:

Ըստ ԱրմԻնֆո գործակալության` Հայաստանի բանկերի ֆինանսական վարկանիշի, ԻՆԵԿՈԲԱՆԿ-ը շատ ակտիվ է ինչպես կորպորատիվ վարկավորման, այնպես էլ ավանդական մանրածախի հատվածներում: ՓՄՁ վարկավորման պորտֆելով բանկը գտնվում է առաջատարների տասնյակում, 2015 թվականի հոկտեմբերի 1-ի դրությամբ արձանագրելով 36 մլրդ դրամ ցուցանիշ (ընդհանուր վարկային պորտֆելի մոտ 35%-ը): Բանկը հաջողությամբ համագործակցում է միջազգային կազմակերպությունների հետ, տարբեր ծրագրերով, այդ թվում նաև ՓՄՁ ֆինանսավորման գծով: ԻՆԵԿՈԲԱՆԿ-ի վարկային պորտֆելը 2015 թվականի հոկտեմբերի 1-ին կազմել է ավելի քան 104 մլրդ դրամ կամ  ակտիվների 66%-ը: Բանկի ոլորտայն վարկային պորտֆելը կենտրոնացված է առևտրի և արդյունաբերական ոլորտներում, և մի փոքր էլ` սննդի և սպասարկման ոլորտում, շինարարության ոլորտում, տրանսպորտի և կապի ոլորտում, գյուղատնտեսության  ոլորտում: 2015 թվականի առաջին 9 ամիսների արդյունքում ԻՆԵԿՈԲԱՆԿ-ը երրորդն է շուկայում զուտ շահույթով` 3.3 մլրդ դրամ:

ՊրոԿրեդիտԲանկը, հավատարիմ մնալով իր բանկային խմբի առաքելությանը, վարկային ընդհանուր պորտֆելում ՓՄՁ վարկավորման մասնաբաժնով մշտապես զբաղեցրել է առաջատար դիրքեր – մոտ 83%, բայց բացարձակ արտահայտությամբ (ավելի քան 39 մլրդ.դրամ) գտնվում է առաջատարների տասնյակում, և միայն երկու աստիճանով է առաջ Ինեկոբանկից: Բանկի վարկային պորտֆելը, ըստ ոլորտների, հիմնականում կենտրոնացած է առևտրի, արդյունաբերության և գյուղատնտեսության ոլորտներում: 2015 թվականի առաջին 9 ամիսները ՊրոԿրեդիտԲանկը եզրափակել է 88.2 մլն.դրամ զուտ շահույքով (տարեկան անկումը` 73.3%), 13-րդ տեղից իջնելով 14-րդ տեղ:

Նշենք, որ ԻՆԵԿՈԲԱՆԿ հիմնվել է 1996 թվականին և հանդիսանում է Հայաստանի ամենադինամիկ զարգացող բանկերից մեկը: ՊրոԿրեդիտԲանկը Հայաստանում գործում է 2008 թվականի փետրվարի 5-ից, ղեկավարվելով ProCredit Holding AG-ի քաղաքականությունով և մասնագիտանալով ՓՄՁ վարկավորման հատվածում:

Հիշեցնենք, որ Հայաստանը Միջազգային ֆինանսական կորպորացիայի (IFC) անդամ է դարձել 1995 թվականից: Կորպորացիան իր հայաստանյան 52 նախագծերում ներդրել է 233 մլն. դոլար, մասնավորապես, ֆինանսական շուկայում, արդյունաբերությունում, գյուղատնտեսոթյունում, ծառայությունների ոլորտում, հանքարդյունաբերության ոլորտում: IFC-ի առևտրի ֆինանսավորման պորտֆելը Հայաստանում կազմել է ավելի քան 122 մլն.դոլար: