Ուրբաթ, 16 Դեկտեմբերի 2016 15:26

Արմինֆո. Դեկտեմբերի 15-ին Բրյուսելում տեղի է ունեցել ՀՀ-ԵՄ համագործակցության կոմիտեի տասնյոթերորդ նիստը:

Նիստի համանախագահներն էին հայկական կողմից` ՀՀ տնտեսական զարգացման և ներդրումների նախարար Սուրեն Կարայանը, եվրոպական կողմից` Եվրոպական արտաքին հարաբերությունների ծառայության Ռուսաստանի, Արևելյան գործընկերության, Կենտրոնական Ասիայի, տարածաշրջանային համագործակցության և ԵԱՀԿ հարցերով` տնօրեն Լյուկ Դեվինյեն:

Նիստի ընթացքում կողմերը քննարկել են ՀՀ-ԵՄ համագործակցության ապագա համաձայնագրին, ՀՀ-ԵՄ առևտրատնտեսական հարաբերություններին և տնտեսական զարգացումներին առնչվող հարցեր: Օրակարգում ներառված էին նաև արդարադատության, ազատության,անվտանգության, տրանսպորտի և էներգետիկայի ոլորտում համագործակցության, բազմակողմ համագործակցության ձևաչափի, ինչպես նաև Լեռնային Ղարաբաղի հիմնահարցի և Հայաստան-Թուրքիա հարաբերությունների վերաբերյալ հարցեր:

Նիստի ընթացքում քննարկվել է նաև նոր Եվրոպական հարևանության քաղաքականության և Արևելյան գործընկերության համատեքստում ՀՀ-ԵՄ հարաբերությունների զարգացումը:

Նշենք, որ Հայաստան-ԵՄ ապրանքաշրջանառությունը 2016 թ. հունվար-սեպտեմբերին կազմել է $978,3 մլն՝ 0,7% տարեկան աճով: Ապրանքաշրջանառության կառուցվածքում արտահանումը կազմել է $387,4 մլն՝ 13,6% աճով, իսկ ներմուծումը՝  $590,9 մլն՝ գրանցելով 6,2% անկում: Մինչդեռ 2015 թ., հանրապետության Մաքսային ծառայության տվյալների համաձայն, ԵՄ երկրների հետ Հայաստանի ապրանքաշրջանառությունը կազմել է շուրջ $1,2 մլրդ, այսինքն՝ Հայաստանի ապրանքաշրջանառության ընդհանուր ծավալի շուրջ 25%-ը: