Հինգշաբթի, 12 Հունվարի 2017 16:52

Արմինֆո. Ռուսական շուկան չպետք է լինի հայկական գինիների իրացման դոմինանտը: Այսօր կայացած մամուլի ասուլիսում նման կարծիք է հայտնել Հայաստանի Գինեգործների միության նախագահ Ավագ Հարությունյանը:

 

Պատասխանելով ԱրմԻնֆո գործակալության հարցին, փորձագետը նշել է, որ անհրաժեշտ է կողմնորոշվել դեպի Չինաստանի և Հնդկաստանի շուկաները, ինչը հնարավոր է իրականացնել միայն արտադրողների մակարդակով, այլ ոչ թե ԵԱՏՄ շրջանակներում: Նրա կարծիքով, ԵԱՏՄ-ն էժան շուկա է, որը ձեռնտու չէ Հայաստանին, քանի որ Հայաստանը չունի ցածր ինքնարժեքով ապրանքներ արտադրելու հնարավորություն, ինչը խոսում է անհավասար պայմանների մասին`վրացական, մոլդավական, ադրբեջանական և ռուսաստանյան արտադրողների հետ: «Եթե կարողանանք արտադրել 1-1.5 դոլար արժեքով գինի, ապա ԵԱՏՄ շուկան մեզ համար կլինի հրաշալի հարթակ»,-նշել է նա:

 

Նրա խոսքով, այսօր Հայաստանը Ռուսաստան է արտահանում մոտ 2 մլն.շիշ գինի, 6 մլն. շիշ արտադրության պայմաններում, որտեղ 4 մլն.շիշ են կազմում խաղողի գինիները: Իսկ վրացիները ռուսաստանյան շուկայում վաճառում են 30-35 մլն.շիշ գինի: «Այսօր Վրաստանն ստանում է միլիոնավոր դոլարների դրամաշնորհներ, գինեգործությունը զարգացնելու համար, իսկ մեզ լուրջ չեն ընկալում որպես գինեգործների: Աշխարհի համար Հայաստանը հանդիսանում է կոնյակ արտադրող»,-նշել է նա:

 

Ըստ ՀՀ Մաքսային ծառայության տվյալների, 2016 թվականի I կիսամյակում Հայաստանից արտահանվել է 780 հազ. լիտր գինի, տարեկան աճը`25%: 2015 թվականին գինու արտահանումը նվազել է 29%, մինչև 1,5 մլն լիտր, դրան նախորդող տարվա նույն ժամանակահատվածի 50% աճի փոխարեն:: Ըստ վիճակագրության, գինու արտադրությունը Հայաստանում 2016 թվականի հունվար-նոյեմբերին կազմել է 5.8 մլն լիտր, տարեկան աճը`15.6%,  նախորդ տարվա նույն ժամանակահատվածի 2.1% անկման փոխարեն: