«ԳԼՈԲԱԼ ԿՐԵԴԻՏ» ՈՒՎԿ ՓԲԸ-ն նոյեմբերի 24-ին ՆԱՍԴԱՔ ՕԷՄԷՔՍ Արմենիայում կտեղաբաշխի իր դոլարային և դրամային հերթական թողարկման պարտատոմսերը

Արմինֆո. «ԳԼՈԲԱԼ ԿՐԵԴԻՏ» ՈՒՎԿ ՓԲԸ-ն նոյեմբերի 24-ին ՆԱՍԴԱՔ ՕԷՄԷՔՍ Արմենիա ֆոնդային բորսայում կտեղաբաշխի իր դոլարային և դրամային հերթական թողարկման պարտատոմսերի երկու խմբաքանակները: Այս մասին նոյեմբերի 17-ին կայացած մամուլի ասուլիսում հայտրարել է ընկերության գործադիր տնօրեն Լուիզա Իգրարյանը, նշելով, որ թողարկման ծավալները համապատասպանաբար կկազմեն 1 մլն.դոլար և 200 մլն.դրամ:

«Սա արդեն մեր երկրորդ թողարկումն է: Մենք առաջին վարկային կազմակերպությունն ենք, որն իրականացնում է արժեթղթերի էմիսիա, ինչը մեզ համար մեծ ձեռքբերում է: Այս անգամ ակնկալում ենք քաղաքացիների ավելի մեծ ներգրավվածություն, քանի որ սա այլընտրանքային ֆինանսական գործիք է, որը թույլ է տալիս ստանալ շահույթ, ունենալով ռիսկի ցածր մակարդակ»:

Պատասխանելով ԱրմԻնֆո գործակալության թղթակցի հարցին, Լ.Իգրարյանը հայտարարել է, որ պարտատոմսերի տեղաբաշխումից ստացված միջոցները կուղղվեն նոր վարկային պրոդուկտների մշակմանն ու ներդրմանը, մասնավորապես, նվազագույն ռիսկերով նոր սպառողական վարկերի ներդրմանը:

Ընկերութնա ոխտնօրեն Արամ Ղուկասյանը տեղեկացրել է, որ պարտատոմսերը տեղաբաշխվելու են ս.թ. նոյեմբերի 24-ին Բորսայի տեղաբաշխման հարթակում` երկու տրանշով: Առաջին տրանշով կտեղաբաշխվի 10,000 հատ անվանական արժեկտրոնային պարտատոմս՝ 1,000,000 ԱՄՆ դոլար ընդհանուր ծավալով, 100 ԱՄՆ դոլար անվանական արժեքով, 9 % տարեկան ֆիքսված տոկոսադրույքով և 36 ամիս շրջանառության ժամկետով: Երկրորդ տրանշով կտեղաբաշխվի 20,000 հատ անվանական արժեկտրոնային պարտատոմս՝ 200,000,000  ՀՀ դրամ ընդհանուր ծավալով, 10,000 ՀՀ դրամ անվանական արժեքով, 14% տարեկան ֆիքսված տոկոսադրույքով և 24 ամիս շրջանառության ժամկետով:

Իսկ ֆոնդային բորսայի գլխավոր տնօրենի տեղակալ Կարեն Զաքարյանը նշել է, որ  «ԳԼՈԲԱԼ ԿՐԵԴԻՏ» ՈՒՎԿ ՓԲԸ-ն նախորդ տարի առաջին անգամ պարտատոմսեր թողարկելուց հետո կրկին վերադառնում է շուկա՝ նոր թողարկումներով և ավելացված ծավալներով, ինչը խոսում է այն մասին, որ շուկան գրավիչ է թե թողարկողների, և թե ներդրողների համար: «Այն, որ առաջին էմիսիայից հետո «ԳԼՈԲԱԼ ԿՐԵԴԻՏ» ընկերությունն ավելի մեծ ծավալներով է վերադարձել շուկա, խոսում է մեր կողմից առաջարկված մեխանիզմների ու լուծումների արդյունավետության, ինչպես նաև դրանց լիակատար արդարածվածության մասին»,-ընդգծել է նա:

Պարտատոմսերի տեղաբաշխողն է «ՌԵՆԵՍԱ» ՓԲԸ-ն, որի գործադիր տնօրեն Վաղինակ Սարոյանի խոսքով, տեղաբաշխումը տեղի կունենա 11:00-ից մինչև 13:00-ն: Ցուցակումից հետո կիրականացնի նաև շուկա ստեղծողի գործառույթներ, ինչը թույլ կտա առևտրային գործառույթներ իրականացնել երկրորդային շուկայում: Վերադառնալով նախորդ էմիսիային, Վ.Սարոյանը նշել է, որ երկրորդային շուկան բավականին ակտիվ էր, ինչը, նրա կարծիքով, վկայում է արժեթղթերի հաջող տեղաբաշխման մասին:

Նշենք, որ «ԳԼՈԲԱԼ ԿՐԵԴԻՏ» ՈՒՎԿ-ն (համաձայն ՀՀ կենտրոնական բանկի խորհրդի 26.10.2010թ թիվ 267Ա որոշման) գրանցված ունիվերսալ վարկային կազմակերպություն է, որը ձևավորվել է «Վաշինգթոն Քափիթալ» ունիվերսալ վարկային կազմակերպություն ՓԲԸ և «Կրեդիտ Յունիոն» ունիվերսալ վարկային կազմակերպություն ՓԲԸ  միաձուլման արդյունքում, ինչպես նաև ընդլայնվել է «ԳԼՈԲԱԼ ԿՐԵԴԻՏ» ՈՒՎԿ ՓԲԸ-ի և «ՋԻ ԷՖ ՍԻ ՋԵՆԵՐԱԼ ԸՆԴ ՔՐԵԴԻԹ ՔՈՄՓԱՆԻ» ՈՒՎԿ ՍՊԸ-ի միացման ձևով վերակազմակերպման արդյունքում: Ներկայումս Ընկերությունը հանդիսանում է «ԿՐԵԴԻՏ ՅՈՒՆԻՈՆ», «ՎԱՇԻՆԳԹՈՆ ՔԱՓԻԹԱԼ» ՈՒՎԿ փակ բաժնետիրական ընկերությունների և «ՋԻ ԷՖ ՍԻ ՋԵՆԵՐԱԼ ՖԱՅՆԵՆՇՆ ԸՆԴ ՔՐԵԴԻԹ ՔՈՄՓԱՆԻ» ՈՒՎԿ ՍՊԸ-ի իրավահաջորդը:

Հիշեցնենք, որ «Ռենեսա»  փակ բաժնետիրական ընկերությունն ստեղծվել է 26.03.2001թ.-ին: 27.06.2008թ.-ին Ընկերությունը վերագրանցվել և վերալիցենզավորվել է ՀՀ Կենտրոնական Բանկի կողմից, որպես ներդրումային ընկերություն:  Ընկերությունը ֆոնդային բորսայի անդամ է դեռևս 24.01.2002թ-ից, իսկ 11.12.2008-ից այն նաև Արժեթղթերի հաշվարկային hամակարգի անդամ է: Ընկերության բաժնետերերն են Էդուարդ Մարությանը և Արայիկ Կարապետյանը, հավասար մասնաբաժիններով: 2014 թվականին «Ռենեսան» ճանաչվել է Հայստանի լավագույն ներդրումային ընկերությունը:

2015 թվականին «ՆԱՍԴԱՔ ՕԷՄԷՔՍ Արմենիա» ԲԲԸ-ում կորպորատիվ պարտատոմսերով կատարվել է 226 գործարք, 453.5 մլն.դրամ ընդհանուր ծավալով (նախորդ տարի`343 գործարք և 1.1 մլրդ.դրամ): Հայաստանի ֆոնդային շուկայի կապիտալացումը 2015 թվականին աճել է 42%, կազմելով 103.8 մլրդ.դրամ (նախորդ տարի`73 մլրդ.դրամ, իսկ 2013-ին` 61.7 մլրդ.դրամ):