Արմինֆո. Հայաստանի Հանրապետության կենտրոնական բանկի կողմից սույն թվականի դեկտեմբերի 2-ին գրանցվել են «Բոնուս-Մալուս համակարգում մեկանգամյա արտոնության տրամադրման» RL 1-047 կանոնները (Կանոններ), որն ուժի մեջ է մտնում 2016 թվականի դեկտեմբերի 12-ին։
Ինչպես ԱրմԻնֆո գործակալությանը տեղեկացվել է Բյուրոյի մամուլի ծառայությունից, Կանոնների հաստատումը պայմանավորված է այն հանգամանքով, որ 2016 թվականի սեպտեմբերի 1-ին ներդրված նոր՝ Ապահովադիրների Բոնուս-Մալուս համակարգի շրջանակներում, ԱՊՊԱ ոլորտի առաջին հինգ տարիների արդյունքներով հանրային տրանսպորտի և տաքսիների ոլորտում վթարների մեծ քանակ ունեցող ապահովադիրների մոտ ԱՊՊԱ ապահովագրավճարների բարձրացումն առաջացրել է որոշակի անցումային ցնցումներ և լարվածություն:
Աղբյուրը նշում է, որ Բյուրոն հարկ է համարում ընդգծել, որ իրականում կատարված փոփոխության արդյունքում ստացված բարձրացումներն օբյեկտիվ են, հիմնավորված և արդար, քանի որ փոփոխություններն արտացոլում են պատահարների իրական վիճակագրությունը և ապահովում Ապահովադիրների ռիսկայնությանը համապատասխան ապահովագրավճարների գանձումը՝ ավելի բարձր ռիսկային Ապահովադիրների համար սահմանելով ավելի շատ և ավելի ցածր ռիսկայինների համար՝ ավելի ցածր ապահովագրավճարներ: Սա նաև վկայում է այն մասին, որ վերջին 5 տարիներին հանրային տրանսպորտի և տաքսիների ոլորտում առկա են բազմաթիվ խնդիրներ, մի շարք կազմակերպություններ և անձինք, ունենալով վթարների բարձր վիճակագրություն, շարունակել են կնքել ԱՊՊԱ պայմանագրեր բունուսային կամ ավելի ցածր մալուսային դասերով, ինչը կարող է արդյունք լինել իրականությանը չհամապատասխանող վարորդների հայտարարագրման, հիմնականում բոնուսային դասերի վարորդների հայտարարագրման կամ վարորդների անընդհատ փոփոխման:
Այնուհանդերձ՝ հաշվի առնելով մի շարք սոցիալական խնդիրներ, ինչպես նաև այն, որ հանրային տրանսպորտ և տաքսի ոլորտների խնդիրները բոլորիս համար բավական զգայուն են՝ Բյուրոյի Խորհուրդը որոշել է և ՀՀ կենտրոնական բանկի Խորհուրդը գրանցել է հանրային տրանսպորտի և տաքսիների ոլորտում մեկից ավելի ավտոմեքենա ունեցող և մալուսային դասերում գտնվող Ապահովադիրներին ի հաշիվ ԱՊՊԱ համակարգի 4 մալուսային դասերի նվազեցման միջոցով մեկանգամյա արտոնություն տրամադրելու վերաբերյալ (մանրամասները նկարագրված են հրապարակված կանոններում և http://paap.am/datas/zdocs/5da8d25a91c8bae411305ff2154726c1.pdf. հղումով):
Ըստ ԱրմԻնֆո գործակալության` Հայաստանի ապահովագրական ընկերությունների Ռենկինգի, ապահովագրական պրեմիաների ընդհանուր ծավալը 2016 թվականի հոկտեմբերի 1-ին կազմել է 23.2 մլրդ. դրամ (տարեկան աճը`2.6%), իսկ ապահովագրական հատուցումների ծավալը գերազանցել 9.8 մլրդ.դրամը (տարեկան աճը 2.4%): Ապահովագրական պրեմիաների ընդհանուր կառուցվածքում ամենամեծ ծավալներն ավանդաբար արձանագրել է ԱՊՊԱ հատվածը - 55.7% կամ 13.2 մլրդ դրամ (տարեկան աճը` 1.4%): ԱՊՊԱ-ն առաջինն է նաև հատուցումների գծով` 59,82% կամ 6.01 մլրդ դրամ (տարեկան անկումը`1,5%): Ըստ ՀՀ Ավտոապահովագրողների բյուրոյի տվյալների, 2016 թվականի հոկտեմբերի 1-ին ԱՊՊԱ հատվածում ապահովագրական հատուցման հայտերի թիվն ավելացել է 26%, մինչև 4336, բավարարված հայտերի թիվը`25%, մինչև 4056, իսկ իրականացված հատուցումների ընդհանուր ծավալը 13%, մինչև 786 մլն. դրամ, նոյեմբերի 1-ի դրությամբ հասնելով 852 մլն դրամի:
Նշենք, որ Հայաստանի ապահովագրական շուկայում ներկայումս գործում են 6 ընկերություններ, որոնք ապահովագրական աշխատում են 19 դասերի լիցենզիաներից 17 դասերով, բացառությամբ` երկաթուղային տրանսպորտի և դատական ու արտադատարանական ծախսերի ապահովագրություններից: Ապահովագրական 16 դասերի լիցենզիա ունի «ԻՆԳՈ Արմենիա» ընկերությունը (միակն է, որ զբաղվում է ջրային տրանսպորտի ապահովագրութամբ, որին ըստ լիցենզավորման դասերի թվով հաջորդում է «Ռոսգոսստրախ Արմենիա»-ն` ապահովագրության 15 դաս (միակն է վարկային ռիսկերի ապահովագրության ոլորտում), 11 դասերի ապահովագրությամբ են զբաղվում «Սիլ Ինշուրանս», «Արմենիա Ինշուրանս» և ՌԵՍՈ ընկերությունները, և 10 դասերով` «Նաիրի Ինշուրանս» ընկերությունը: (ՀՀ դրամի միջին հաշվարկային փոխարժեքը 30.09.2016 թ. կազմել է 474.46 դրամ/դոլար):