Արմինֆո. Խոշոր հարկ վճարողների հարկային տեսչությունում գրանցված 521 հարկ վճարողներից 296-ը դեկտեմբերի 1-ի դրությամբ ռիսկային ցանկում են: Ռիսկերը 3 հիմնական ուղղություններով են՝ թաքցվող շրջանառություն, գների թերհայտարարագրումների և ծախսերի ուռճացման հետևանքով հարկվող օբյեկտների նվազեցում: Այդ մասին ասվում է ՊԵԿ մամուլի ծառայության հաղորդագրության մեջ:
Աղբյուրի համաձայն, այնուամենայնիվ, 296 ռիսկային կազմակերպությունները 2016թ. 11 ամիսներին բյուջե են վճարել 12.6%-ով ավելի հարկային եկամուտ 2015թ.-ի նույն ժամանակաշրջանի համեմատ: Խոշոր հարկ վճարողների հարկային տեսչության պետ Ռաֆիկ Մաշադյանը վստահեցնում է, որ հարկային մարմնի գործողությունները հատկապես վերջին ամիսներին նպատակաուղղված են հարկային իրավախախտումների կանխարգելմանը, ոչ թե առանց նախազգուշացումների հարկ վճարողների նկատմամբ պատժամիջոցների կիրառմանը. «Այդ նպատակով տեսչության վերլուծական և հսկողական գործառույթներ իրականացնող բոլոր ստորաբաժանումները, հարկ վճարողների տվյալների ամենօրյա մոնիթորինգի արդյունքում գնահատում են ռիսկերը, որոնք տեսչությունում գրանցված կազմակերպություններին են ներկայացվում հոկտեմբերից մեկնարկած ոլորտային և անհատական հանդիպումների ժամանակե: Իրազեկող հանդիպումներից հետո կազմակերպությունների մի մասը մասամբ կամ լիովին փոխել է հարկային վարքագիծը, մյուսը՝ ոչ: Առավել ռիսկային է ապրանքների ներմուծման ոլորտը, որտեղ գործող 155 հարկ վճարողներից 111-ը գնահատվել է ռիսկային, բժշկական ծառայությունների ոլորտը, որտեղ գործող 5 հարկ վճարողներից 4-ը ռիսկային են: Այդ ցանկում են նաև կաթնամթերք արտադրող 7 և հրուշակեղեն արտադրող 5 ընկերություններ: Գործարքների փաստաթղթավորման առումով ոչ ռիսկային են կապի և բանկային գործունեության ոլորտները: «Պետեկամուտների կոմիտեի գործողությունները միտված են բոլոր կազմակերպությունների համար համահավասար հարկային դաշտի ապահովմանը, քանի որ ստվերում գործողները խաթարում են բիզնեսի մրցակցային միջավայրը: Հետևողական և թիրախային գործողությունները հանգեցնելու են նման տնտեսվարողների կողմից հարկերի ինքնուրույն հայտարարագրմանըե,-ընդգծում է Ռաֆիկ Մաշադյանը:
Խոշոր հարկ վճարողների առաջին հնգյակն այս տարի, ինչպես 2015թ.-ին, գլխավորում է «Գազպրոմ Արմենիաե ՓԲԸ-ն: «Զանգեզուրի ՊՄԿե-ի փոխարեն առաջատարների շարքում է հայտնվել «Գրանդ Տոբակոե-ն: Խոշոր հարկ վճարողների ՀՏ-ը 2016թ.-ն ամփոփում է նախորդ տարվա համեմատ հարկային եկամուտների 5.2% աճով: Տեսչությունում հաշվառված կազմակերպությունների հարկային եկամուտները 2016թ.-ին կկազմեն շուրջ 436.5 մլրդ դրամ, ինչը գերազանցում է նախորդ տարվա նույն ցուցանիշը մոտ 22 մլրդ դրամով:
Ինչպես ավելի վաղ հայտնել էր ԱրմԻնֆո-ն, ՀՀ կառավարության սեպտեմբերի 15-ի նիստում վարչապետ Կարեն Կարապետյանը Պետական եկամուտների կոմիտեին հանձնարարել էր՝ ապահովել ոչ կարգապահ և արտոնյալ ընկալվող խոշոր արտադրողների և ներմուծողների կողմից հարկային կարգապահության անվերապահ կատարումը. «Հարկային ստուգումները պետք է իրականացվեն բացառապես ռիսկային համարվող սուբյեկտներում, փոքր և միջին ձեռնարկություններին անդրադառնալ ծայրահեղ դեպքերում, մաքսային ծառայողների հնարավոր սուբյեկտիվ վարքագծի բացառում և գործունեության թափանցիկության ապահովում: Բայց այս գործողությունները պետք է կատարել առանց բիզնեսի համար խոչընդոտ ստեղծելու։ Որևիցե ձևակերպում, որևիցե ստուգում չպետք է խանգարի իրենց ամենօրյա գործունեությանը»,- հայտարարել էր վարչապետը: