«Ուրալյան ավիաուղիները» գործարկում է Դոնի Ռոստով-Գյումրի նոր միջազգային չվերթ

Արմինֆո. 2016 թվականի դեկտեմբերի 2-ից «Ուրալյան ավիաուղիները» գործարկում է Դոնի Ռոստով-Գյումրի նոր միջազգային չվերթ: Թռիչքները կիրականացվեն ուրբաթ օրերը: Նոր չվերթը գործարկվում է ձմեռային արձակուրդների նախաշեմին: Հայաստանը դահուկային սպորտի սիրահարների նախընտրելի հանգստավայրն է: Դա միակ չվերթը չէ դեպի Հայաստան: Ավիաընկերությունը շաբաթը 6 չվերթ է իրականացնում Դոնի Ռոստովից դեպի Երևան:

Հիշեցնենք, որ նախօրեին փոքր բյուջեով «Պոբեդա» ավիաընկերությունը սկսել է Մոսկվայի «Վնուկովո» օդանավակայանից դեպի Գյումրի նոր միջազգային չվերթի տոմսերի վաճառքը: Դեպի Գյումրի «Պոբեդայի» թռիչքները կիրականացվեն դեկտեմբերի 15-ից, շաբաթը երեք անգամ` երեքշաբթի, հինգշաբթի և կիրակի:

Նշենք, որ «Շիրակ» օդանավակայանից արդեն երկար ժամանակ թռիչքներ չեն իրականացվում: Նախորդ տարի Գյումրի-Մոսկվա միակ չվերթի իրականացումը դադարեցվել էր: «Շիրակ» օդանավակայանը ներառված է «Հայաստանի միջազգային օդանավակայաններ» ՓԲԸ կառույցում, որն ստեղծվել է հայտնի արգենտինահայ ձեռներեց Էդուարդո Էուռնեկյանի կողմից:

Միևնույն ժամանակ, Հայաստանի վարչապետ Կարեն Կարապետյանը հոկտեմբերի 20-ին ԱԺ արտահերթ նիստում կառավարության ծրագիրը ներկայացնելիս, մեկնաբանելով Գյումրիի «Շիրակ» օդանավակայանին առնչվող հարցը, նշել էր, որ տվյալ պահին ավիաընկերությունների հետ բանակցություննմեր են վարվում` որոշ չվերթներ այդ օդանավակայան վերաուղղելու նպատակով: Կառավարության ծրագրում այդ կետը կոչվում է «Նախադրյալների ստեղծում ավիափոխադրումների շուկայի ծավալների և աշխարհագրության մեծացման և բյուջետային ավիաընկերությունների կողմից դեպի «Շիրակ» օդանավակայան չվերթների իրականացման համար»: