Շաբաթ, 10 Դեկտեմբերի 2016 15:22

Արմինֆո. Հայաստանի բանկերի ժամկետանց վարկերի ծավալը մինչև 2016 թվականի նոյեմբեր ավելացել է տարեկան 34,3%-ով, իսկ միայն հունվար-հոկտեմբեր ամիսներին` 12,8%-ով` հասնելով 42.7 մլրդ դրամի: Ազգային վիճակագրական ծառայությունից ԱրմԻնֆո-ին տրամադրված ՀՀ ԿԲ տվյալների համաձայն, երկարաձգված վարկերի ծավալը տարեկան կտրվածքով նվազել է 11,4%-ով, իսկ հունվար-հոկտեմբեիր ամիսներին` 7,5%-ով` կազմելով 115.4 մլրդ դրամ:

 

Մինչև 2016 թվականի նոյեմբեր երկարաձգված վարկերի բաժինը կազմել է 4,57% (մեկ տարվա վաղեմության 5,67%-ի և տարեսկզբի 5,29%-ի դիմաց), իսկ ժամկետանց  վարկերինը` 1,91% (մեկ տարվա վաղեմության 1,56%-ի և տարեսկզբի 1,81%-ի դիմաց):

 

Երկարաձգված և ժամկետանց վարկերում գերակշռում են երկարաժամկետ փոխատվությունները: Մասնավորապես, ժամկետանց վարկերի պորտֆելում երկարաժամկետ փոխառություններին բաժին է ընկնում 53,7%, իսկ կարճաժամկետներին`  46,3%, որոնց բացարձակ մեծությունը կազմել է, համապատասխանաբար, 23 մլրդ դրամ և 19.7 մլրդ դրամ: Իսկ երկարաձգված վարկերի բաժինը երկարաժամկետներ վարկերի պորտֆելում ավելի զգալի է` 63% (64.5 մլրդ դրամ), իսկ մնացած 37% կամ 37.7 մլրդ դրամ` կարճաժամկետ վարկեր են:

 

Ընդհանուր առմամբ, բանկային համակարգի վարկային ներդրումները տարեկան կտրվածքով ավելացել են 10,8%-ով, իսկ տարեսկզբից ի վեր`  8%-ով, 2016 թվականի նոյեմբերի 1-ին հասնելով 2.094 տրլն դրամի, իսկ, հաշի առնելով ժամկետանց և երկարաձգված վարկերը, բանկային վարկավորման ընդհանուր ծավալը կազմել է 2.239 տրլն դրամ: (Դոլարի նկատմամբ դրամի հաշվարկային փոխարժեքը 31.10.16 դրությամբ կազմել է 475,14 դրամ/1դոլար):