Երկուշաբթի, 14 Նոյեմբերի 2016 15:57

Արմինֆո. ՀՀ ֆինանսների նախարար Վարդան Արամյանը հերքել է երկրի պետական պարտքի վերակազմավորման մասին լուրերը: Այս մասին նա լրագրողներին հայտարարել է այսօր կայացած մամուիլի ասուլիսում:

 

Ըստ նախարարի, պետական պարտքի վերակազմավորումն առաջանում է, երբ վարկառու երկիրը չի կարողանում մարել իր պարտքի հետ կապված պարտավորությունները: Այս միջոցն ակտուալ է նաև իրացվելիության հետ կապված պրոբլեմների դեպքում: «Ելնելով Հայաստանում գոյություն ունեցող գործիքների առկայությունից և հնարավորություններից, ինչպես պետպարտքի սպասարկման, այնպես էլ իրացվելիության առումով, ինչպես նաև հաշվի առնելով այն հանագամանքը, որ հանրապետությունը համարվում է պարտքային փոքր բեռով երկիր, տրամաբանություն չկա խոսել պետական պարտքի վերակազմավորման մասին»,-հայտարարել է Արամյանը: Ըստ նախարարի, կանխիկ ֆինանսական հոսքերի հավասարակշռման նպատակով իրականացվող տարեկան էմիսիայի փաստերը որոշ անձանց կողմից սխալմամբ համարվում է պետպարտքի վերակազմավորման հնարավոր ազդանշան:

 

Մինչդեռ, ըստ ՀՀ ֆինանսների նախարարության պետական ​​պարտքի կառավարման վարչության ղեկավար Արշալույս Մարգարյանի, հոկտեմբերի 31-ի դրությամբ երկրի պետական ​​պարտքը կազմել է 5 մլրդ 607 մլն.դոլար: Պետական ​​պարտքի կառուցվածքում կառավարության պարտքը կազմել է 5 մլրդ 108 մլն դոլար, որտեղ արտաքին պարտքը կազմել է 4 մլրդ. 45 մլն.դոլար, իսկ ներքին պարտքը` 1 մլրդ 63 մլն.դոլար: Կենտրոնական բանկը պարտքը կազմել է 499 մլն.դոլար, որի 148 մլն.դոլարը կազմել են տրամադրված վարկերի երաշխիքները: Արդեն 2020 թ. պետական պարտքի սպասարկմանը և մարմանը կուղղվի 921 մլն.դոլար, որտեղ միայն տոկոսային վճարները կկազմեն 164 մլն.դոլար: Ինչպես պարզաբանել է Վարդան Արամյանը, վճարումը բեռ չի դառնա բյուջեի համար, քանի որ 500 մլն.դոլար նախատեսվում է վճարել եվրոպարտատոմսերի թողարկման միջոցով: Միևնույն ժամանակ, նրա խոսքով, մինչև 2020 թվականը դեռ շատ վարկային միջոցներ կներգրավվեն ու կմարվեն:

 

Ավելի վաղ հաղորդվել էր, որ մինչև 2016 թվականի վերջը Հայաստանի արտաքին պարտքը կհասնի ՀՆԱ-ի մինչև 54,4%-ի: Այս մասին հոկտեմբերի 4-ի մամուլի ասուլիսում հայտարարել էր ՀՀ ֆինանսների նոր նախարար Վարդան Արամյանը: Ըստ նրա, միայն 2014-2016 թվականներին Հայաստանի արտաքին պարտքն ավելացել է 900 մլն.դոլարով: Նշենք, որ ԱՄՀ տվյւալներով  2017 թվականին հանրապետությունը մտադիր է ստանալ 327 միլիոն դոլարի փոխառու միջոցներ, և վճարել 107 մլն.դոլար: 2020 թվականին փոխառությունները կկազմեն 803 մլն.դոլար, իսկ վճարները`660 մլն.դոլար: