Երեթշաբթի, 18 Հոկտեմբերի 2016 17:03

Արմինֆո. Վարչապետ Կարեն Կարապետյանն ընդունել է Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեին:

Ինչպես տեղեկացնում է ՀՀ կառավարության տեղեկատվության և հասարակայնության հետ կապերի վարչությունը, վարչապետը նշել է, որ հայ-ֆրանսիական հարաբերությունները առանձնահատուկ բարեկամական բնույթ են կրում, ինչը դրսևորվում է, մասնավորապես, երկկողմ շփումների ու փոխայցերի ինտեսիվությամբ: Կարեն Կարապետյանը գոհունակություն է հայտնել տարբեր ոլորտներում երկկողմ հարաբերությունների հագեցած, բազմաբովանդակ օրակարգից և կարևորել տնտեսության բնագավառում համատեղ ծրագրերի իրականացումը: Վարչապետն ընդգծել է, որ առկա է տնտեսական փոխգործակցության մեծ ներուժ և դրա իրացման գործում կարևորել ֆրանսիական բիզնեսի ներկայացվածության ընդլայնումը մեր երկրում, ՀՀ-ում Զարգացման ֆրանսիական գործակալության գործունեությունն ու իրականացվող ծրագրերի շարունակականության ապահովումը: Վարչապետի խոսքով՝ ընդլայնվում են նաև Հայաստանի և Ֆրանսիայի միջև միջտարածաշրջանային կապերը: Այդ համատեքստում,  կառավարության ղեկավարը կարևորել է դեկտեմբերին Երևանում կայանալիք հայ-ֆրանսիական ապակենտրոնացված համագործակցության երրորդ համաժողովի անցկացումը:

Ժան-Ֆրանսուա Շարպանտիեն նշել է, որ պատրաստ է սերտորեն համագործակցել ՀՀ կառավարության հետ՝ երկկողմ ծրագրերի իրականացման, հայ-ֆրանսիական հարաբերությունների հետագա զարգացման և երկու երկրների տնտեսական կապերի հետագա ընդլայնման գործում: Դեսպանն ընդգծել է, որ Զարգացման ֆրանսիական գործակալությունը շարունակելու է ակտիվ ներդրումային գործունեությունը ՀՀ-ում ենթակառուցվածքների բարելավման ուղղությամբ և պատրաստվում է իրականացնել շուրջ 40 մլն դոլարի ծրագրեր: Պարոն Շարպանտիեն ընդգծել է նաև, որ ֆրանիսական մի շարք ընկերություններ շահագրգռված են Հայաստանում գործունեություն ծավալելու հարցում և այդ ուղղությամբ իրականացվում են համապատասխան աշխատանքներ:

Զրուցակիցները  հեռանկարային են համարել տնտեսության տարբեր ճյուղերում, այդ թվում՝ գյուղատնտեսության, տեղեկատվական տեխնոլոգիաների, զբոսաշրջության ոլորտներում ներդրումային ծրագրերի իրականացումը:

Նշենք, որ ՀՀ Ազգային վիճակագրական ծառայության տվյալների համաձայն՝ Հայաստանի և Ֆրանսիայի արտաքին առևտրաշրջանառությունը 2016 թ. հունվար-օգոստոսին կազմել է $31.6 մլն՝ 32.3% տարեկան անկումով: Արտահանումը կազմել է $ 2.3 մլն՝ 29.3% տարեկան անկումով, իսկ ներմուծումը՝  $29.3 մլն՝ 32.2% տարեկան անկումով: