Հինգշաբթի, 31 Մարտի 2016 20:18

Արմինֆո. Անելիք Բանկում գործող դրամական փոխանցումների համակարգերով պարբերաբար գումար ստացող բոլոր հաճախորդներն այսուհետև հնարավորություն կունենան օգտվել Բանկում նոր ներդրված «Տրանսֆեր» վերականգնվող վարկային գծից։

 

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, «Վարկային գծի պարտաճանաչ մարումներ կատարող հաճախորդներին խրախուսելու նպատակով մեր կողմից մշակվել է արտոնությունների փաթեթ։ Մասնավորապես, այն հաճախորդների համար, ովքեր ակտիվորեն կօգտվեն Անելիք Բանկի դրամական փոխանցումների համակարգերից ու գումարները կստանան Anelik-Transfer վճարային քարտով, միաժամանակ չեն ունենա ժամկետանց պարտավորություններ, վարկային գծի սահմանաչափը կավելանա մինչև 50%-ի չափով։ Տվյալ վարկատեսակի առավելություններից է նաև այն, որ վարկային գծի չօգտագործված մասի համար տոկոսագումար չի հաշվեգրվում։

 

«Վարկատեսակի առավելագույն սահմանաչափը 1,2 մլն ՀՀ դրամ, 2,4 հազար ԱՄՆ դոլար կամ եվրո և 200 հազար ՌԴ ռուբլի է։ Ընդ որում, ՀՀ դրամով տրամադրվող վարկային գծի առավելագույն ժամկետը երեք, իսկ արտարժույթի դեպքում՝ երկու տարի է»,- ասել է «Անելիք Բանկ» ՓԲԸ հասարակության հետ կապերի պատասխանատու Աստղիկ Մարտիրոսյանը և տեղեկացրել, որ Anelik-Transfer վճարային քարտի քարտապանները կարող են փոխանցումները ստանալ առանց Բանկ այցելելու՝ պարզապես զանգահարելով 010 59 33 33 հեռախոսահամարով։

 

Նշենք, որ Անելիք Բանկի միանձնյա սեփականտերն է լիբանանյան Credit Bank S.A.L.-ը, որը 2013 թվականի 4-րդ եռամսյակում իր մասնաբաժինը 89.95%-ից հասցրեց 100%-ի: