Հինգշաբթի, 22 Դեկտեմբերի 2016 18:24

Արմինֆո. Միջազգային ասպարեզում Հայաստանին, որպես գինի արտադրող երկիր, անլուրջ են ընկալում, լուրջ են վերաբերում նրանց, ովքեր ակտիվ արտահանման քաղաքականություն են իրականացնում, այսօր մամուլի ասուլիսի ժամանակ այդպիսի կարծիք է հայտնել Հայաստանի գինեգործների միության ղեկավար Ավագ Հարությունյանը՝ վկայակոչելով Վրաստանի արտահանմանն ուղղված գործունեությունը: «Որ շուկա էլ մեզ հաջողվում է մուտք գործել մեր ուժերով, ամենուր բախվում ենք «վրացական պատին»: Վրաստանը 10 անգամ ավելի շատ է ծախսում արտահանման քաղաքականության իրականացման վրա, քան մենք»,- ընդգծել է նա: Նրա խոսքով, վրացական կողմի արտահանման ծախսերը կազմում են շուրջ $100 հազար, մինչդեռ Հայաստանը 10 անգամ ավելի քիչ է ծախսում, հարևան երկրի մարքեթինգային ծախսերը տարեկան կազմում են $1 մլն-ից մինչև $3 մլն, իսկ Հայաստանի՝ ընդամենը $50 հազար:

 

Միության ղեկավարի խոսքով, Վրաստանը շահեկան դրությունում է՝ պետական աջակցության շնորհիվ, ինչը մեզ մոտ բացակայում է: «Պետությունը կանգնած է իր գյուղացու, իր արտադրողի կողքին, պետական աջակցությունը շատ զգալի է»,- ընդգծել է նա: «Տարեկան անցկացվում է շուրջ 8 գինու միջազգային փառատոն, որտեղ Վրաստանը մշտական մասնակից է՝ ներկայացնելով իր բոլոր 50 արտադրողներին: Նրանք ամեն տարի անցկացնում են հանդիպումներ, համաժողովներ, համտեսներ, ցուցահանդեսներ՝ փորձելով այդպիսով աշխարհի ուշադրությունը կենտրոնացնել իրենց վրա»,- պարզաբանել է Հարությունյանը: Հայաստանը, Միության ղեկավարի խոսքով, դա իրեն թույլ տալ չի կարող՝ նման միջոցառումների անցկացման թանկության պատճառով, որոնք միջինը $150 հազար են նստում պետության վրա: «Կառավարությունը տեղյակ է ստեղծված իրավիճակի մասին, պարզապես բավարար ռեսուրսներ չունի»,- նշել է փորձագետն ԱրմԻնֆո-ի թղթակցին՝ վկայակոչելով վարչապետի խոսքերը, ով հայտարարել էր, որ բյուջետային միջոցների 41%-ը կուղղվեն սոցիալական ծրագրերի իրականացմանը:Այս առնչությամբ նա հայտնել է, որ կառավարությանը ներկայացվել է ծրագիր, որում Միությունը նշել է հիմնական ուղղույունները, որոնք կնպաստեն արտահանման քաղաքականության արդյունավետ իրականացմանը: «Հուսով եմ, որ կես տարվա ընթացքում ծրագիրը կքննարկեն կառավարությունում»,- ասել է նա:

 

Փորձագետի կարծիքով, ոլորտի համար լրացուցիչ բացասական գործոն է Սփյուռքը, որն արտադրողներին զրկում է ցանկացած մոտիվացիայից: «Սփյուռքը ձեռք է բերում հայկական գնի՝ ղեկավարվելով բացարձակապես վերջինիս «հայկական» լինելու հանգամանքով՝ անտեսելով որակը, արժեքը և այլ ցուցանիշներ: Այս հարցում Հարությունյանը նպատակահարմար է համարում Սփյուռքին հայկական գինու պաշտոնական դեսպանի դեր վստահելը, ինչպես ժամանակին Վրաստանն արեց, ինչը հանգեցրեց այսօրվա արդյունքներին:

 

Պատասխանելով ԱրմԻնֆո-ի թղթակցի հարցին՝ Հարությունյանը հայտնել է, որ տարեկան արտադրված  6 մլն լիտր գինուց Հայաստանից արտահանվում է 2 մլն լիտր, որի 85%-ը բաժին է ընկնում ԱՊՀ շուկային /որտեղ 90%-ը ռուսական շուկային, ինչն արդեն այդքան շահութաբեր չէ մեզ համար/, շուրջ 5-6%-ը՝ վրացական շուկային, 1-2%-ը՝ ԵՄ, ԱՄՆ, Մերձբալթիկայի երկրների, Չինաստանի շուկաներին: Փորձագետի կարծիքով, աշխատելով միայն չինական շուկայում՝Հայաստանը կարող էր լուծել արտահանվող գինու հետ կապված իր բոլոր խնդիրները: «Չինական շուկան արդյունավետ է, և մեր հարևաններն արդեն գինու ազատ առևտրի մասին համաձայնագիր են կնքել, ինչը մենք անել չենք կարող: ԵՏՄ-ին անդամակցության պատճառով Հայաստանն իրավունք չունի առևտրային համաձայնագրեր կնքել՝ որպես առանձին սուբյեկտ, նման համաձայնագրեր կարող են ստորագրվել ԵՏՄ-Չինաստան ձևաչափով, ինչը բավական երկար ժամանակ և ռեսուրսներ է պահանջում»,- ընդգծել է Հարությունյանը:

 

ՀՀ Մաքսային ծառայության տվյալներով, 2016 թ. I-ին կիսամյակում Հայաստանն արտահանել է 780 հազար լիտր գինի՝ 25% տարեկան աճով: Ամբողջ 2015 թ. ընթացքում գինու արտահանումը կրճատվել է 29%-ով՝ մինչև 1.5 մլն լիտր՝ մեկ տարի առաջ նույն ժամանակաշրջանի 50% աճի փոխարեն: Վիճակագիրների տվյալների համաձայն, գինու արտադրությունը 2016 թ. հունվար-հոկտեմբերին կազմել է ավելի քան 5 մլն լիտր՝ 12,4% տարեկան աճով՝ մեկ տարի առաջ նույն ժամանակաշրջանի 2,1% աճի փոխարեն: