Երկուշաբթի, 21 Մարտի 2016 15:50

Արմինֆո. Արդեն այս տարվա ապրիլին «Յուքոմ» և «Օրանժ Արմենիա» ընկերությունները տեղական շուկայում կներկայացվեն մեկ միասնական՝ «Յուքոմ» բրենդի ներքո: Այս մասին մարտի 21-ին «Յուքոմ» և «Օրանժ Արմենիա» ընկերությունների միավորմանը նվիրված մամուլի ասուլիսում հայտարարել է «Յուքոմ» ընկերության տնօրեն Հայկ Եսայանը: Նա նաև հավելել է, որ պատասխանատվության ողջ բեռը, որը նախկինում իր վրա կրում էր «Օրանժ» ընկերությունը, այժմ ամբողջովին իր վրա կվերցնի «Յուքոմ»-ը:

«Օրանժ Արմենիա» ընկերության հետ միավորվելը թույլ կտա բարձրացնել մեր կողմից նախկինում տրամադրվող ծառայությունների որակը: Այդ ուղղությամբ մենք արդեն սկսել ենք կատարել առաջին քայլերը, ներդնելով «Օրանժ»-ի բազայի վրա ստեղծված LTE ռադիոհասանելիության ցանց, որը կգործի հանրապետության ողջ տարածքում»,-ասել է Եսայանը: Նա նշել է, որ այս նորամուծությունը կապված է գլոբալ շուկայի փոփոխությունների հետ, որոնք թելադրում են, որպեսզի շարժական կապի օպերատորների մասնագիտացումը ձայնային ծառայություններից անցնի համապարփակ Ինտերնետ-ծառայությունների մատուցմանը: «Այս միտումը մենք վաղուց էինք նկատել, այդ պատճառով էլ ընկերությունը ժամանակին ստացավ LTE ռադիոհասանելիության ցանցի լիցենզիա, ինչն այսօր Յուքոմին թույլ է տալիս դիվերսիֆիկացնել իր ծառայությունները»,-եզրափակել է նա:

Իր հերթին, «Յուքոմ» ՍՊԸ կոմերցիոն տնօրեն Արամ Բարսեղյանը հավելել է, որ երկու ընկերությունների միավորումը չի բերի աշխատակիցների թվի կրճատմանը, այլ հակառակը, կստեղծի նոր աշխատատեղեր` միավորման արդյունքում առաջացած մեծ ծավալով աշխատանքների հետևանքով: Նրա խոսքով, համատեղ գործունեության առաջխաղացումը և դրա արդյունքները զգալի կլինեն ամռան սկզբին: Նրա խոսքով, ընկերությունը կբարելավի մատուցվող ծառայությունների որակը և կընդլայնի ռոումինգը, հատկապես հայկական Սփյուռքի ներկայություն ունեցող երկրներում:

Նշենք, որ «Յուքոմ» ընկերությունը հիմնվել է 2007 թվականին: Սկսած 2009 թվականից ընկերությունը Հայաստանում կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015 թվականի հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից:  Համագործակցելով համաշխարհային գերհզոր ընկերությունների հետ` «Յուքոմը» կարողացել է իր հաստատուն դիրքը գրավել Հայաստանի հեռահաղորդակցման շուկայում: 2016 թվականին «Յուքոմ»  ընկերությունը ձեռք է բերել Օրանժ Արմենիա ընկերության 100 տոկոս բաժնետոմսերը և դարձել նաև բջջային օպերատոր:

Նշենք, որ առաջիկայում «Յուքոմ» ընկերությունը, Ericsson սարքավորումների հիման վրա, կսկսի գերժամանակակից 4G/LTE ռադիոհասանելիության ցանցի ներդրումը Հայաստանի ողջ տարածքում: Իր հերթին, Ericsson ընկերությունը Յուքոմին կտրամադրի Ericsson Radio System կարգի սարքավորումներ, որոնք աշխատում են հաճախականության տարբեր դիապազոններում, ինչպես նաև ինտեգրված ալեհավաքներ (AIR) և Ericsson Expert Analytics համակարգը, որը բարձրացնում է բաժանորդների սպասարկման որակը: «Հայաստանն ապրում է թվային տրանսֆորմացիա, երկրում մատչելի են ինովացիոն հեռահաղորդակցական ծառայությունները և լուծումները, ինչպես նաև դիտվում է խելացի սարքերի նկատմամբ բարձր պահանջարկ: Աճող պահանջարկը բավարարել և մեծ տրաֆիկի ծավալներ իրացնել կարող են այն ցանցերը, որոնք ի վիճակի են ապահովել բարձր արտադրողականություն»,-հայտարարել է Ուկրաինայում և Եվրասիական երկրներում հաճախորդների հետ աշխատանքի գծով փոխնախագահ Վոյցեխ Բայդան: