Արմինֆո. Պրոպարկոն (Ֆրանսիական զարգացման գործակալության դուստր ձեռնարկությունը, որն իր գործունեությունն է ծավալում մասնավոր հատվածի զարգացման ուղղությամբ) և Ամերիաբանկը կնքեցին 20 միլիոն ԱՄՆ դոլարի վարկային պայմանագիր: Տրամադրված ֆինանսավորման գումարը նախատեսվում է ուղղել Հայաստանում էներգաարդյունավետության, վերականգնվող էներգետիկայի, գյուղատնտեսության, սննդի վերամշակման, կրթության և առողջապահության ոլորտներում գործարարության աջակցության, տնտեսական աճի խթանման և աշխատատեղերի ստեղծման տեսանկյունից կենսական նշանակություն ունեցող ծրագրերի իրականացմանը: Ճկուն պայմաններով երկարաժամկետ ֆինանսավորումը կնպաստի երկրում գործարարության աճին և ընդլայնմանը, ինչպես նաև տեղական և արտահանման շուկաներում հայկական ընկերությունների մրցունակության բարձրացմանը: Այս մասին նոյեմբերի 29-ին պայմանագրի ստորագրման կապակցությամբ հրավիրված մամուլի ասուլիսում հայտարարել է Պրոպարկոյի ֆինանսական կառույցների գծով տնօրեն Գիյոմ Բարբրուսը:
Սա Ամերիաբանկի և «Պրոպարկո» ընկերության միջև կնքված երկրորդ գործարքն է: Պրոպարկոյի առաջին ֆինանսական ներդրումը Հայաստանում կատարվել էր դեռևս 2013 թվականին, երբ ընկերության և Ամերիաբանկի միջև կնքվեց 15 մլն ԱՄՆ դոլարի չափով վարկային պայմանագիր՝ փոքր և միջին ձեռնարկությունների, էներգաարդյունավետության, վերականգնվող էներգետիկայի ոլորտների ֆինանսավորման նպատակով: Երեք տարի անց Պրոպարկոն ընդլայնում է տնտեսության այն հատվածների ցանկը, որոնք պետք է ֆինանսավորվեն Ամերիաբանկի հետ կնքված նոր վարկային պայմանագրով տրամադրվող միջոցների հաշվին:
Բարձր գնահատելով բանկի գործունեությունը, ֆրանսիացի գործընկերը նշել է. «Ես 3-4 տարի հետևում էի Ամերիաբանկի գործունեությանը, և պետք է ասեմ, որ անգամ վերջին 2 տարիներին, որոնք տնտեսապես դժվարին տարիներ էին, Ամերիաբանկը շարունակել է աճել և զարգանալ, պահպանելով առաջատարի դերը երկրի բանկային համակարգում: Նրանք ուժեղ ֆինանսական կառույց կարողացան ստեղծել լավ մենեջմենտի, փորձառու և որակյալ անձնակազմի միջոցով»:
Իր հերթին, Ամերիաբանկի գլխավոր տնօրեն Արտակ Հանեսյանը շնորհակալոթյուն է հայտնել ֆրանսիացի գործընկերներին բարձր գնահատականի համար, նշելով, որ Պրոպարկոյի հետ պայմանագրի շրջանակներում վարկերը երկարաժամկետ են, ֆինանսավորումը նախատեսվում է դոլարային համարժեքով և մատչելի տոկոսադրույքներով: Վերադառնալով նախորդ պայմանագրին (2013-15 մլն.դոլար), բանկիրն ընդգծել է, որ միջոցները հաջողությամբ տեղաբաշխվեցին տնտեսությունում, մասնավորապես, ՓՄՁ ոլորտում և նպաստեցին աշխատատեղերի ստեղծմանը: Միևնույն ժամանակ, նա նշել է, որ բանկը շարունակելու է ընդլայնել իր գործունեությունն այդ ուղղությամբ, ինչի կապակցությամբ շուտով պայմանագիր կկնքեն մեկ այլ միջազգային գործընկերոջ հետ, բայց արդեն 70 մլն.դոլար գումարով: Ա.Հանեսյանը , ուշադրություն հրավիրելով պահանջարկի որոշակի կրճատմանը վարկային շուկայում, հայտարարել է, որ բանկը, հաշվի առնելով տնտեսության զարգացման հեռանկարները, այնուամենայնիվ, ակնկալում ակտիվացում և պահանջարկի ավելացում: «Մենք կփորձենք մինչև տարեվերջ պահպանել առաջատարի դերը վարկային շուկայում: Դժվարանում եմ տալ ճշգրիտ կանխատեսում, բայց կարծում եմ, որ Ամերիաբանկին կհաջողվի արագացնել վարկավորման տեմպերը, մասնավորապես, ՓՄՁ ոլորտում, քանի որ մեր հիմնական առաջնահերթույթունը հենց այս ոլորտն է», - ընդգծել է նա:
Ստորագրման արարողությանը հրավիրված էր նաև Հայստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտյեն, ով բավարար գնահատեց Պրոպարկոյի գործունեության ընդլայնումը և ամրապնդումը Հայաստանում: Վերադառնալով նախորդ պայմանագրին, ֆրանսիացի դեսպանը նշել է, որ առաջին վարկային համաձայնագրի շահառուները դարձան 4 հայկական ընկերություններ: «Այսօրվա համաձայնագրի ուղղվածությունը ոչ միայն համահունչ է Ֆրանսիական Զարգացման գործակալության, այլ նաև ՀՀ կառավարության քաղաքականությանը, որը Էներգախնայողության և էներգաարդյունավետության ծրագրերը համարում է Հայաստանի տնտեսության զարգացման ռազմավարական ուղղություններից մեկը», - եզրափակել է դեսպանը:
Նշենք, որ Պրոպարկոն Ֆրանսիական զարգացման գործակալության դուստր ձեռնարկությունն է, որն իր գործունեությունն է ծավալում մասնավոր հատվածի զարգացման ուղղությամբ: Այն 40 տարի շարունակ աջակցում է տնտեսական, սոցիալական և բնապահպանական կայուն զարգացման ծրագրերի իրականացմանը:
Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, Ամերիաբանկը 2016 թվականի հոկտեմբերի 1-ի դրութմամբ շուկայի առաջատարն է վարկային ներդրումների ծավալով - 352,3 մլրդ դրամ ($ 742,5 մլն, տարեկան աճը 21,4%), որից ավելի քան 87% -ը կամ 306.8 մլրդ դրամը ($ 646,6 մլն) ուղղվել է երկրի տնտեսությանը: Տնտեսության վարկավորման ծավալը բանկը տարեկան կտրվածքով ավելացրել է 22.4%: Հիփոթեքային վարկավորումը Բանկը տարեկան կտրվածքով ավելացրել է 10.8%, մինչև 18,6 մլրդ դրամ կամ $ 39.3 մլն, ամրապնդվելով առաջատարների եռյակում: Բանկի մանրածախ վարկավորումը տարեկան կտրվածքով աճել է 13%, մինչև 41.1 մլրդ դրամ կամ $ 86.6 մլն, իսկ ՓՄՁ-ների վարկային պորտֆելը`16,3%, մինչև 66,6 մլրդ դրամ կամ $ 140,4 մլն: 2016 թվականի 9 ամիսներն Ամերիաբանկը եզրափակել է 3,5 մլրդ դրամ ($ 7,4 մլն) զուտ շահույթով, լինելով առաջատարը նաև այս ցուցանիշով: «Ամերիաբանկ» ՓԲԸ-ն ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է տրամադրում բանկային լուծումների համապարփակ փաթեթի տեսքով: Բանկի բաժնետերերը են`Ameria Group CY ՍՊԸ`79,3% և ՎԶԵԲ –ը`20,7%:
Հայաստանի տնտեսությունն անառողջ է. տնտեսագետն առաջարկում է առկա խնդիրների լուծման եղանակներ
Հայաստանի բանկերի միության խորհրդի նախագահ է ընտրվել Մհեր Անանյանը
Հայաստանի միակ մրցակցային առավելության՝ գիտության մեջ ներդնելու փոխարեն Հայաստանի իշխանությունները ֆինանսավորում են ուժայիններին. տնտեսագետ