ՀՀ Կենտրոնական բանկը բարելավել է «Երիտասարդ ընտանիքին` մատչելի բնակարան» պետական նպատակային ծրագրի հիփոթեքային վարկավորման պայմանները

Արմինֆո. ՀՀ Կենտրոնական բանկը բարելավել է «Երիտասարդ ընտանիքին` մատչելի բնակարան» պետական նպատակային ծրագրի հիփոթեքային վարկավորման պայմանները, ինչը կնպաստի ավելի մեծ թվով բնակարանային պայմաների բարելավման կարիք ունեցող երիտասարդ ընտանիքների ներգրավմանը: Ինչպես ԱրմԻնֆո գործակալությանը տեղեկացվել է ՀՀ ԿԲ մամուլի ծառայությունից, Պետական ծրագրի համապատասխան փոփոխությունները և լրացումները հաստատվել են ՀՀ կառավարության 2016 թ. մարտի 17-ի նիստում:

Ըստ աղբյուրի, նշված ծրագրով այսուհետ հիփոթեքային վարկավորման համար երիտասարդ ամուսինների տարիքը սահմանվել է 18-35, ներկայիս 18-30-ի փոխարեն, իսկ

ամուսինների առավելագույն գումարային տարիքը սահմանվել է 65, ներկայիս` 60-ի փոխարեն:

Բացի այդ, ավելացվել  է Ծրագրի ներքո ձեռքբերվող բնակարանների առավելագույն արժեքը, մասնավորապես, սահմանելով այն 25 մլն ՀՀ դրամ, ներկայիս 16 մլն ՀՀ դրամի փոխարեն, ինչը հնարավորություն կընձեռի Ծրագրի պոտենցիալ շահառու երիտասարդ ընտանիքներին ունենալ բնակարանի ընտրության ավելի մեծ հնարավորություն: Բացի այդ, ավելացվել է նաև Ծրագրի ներքո ձեռք բերվելիք բնակարանների համար տրամադրվող հիփոթեքային վարկերի առավելագույն գումարը, մասնավորապես, սահմանելով այն 17,5 մլն ՀՀ դրամ՝ ներկայիս 11,2 մլն ՀՀ դրամի փոխարեն: Իսկ Երևան քաղաքում ևս տրամադրվող հիփոթեքային վարկերի կանխավճարի նվազագույն չափը սահմանվել է ձեռք բերվող բնակելի տան կամ բնակարանի արժեքի առնվազն 10 տոկոսը` վարկառուի կողմից այլ բնակելի անշարժ գույք գրավադրելու պայմանով:

 Նշենք, որ «Երիտասարդ ընտանիքին` մատչելի բնակարան» պետական նպատակային ծրագիրը մեկնարկել է 2010 թվականի փետրվարից, որի շրջանակներում ստեղծվեց «Երիտասարդներին`մատչելի բնակարան» ՈւՎԿ-ն, որը կոչված էր վերաֆինանսավորելու բանկերի հիփոթեքային վարկերը` փոխառուների որոշակի խմբի համար:

Ըստ ԱրմԻնֆո գործակալության` Հայաստանի վարկային կազմակերպությունների Ռենկինգի, «Երիտասարդներին`մատչելի բնակարան» ՈւՎԿ վարկային ներդրումները 2016 թվականի հունվարի 1-ին կազմել են 54.1 մլրդ դրամ ($ 111,7 մլն), ընդ որում, 2014 թվականի տարեկան 93,7% աճը 2015-ին դանդաղել է մինչև 51.4%: Իսկ բանկային համակարգում, ըստ ԱրմԻնֆո լրատվական գործակալության`Հայաստանի բանկերի Ֆինանսական Վարկանիշի, հիփոթեքային վարկավորման աճը 2014 թվականին կազմել էր 22%, իսկ 2015-ին դանդաղել է մինչև 8%, կազմելով 187.8 մլրդ դրամ կամ $ 388,2 մլն: