Գազպրոմբանկն իր հայկական «դուստրը»`«Առէկսիմբանկ-Գազպրոմբանկի խումբ» ՓԲԸ-ն վաճառեց Արշինբանկի ներդրողներին

Արմինֆո. 2016թ.-ի հոկտեմբերի 7-ին ավարտվեց «Առէկսիմբանկ-Գազպրոմբանկի խումբ» ՓԲԸ-ի բաժնետոմսերի 100%-ի «Ռեգիոն» Ֆինանսական Արդյունաբերական Կորպորացիայի կողմից ձեռքբերման գործարքը, որի միակ բաժնետերն է հանդիսանում «Արդշինբանկ» ՓԲԸ վերջնական շահառու և Խորհրդի նախագահ, Ռուսաստանում հայտնի գործարար Կարեն Սաֆարյանը։

Ինչպես ԱրմԻնֆո գործակալությանը տեղեկացվել է Արդշինբանկի մամուլի ծառայությունից, հաջորդ փուլով, «Առէկսիմբանկ-Գազպրոմբանկի խումբ» ՓԲԸ-ն և «Արդշինբանկ» ՓԲԸ-ն մտադրություն ունեն նախաձեռնել ՀՀ օրենսդրությամբ նախատեսված բանկերի միացման գործընթաց, ինչի արդյունքում նախատեսվում է «Առէկսիմբանկ-Գազպրոմբանկի Խումբ» ՓԲԸ միացումը «Արդշինբանկ» ՓԲԸ-ին:

Միացման արդյունքում ֆինանսական կառույցը կդառնա Հայաստանում ամենախոշոր բանկը՝ բանկային կապիտալի, ակտիվների և մասնաճյուղային ցանցի առումով ևս։ Միացումից հետո «Արդշինբանկ» ՓԲԸ-ի ընդհանուր կապիտալը կկազմի մոտ 74 միլիարդ ՀՀ դրամ, ակտիվները կհասնեն մոտ 540 միլիարդ ՀՀ դրամի, իսկ վաճառքի ցանցը բաղկացած կլինի թվով 72 ունիվերսալ մասնաճյուղերից:

Բանկերի միացումը վերջիններիս թույլ կտա լրացնել միմյանց՝ միավորելով ժամանակակից տեխնոլոգիաները, ծառայությունները և բարձրորակ մասնագետների ջանքերը։ Այս ամենը զգալիորեն կընդլայնի «Արդշինբանկ» ՓԲԸ-ի հնարավորությունները՝ իր հաճախորդներին առավել լայն տեսականիով որակյալ բանկային ծառայություններ մատուցելու առումով՝ ինչպես կորպորատիվ, այնպես էլ մանրածախ բիզնեսի ոլորտում։ Այսպիսով, «Արդշինբանկ» ՓԲԸ-ն ավելի կամրացնի Հայաստանի բանկային համակարգում իր առաջատարի դիրքը և շուկայում կստանա մրցակցային նոր առավելություններ։

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, Արդշինբանկի բաժնետերերն են`«Բիզնես ներդրումների կենտրոն» ՍՊԸ - 97,52%, Արամ Անդրեասյան - 1.57% Կարեն Սաֆարյան (ՌԴ) - 0.37%, Ռուդիկ Մկրտումյան և Խաչիկ  Զաքարյան - 0.27%, «Միջազգային բիզնես կենտրոն» ՀՁ - 0.0005%: Արդշինբանկի ընդհանուր կապիտալը 2016 թվականի հուլիսի 1-ին կազմել է 51.3 մլրդ դրամ (4 տեղ), ակտիվները`452.8 մլրդ դրամ (2 տեղ), վարկային ներդրումները` 384.7 մլրդ դրամ (1 տեղ): Բանկը շուկայի առաջատարն է զուտ շահույթի գծով - ավելի քան 2,2 մլրդ դրամ 2016 թվականի առաջին կիսամյակում, տարեկան աճը`47,6%: 2016 թվականի հուլիսի 1-ին Առէկսիմբանկ ընդհանուր կապիտալը կազմել է 23 մլրդ դրամ, ակտիվները`98 մլրդ դրամ, վարկային ներդրումները` 61 մլրդ դրամ, իսկ կուտակված վնասը հասել է մոտ 15 մլրդ դրամի, տարեկան կտրվածքով խորանալով 6.4 անգամ: -կ-

Նշենք, որ «Արդշինբանկ» ՓԲԸ-ն (մինչ 2014թ.-ի նոյեմբերը «Արդշինինվեստբանկ» ՓԲԸ) հիմնադրվել է 2003թ.-ին, ունի 56 մասնաճյուղ, 1 սպասարկման կետ և ներկայացուցչություն Փարիզում։ Ըստ բանկային հիմնական ցուցանիշների՝ այն մտնում է Հայաստանի բանկային համակարգի առաջին երեք առաջատար բանկերի մեջ։

«Առէկսիմբանկ-Գազպրոմբանկի խումբ» ՓԲԸ-ն հիմնադրվել է 1998թ.-ին, ունի 16 մասնաճյուղ և 1 սպասարկման կետ։ Ըստ բանկային հիմնական ցուցանիշների՝ այն միջին դիրք է զբաղեցնում Հայաստանի բանկային համակարգում։ Մինչ 2016թ.-ի հոկտեմբերի 7-ը այն հանդիսանում էր «Գազպրոմբանկ» ԲԸ-ի (Ռուսաստանի Դաշնություն) դուստր բանկը։

Երկու կոմերցիոն բանկերն էլ տրամադրում են բանկային ծառայությունների ողջ սպեկտրը Հայաստանի և ԼՂՀ-ի տարածքում։

«Ռեգիոն» Ֆինանսական Արդյունաբերական կորպորացիան հիմնադրվել  է 2006թ.-ին և իր հիմնադրման օրվանից մինչ օրս ներդրումային գործունեություն է ծավալում Հայաստանի Հանրապետությունում։-