Արմինֆո. 2016 թվականի հոկտեմբերի 20-ին «ՅՈՒՆԻԲԱՆԿ» ԲԲԸ-ի հուլիս ամսվա լրացուցիչ տեղաբաշխման սովորական անվանական բաժնետոմսերը ցուցակվել և ընդգրկվել են ՆԱՍԴԱՔ ՕԷՄԷՔՍ Արմենիայի բաժնետոմսերի հիմնական (A) ցուցակում, ինչպես նաև ցուցակման պահից թույլատրվել են նշված բաժնետոմսերով հասցեական առևտուրը և ռեպո գործարքների կնքումը: Մինչ այդ, հոկտեմբերի 17-ին Բանկի բաժնետոմսերը Բորսայի բաժնետոմսերի երկրորդային (B) ցուցակից տեղափոխվել են բաժնետոմսերի հիմնական (A) ցուցակ, որի արդյունքում Յունիբանկը դարձել է բաժնետոմսերի հիմնական (A) ցուցակում ընդգրկված առաջին բաժնետիրական ընկերությունը:
Ինչպես ԱրմԻնֆո գործակալությանը տեղեկացվել է Բորսայի մամուլի ծառայությունից, ցուցակված լրացուցիչ արժեթղթերը ներառում են 100 ՀՀ դրամ անվանական արժեքով 12,173,914 հատ սովորական բաժնետոմս (ISIN - AMUNIBS10ER5), որոնք բորսայում շրջանառվելու են UNIB բորսայական հապավմամբ: Բանկի ցուցակված արժեթղթերի ընդհանուր քանակը կազմում է 144,547,732 բաժնետոմս:
Աղբյուրի համաձայն, Բանկի նշված բաժնետոմսերի` ս.թ. հուլիսի 27-29-ի ընթացքում նախատեսված տեղաբաշխման առաջին օրվա ընթացքում կնքվել է 48 գործարք, որի ընթացքում տեղաբաշխվել է հայտարարված ողջ ծավալը՝ 12,173,914 հատ հասարակ անվանական բաժնետոմս՝ 2,800,000,220 ՀՀ դրամ ընդհանուր ծավալով: Բաժնետոմսերի գինը տեղաբաշխման ընթացքում կազմել է 230 ՀՀ դրամ:
Յունիբանկի հաղորդագրության մեջ նշվբած է, որ բաժնետոմսերը երկրորդային «B» ցուցակից բաժնետոմսերի հիմնական (A) ցուցակ տեղափոխումը հնարվոր է դարձել ծավալների ավելացման շնորհիվ: Ներկայումս Յունիբանկի ազատ շրջանառվող բաժնտոմսերը կազմում են 15.8%, ինչը վկայում է այդ բաժնետոմսերի սակարկությունների ծավալների աճի և բարձր իրացվելիության մասին: Վերջին 12 ամիսներին Յունիբանկն իրականացրել է բաժնետոմսերի 3 էմիսիա, իսկ այս տարվա աշնանը նախատեսվում է ևս մեկը:
Այս թողարկումների շրջանակներում հայտարարված բաժնետոմսերի ամբողջական տեղաբաշխումը Յունիբանկին թույլ տվեց մոտ 41% ավելացնել կապիտալը, ապահովելով ավելի քան 31 մլրդ.դրամ: Ըստ Բանկի, կապիտալի ավելացման կապակցությամբ Moody's Investors Service-ն ավելացրել է վարկային վարկանիշի կանխատեսումը` մինչև «Դրական» (հավանաբար խոսքը գնում է «կայուն կանխատեսման» մասին, բայց վարկանիշային սանդղակում բանկի վարկանիշը չի նշվում.-խմբ):
Նշենք, որ «ՅՈՒՆԻԲԱՆԿե ԲԲԸ-ն հիմնադրվել է 2001թ.-ի հոկտեմբերին, 2015-ին դառնալով ԲԲԸ: 2016 թվականի հուլիսի 1-ի դրությամբ Յունիբանկի բաժնետերերն են`Gloveri Holdings Ltd- 93.5%, Գագիկ Զախարյանը – 3.25% և Գեորգի Պեսկով – 3.25%: Այս երկու բանկիրներն էլ հանդիսանում են մոսկովյան Յունիաստրում բանկի և ՅՈՒՆԻՍՏՐԻՄ դրամական փոխանցումների համակարգի նախկին սեփականատերերը, իսկ այժմ հանդիսանում են Gloveri Holdings Ltd օֆշորային ընկերության բաժնետերերը: 2008 թվականից Յունիբանկը ֆոնդային բորսայ մասնակից է, իսկ 2015 թվականի հուլիսից - արժեթղթերի հաշվարկային համակարգի անդամ: IPO-ի նախաշեմին Յունիբանկի բաժնետերերի արտահերթ նիստում (12 մարտի 2015 թ.), որոշվել է փոխել բանկի կարգավիճակը` ՓԲԸ-ից ԲԲԸ, ինչը հետագայում (23 հունիսի 2015 թ.) հաստատվեց Կենտրոնական բանկի կողմից:
«ՆԱՍԴԱՔ ՕԷՄԷՔՍ Արմենիա» ԲԲԸ-ն Հայաստանում գործող միակ ֆոնդային բորսան է: 26.01.2009թ.-ից «Հայաստանի ֆոնդային բորսա» ԲԲԸ-ն պաշտոնապես վերանվանվել է «ՆԱՍԴԱՔ ՕԷՄԷՔՍ Արմենիա» ԲԲԸ-ի, իսկ 05.06.2009թ.-ից ՆԱՍԴԱՔ ՕԷՄԷՔՍ Արմենիան «Հայաստանի Կենտրոնական Դեպոզիտարիա» ԲԲԸ-ի միակ բաժնետերն է:
ՆԱՍԴԱՔ ՕԷՄԷՔՍ Արմենիան և Հայաստանի Կենտրոնական Դեպոզիտարիան ՀՀ արժեթղթերի շուկայի կարևոր ենթակառուցվածքային ինստիտուտներներից են: Բորսան շուկայի մասնակիցներին է առաջարկում լիովին ավտոմատացված էլեկտրոնային առևտրային հարթակ:
