Արմինֆո. Հայստանում 30 ՄՎտ հզորությամբ գեոթերմալ էլեկտրակայանի կառուցումը կկազմի մոտ 100 մլն.դոլար: Այս մասին նոյեմբերի 23-ին կայացած մամուլի ասուլիսում հայտարարել է ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը,ներկայացնելով կառավարության առաջնահերթությունները ոլորտում:
Նրա խոսքով, Սիսիանում ընթանում են գեոլոգա-հետախուզական աշխատանքներ: «Մենք արդեն փորել ենք երկրորդ հորը, հասնելով 1675 մետրի: Այդ մակարդակում ջրի կորուստները կազմում են 100%, ինչը նշանակում է, որ մենք հասել ենք խոռոչին: Իսկ դա լավ նշան է, ինչը վկայում է, որ կա գեոթերմալ ռեսուրս, և կարելի է կառուցել կայան»,-հայտարարել է փոխնախարարը, հավելելով, որ կայանը կօգտագործի ստորգետնյա տաք աղբյուրները, որոնք հանդիսանում են վերականգնվող էներգիայի աղբյուր:
Ըստ փոխնախարարի, ներկայումս գեոթերմալ կայաններ տարածաշրջանում չկան, իսկ այդ տեխնոլոգիան շատ է տարածված Իսլանդիայում: «Պետությունը կատարել է հետազոտություններ, որպեսզի ապացուցի ռեսուրսների առկայությունն այդ ուղղությամբ»,-ընդգծել է նա: Հաջորդ քայլը կլինի տեխնիկա-տնտեսական հիմնավորումների պատրաստումը և ներդրողների ներգրավումը: «Մրցույթում կհաղթի այն ներդրողը, որը կառաջարկի ամենացածր սակագինը»,-նշել է փոխնախարարը:
Ավելի վաղ, ԱրմԻնֆո-ի հետ հարցազրույցում, Հայկ Հարությունյանը հայտարարել էր, գեոթերմալ աղբյուրների բացահայտման աշխատանքները շարունակվում են «Քարքար» հարթակում, բայց Քարքարից բացի կան նաև այլ հեռանկարային վայրեր, օրինակ, Ջերմաղբյուրը, Լիձորը, նման վայրեր կան Վրաստանի հետ սահմանին և Սիսիանում: Բայց մինչև պետությունը չհաստատի ռեսուրսների առկայությունը, դժվար է ակնկալել ներդրումների ներգրավման հնարավորությունը: Չէ որ միայն հետազոտություններին և հորատումներին անհարժեշտ է 2-3 մլն.դոլար: Ոչ մի ներդրող չի կատարի ներդրումներ, առանց հաշվի առնելու ռիսկերը: Դրա համար էլ դրամաշնորհային միջոցներ են ներգրավվել կլիմայական ներդրումային հիմնադրամից: Պետությունը նույնպես մասնակցում է նախագծին, համաֆինանսավորելով ծրագիրը: Անցյալ տարի դեպի Քարքար ստեղծվել է լավ ճանապարհ, որը հետագայում կծառայի շինարարությանը և գեոթերմալ էլեկտրակայանի շահագործմանը, որի ընդհանուր արժեքը կազմում է 100 մլն.դոլար: Ընթացիկ տարում կատարվեցին 1500 մետր խորությամբ հորատման աշխատանքներ: Թեստավորումը, որը կատարվում է աշխարհի լավագույն լաբորատորիաներում, վկայում է զրոյից բարձր 122.5 աստիճան ջերմության առկայության մասին: Ներկայումս ձեռնամուխ ենք եղել մինչև 2 հազար մետր խորությամբ երկրորդ հորատանցքի փորմանը: Առաջին արդյունքները, ըստ տարբեր գնահատականների, բավականին հուսադրողն են: Անհրաժեշտ է ընդամենը փորել 3 հորատանցք: Եվ եթե 2 հազար մետր խորության վրա կստացվեն դրական արդյունքներ, մասնագետները կորոշեն երրորդ հորատանցքը փորելու անհրաժեշտությունը: Բայց ամենագլխավորն այն է, որ ակնհայտ է, որ Քարքար բնակավայրում ռեսուրսներ, անկասկած, կան: Հարցը բոլոր ռիսկերը նվազեցնելու մեջ է: Հետազոտությունների կատարումից հետո կմշակվի նախագծի տեխնիկա-տնտեսական հիմնավորումը, իսկ հետո այն կհանվի մրցույթի: Կայանի մոտավոր հզորությունը կկազմի 30 մեգավատ, տարեկան արտադրությունը` 220-250 մլն.կՎտ/ժամ էլեկտրաէներգիա, ինչը հավասար կլինի սպառման ծավալների 2.4%-ին: Կայանը կլինի բազիսային, այսինքն, կաշխատի շուրջօրյա ռեժիմով: