Ֆիննախարարը զինծառայողների ընտանիքների ֆինանսական փոխհատուցան հիմնադրամի մասին. Յուրաքանչյուրը պետք է մտածի պետության և բանակի հանդեպ իր պատասխանատվության մասին

Արմինֆո. Զինծառայողների ընտանիքների ֆինանսական փոխհատուցման հիմնադրամի ստեղծման հիմքումը դրված մեխանիզմներն ընդամենը`զուտ ապահովագրութուն է: Լրագրողների հետ հանդիպմանն այս մասին հայտարարել է ՀՀ ֆինանսների նախարար Վարդան Արամյանը:

Ըստ Արամյանի, նախաձեռնության հիմքում դրված գաղափարախոսությունը մի փոքր այլ է, քան ներկայացրել է պաշտպանության նախարար Վիգեն Սարգսյանը: Հայկական բանակի հանդեպ պատասխանատվությունը, ըստ Արամյանի, բոլորի համար էլ հավասար է: Հայաստանն այսօրվա դրությամբ գտնվում է կիսապատերազմական վիճակում, հետևաբար, յուրաքանչյուրը պետք է մտածի երկրի և բանակի հանդեպ իր պատասխանատվությնա չափաբաժնի մասին: «Բանակը պետք է ունենա հենարան, որը պետք է արտահայտվի ոչ միայն բարոյական, այլ նաև նյութական ասպեկտում»,-հայտարարել է Արամյանը: Նրա խոսքով, այդ համատեքստում ստեղծվող ապահովագրական համակարգն իր հիմքում ունի ոչ միայն տրամաբանություն, այլ նաև փիլիսոփայություն: Իսկ այդ համակարգի պատշաճ գործունեության համար անհրաժեշտ է ապահովել որոշ չափանշների պահպանումը: Առաջին կարևոր ցուցանիշը, ըստ նախարարի, հանդիսանում է կանխատեսվող պերմանենտ մուտքերի ապահովումն է, որպեսզի ապահովագրական պատահարի` զինծառայողի մահվան կամ հաշմանդության դեպքում ընտանիքը 20 տարի ապահովված լինի նախատեսվող փոխհատուցումով:

Նախարարը նկատել է, որ տեղյակ է միջոցները ստվերից դուրս բերելու, ինչպես նաև կոռումպացված պաշտոնյաներիի գույքի ազգայնացման անհրաժեշտության վերաբերյալ կարծիքներին, մասնավորապես, ՊՆ աշխատակիցների այդ միջոցներն ուղղելով զինծառայողների ու նրանց ընտանիքների կարիքների ապահովմանը:

Նա նաև ընդունել է, որ այդ ճանապարհին անհնար է ապահովել պերմանենտ ֆինանսական մուտքեր: «Չնայած այն բանին, որ դա, ըստ էության, լրացուցիչ հարկային բեռ է քաղաքացիների վրա, այն արդարացված է ակնկալվող արդյունքների, ինչպես նաև բանակի հանդեպ Հայաստանի բոլոր քաղաքացիների հավասար պատասխանատվությունը գիտակցելու համատեքստում»,-հայտարարել է նախարարը:

Նշենք, որ եթե խորհրդարանը հավանություն տա օրինագծին, ստեղծվելու է զինծառայողների կյանքին կամ առողջությանը պատճառված վնասների հատուցման հիմնադրամ: Զոհված և առաջին կարգի հաշմանդամություն ստացած զինծառայողի ընտանիքները կստանան միանվագ 10 մլն. դրամ ապահովագրական վճար: 2-րդ կարգի հաշմանդամություն ստացած զինծառայողին կհատկացվի միանվագ 5 մլն. դրամ ապահովագրական վճար: Զոհվելու կամ առաջին կարգի հաշմանդամություն ստանալու դեպքում ամսական ապահովագրական վճարները կկազմեն` 300 հազար դրամ սպայական անձնակազմի, 250 հազար դրամ ենթասպաների և 200 հազար դրամ շարքայինների դեպքում: Երկրորդ կարգի հաշմանդամների դեպքում այդ վճարները համապատասխանաբար կկազմեն 250, 200 և 150 հազար դրամ: Այդ գումարը, որպես ապահովագրական վճար, կվճարվի 20 տարի շարունակ՝ կազմելով սպայական անձնակազմի համար 82 մլն. դրամ, ենթասպայական անձնակազմի պարագայում՝ 70 մլն. դրամ և շարքայինների դեպքում՝ 48 մլն. դրամ: Յուրաքանչյուր աշխատող ֆիզիկական անձ պետք է  ամսական 1000 դրամ վճարի այդ նպատակով ստեղծվող հիմնադրամին: