Հայաստանում մտածել են, թե ինչպես օտարերկրյա ներդրումներ ներգրավել

Արմինֆո. Հայաստանում նախատեսվում է ռեդոմիցիլացման ինստիտուտ ներդնել՝ օտարերկրյա ներդրումներ ներգրավելու համար:

Այսօր կայացած նիստում  կառավարության հավանությանն է արժանացել «ՀՀ քաղաքացիական օրենսգրքումե, «Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասինե և «Պետական տուրքի մասինե ՀՀ օրենքներում լրացումներ կատարելու մասին ՀՀ օրենքների նախագծերի փաթեթը: Հիմնավորման համաձայն՝ ՀՀ-ում ներկայումս չկա ռեդոմիցիլացման ինստիտուտ: Այն հնարավորություն է տալիս մի երկրի կազմակերպությանը տեղափոխվել այլ պետություն՝ շարունակելով իր գործունեությունը։ Ռեդոմիցիլացումը հեշտացված գործընթաց է և չի պահանջում իրավաբանական անձի լուծարում։ Ներկայումս բազմաթիվ երկրներում հաջողությամբ աշխատում է նշված ինստիտուտը և հնարավորություն է ընձեռում ներգրավել օտարերկրյա ներդրումներ, դառնալ բիզնեսի համար բարենպաստ կենտրոններ։ Նշված ինստիտուտը ներդնելու համար անհրաժեշտ է լրացումներ կատարել վերոնշյալ օրենքներում: Ինստիտուտի ներդրումով նախատեսվում է ՀՀ-ում օտարերկրյա իրավաբանական անձանց և նրանց կապիտալի ներհոսք, լրացուցիչ աշխատատեղերի ստեղծում, տնտեսության և կազմակերպաիրավական ոլորտի վերընթաց զարգացում։

Ըստ ՀՀ Ազգային վիճակագրական ծառայության տվյալների, ԱՄՆ-ից Հայաստանի տնտեսության իրական հատվածին ուղղված զուտ ներդրումների հոսքը 2016 թվականի հուլիսի 1-ին (I կիսամյակում) կազմել է 564,2 մլն դրամ, ընդ որում, ՕՈՒՆ-ի միայն բացասական ցուցանիշը հասել է 1.2 մլրդ դրամի: Միացյալ Նահանգներից ներդրումները հիմնականում ուղղվել են ՏՏ ոլորտին, ֆինանսական միջնորդությանը, զբոսաշրջությանը և էներգետիկ համալիրին: Իսկ ընդհանուր ներդրումների զուտ ներհոսքը Հայաստանի տնտեսության իրական հատվածում նույն ամսաթվով կազմել է մինուս 16.9 մլրդ դրամ,ընդ որում, միայն ՕՈՒՆ գծով զուտ հոսքը դեպի տնտեսության իրական հատված կազմել է  դրական 16,6 մլրդ դրամ (նախորդ տարվա, համապատասխանաբար`81.9 մլրդ դրամի և 30.7 մլրդ դրամի համեմատ): Նշենք, որ արդեն ավելի քան երկու տարի վիճակագրական տվյալներում, մեթոդաբանության վերանայման հետևանքով, ներդրումների վերաբերյալ տվյալներում չի նշվում ներհոսքի և արտահոսքի բացարձակ արժեքը, այլ միայն բերվում է այդ ցուցանիշների սալդոն: (ՀՀ դրամի հաշվարկային փոխարժեքը 2016 թվականի հուլիսի 1-ին կազմել է 476.68 դրամ / $ 1):