2017 թվականին «ԻՆԳՈ Արմենիա» ընկերությունն ակտիվացնում է ապահովագրական ծառայությունների «դիջիտալիզացիան»

Արմինֆո. 2017 թվականին «ԻՆԳՈ Արմենիա» ընկերությունը մտադիր է ակտիվացնել ապահովագրական ծառայությունների թվայնացումը: Այս մասին դեկտեմբերի 28-ին կայացած մամուլի ամփոփիչ ասուլիսում հայտարարել է ընկերության գործադիր տնօրեն Արևշատ Մելիքսեթյանը, նկատելով, որ մեկ շաբաթ առաջ ընկերությունը գործարկել է նոր նախագիծ – ԱՊՊԱ առցանց համակարգը, որը հաճախորդների թույլ կտա ինքնուրույն կնքել ապահովագրության պայմանագրեր և կատարել վճարումներ: «Հաջորդ 2 ամիսներին մենք մտադիր ենք առցանց բլոկը ներդնել նաև տուրիստների ապահովագրության պայմանագրերի կնքման համար»,-հավելել է նա:

«Մեր հետազոտություններով Հայաստանում ավելի քան 400 հազար քաղաքացիներ, ապրանքներ և ծառայություններ գնելիս, ակտիվորեն օգտվում են վճարումների էլեկտրոնային համակարգերից: Ներկայումս այդ ձևաչափը համարվում է պահանջված: Թվայինին անցնելը թույլ է տալիս պարզեցնել հարաբերությունները հաճախորդների հետ, որոնք այսուհետ կարող են աշխարհի ցանկացած կետից մեզ հետ կնքել ապահովագրության պայմանագրեր»,-նշել է Մելիքսեփյանը:

Միևնույն ժամանակ, ընկերության 2017 թվականի գործունեության հիմնական ուղղությունը կլինի ապահովագրական ծառայությունների ընդլայնումը ֆիզիկական անձանց համար: Այս առումով նա տեղեկացրել է, որ 2017-ի սկզբին կներկայացվի մի նոր պրոդուկտ – ֆիզիկական անձանց առողջության կամավոր ապահովագրությունը, որն ամեն տարի կընդլայնվի և ավելի հասանելի կլինի բնակչությանը: Նրա խոսքով, 2017-ին ընկերությունը կաշխատի տրամադրվող ծառայությունների որակի բարձրացման ուղղությամբ, ինչը թույլ կտա ավելացնել հաճախորդների բազան: Նա տեղեկացրել է նաև, որ 2017-ի ապրիլից կներդրվի ԱՊՊԱ գծով ուղղակի հատուցումների համակարգը, որը ենթադրում է, որ ապահովագրական պատահարի դեպքում տուժածը հատուցումը կստանա իր ապահովագրական ընկերությունից, որը հետագայում այդ գումարը կստանա մյուս ընկերությունից, որտեղ ապահովագրված էր վնաս պատճառած վարորդի ավտոմեքենան: Այսպիսով, ավտոսեփականատերերն ապահովագրական պայմանագրի գործողության ընթացքում գործ կունենան միայն իրենց ապահովագրական ընկերության հետ: Դա թույլ կտա բարձրացնել ծառայությունների մատուցման որակը և վերականգնել «Յուրաքանչյուր ապահովագրական ընկերություն սպասարկում է իր հաճախորդին» սկզբունքը: Բացի այդ, ԻՆԳՈ Արմենիան մտադիր է պարզեցնել ապահովագրական հատուցումների քննարկման գործընթացները, դարձնելով դրանք հրապարակային, որտեղ ապահովադիրների շահերը կներկայացնեն այն հաճախորդները, որոնք նախապես կստորագրեն գաղտնիության համապատասխան պայմանագիր:

Այնուհետև տնօրենը հայտարարել է, որ այս տարի ավանդական կորպորատիվի անցկացման համար նախատեսված միջոցները կուղղվեն զինծառայողների կյանքին և առողջությանը պատճառված վնասի հատուցման Հիմնադրամին: «2017 թվականից մենք կշարունակենք աջակցել մեր զինծառայողներին»,-հավելել է նա:

Ա.Մելիքսեթյանը 2017 թվականի համար կանխատեսել է. «Ապահովագրության ոլորտում մենք կարող ենք անել ավելին, թե արտադրողականության, և թե մասնագիտական առումով: Հուսով եմ, որ հաջորդ տարին կուղեկցվի ակտիվ աճով, բայց ամեն ինչ կախված է երկրի տնտեսական վիճակից»:

Միևնույն ժամանակ, Մելիքսեթյանը ներկայացրել է ԻՆԳՈ Արմենիա ընկերության 2016 թվականի արդյունքները: Մասնավորապես, ակտիվները կազմել են 11 միլիարդ դրամ, պարտավորությունները`7 միլիարդ դրամ, սեփական կապիտալը`3,9 մլրդ դրամ, զուտ շահույթը`900 մլն դրամ, վճարված հարկերը`մոտ 400 մլն դրամ: Նա նշել է, որ 2016 թ-ին ընկերությունն իրականացրել է 3.4 մլրդ դրամի ապահովագրական հատուցում, որից 1,9 մլրդ դրամն ԱՊՊԱ և ԿԱՍԿՈ գծով, իսկ ավելի քան 1 մլրդ դրամ – առողջության ապահովագրության գծով: Ընկերության աշխատակիցների թիվը տարեկան կտրվածքով աճել է 14%, մինչև 267 հոգի, իսկ ապահովագրական գործակալների թիվը`1500: Ընկերությունն սպասարկում է մոտ 200 հազար ֆիզիկական անձանց և 1300 ընկերությունների: Ընկերության վճարունակության մակարդակը 50% գերազանցում է նորմատիվային սանդղակը, իսկ իրացվելիության մակարդակը`2 անգամ: Միևնույն ժամանակ, Ա. Մելիքսեթյանը նշել է, որ այս տարի ԻՆԳՈ Արմենիան արժանացել է Ինգոսստրախ ընկերության «Լավագույն դուստր ընկերություն» անվանակարգի հաղթողի կոչմանը ԱՊՀ 17 մյուս ընկերությունների շարքում: «Նման արդյունքների կարողացանք հասնել ռիսկերի համապարփակ գնահատման և հավասարակշռված ներդրումային քաղաքականության շնորհիվ», - եզրափակել է նա:

Ըստ ԱրմԻնֆո գործակալության` Հայաստանի ապահովագրական ընկերությունների Ռենկինգի, Հայաստանի ապահովագրական շուկայում ներկայումս գործում են 6 ընկերություններ, որոնք աշխատում են ապահովագրական 19 դասերի լիցենզիաներից 17 դասերով, բացառությամբ` երկաթուղային տրանսպորտի և դատական ու արտադատարանական ծախսերի ապահովագրություններից: Ապահովագրական 16 դասերի լիցենզիա ունի «ԻՆԳՈ Արմենիա» ընկերությունը (միակն է, որ զբաղվում է ջրային տրանսպորտի ապահովագրութամբ): Ապահովագրական պրեմիաների առումով ԻՆԳՈ Արմենիան առաջատարն է բժշկական ապահովագրության, ԿԱՍԿՈ, դժբախտ պատահարներից ապահովագրության, արտասահման մեկնողների ապահովագրության հատվածներում, միաժամանակ երկրորդ հորիզոնականը զբաղեցնելով մյուս դասերի ապահովագրության հատվածներում: Ապահովագրական հատուցումների գծով ընկերությունն առաջատարն է բժշկական ապահովագրության, դժբախտ պատահարներից ապահովագրության և բեռների ապահովագրության հատվածներում, իսկ մնացած դասերով գտնվում է երկրորդ տեղում:

Նշենք, որ «ԻՆԳՈ Արմենիա» ընկերությունը գործում է 1997 թ. սեպտեմբերից: Ընկերության բաժնետերերն են` ռուսական «Ինգոսստրախ ընկերության» հետ փոխկապակցված «Ինվեստ-Պոլիս» ընկերությունը - 75% և Լևոն Ալթունյանը 25%: