Հինգշաբթի, 19 Հունվարի 2017 09:27

Արմինֆո. Ավանդաբար գյուղատնտեսության վարկավորման շուկայում որպես առաջատար հանդես եկող «ԱԿԲԱ-Կրեդիտ Ագրիկոլ Բանկը» մինչև 2017 թվականի հունվարի 1-ն ընդհանուր կապիտալի գծով դիրքերն ամրապնդել է առաջատար եռյակում, իսկ ակտիվների և պարտավորությունների գծով` առաջատար հնգյակում: ԱրմԻնֆո ԼԳ պատրաստած «Հայաստանի բանկերի էքսպրես-ռենքինգի» տվյալներով, նշված օրվա դրությամբ «ԱԿԲԱ-Կրեդիտ Ագրիկոլ Բանկի» ընդհանուր կապիտալը կազմել է 56.8 մլրդ դրամ կամ 117.4 մլն դոլար` 5,8% տարեկան աճով: Ընդ որում, դրա կառուցվածքում կուտակված շահույթի և վերագնահատման պահուստի գծով արձանագրվել է համապատասխանաբար 14,8% և 29,4% աճ` կանոնադրական կապիտալի (30 մլրդ դրամ) և գլխավոր պահուստի (4.6 մլրդ դրամ) անփոփոխության դեպքում: Բանկի նորմատիվային ընդհանուր կապիտալը 2016 թվականին ավելացել է 5,4%-ով, մինչև 48.4 մլրդ դրամ: 2011 թվականին բանկի կանոնադրական կապիտալն ավելացել է 2 անգամ` դրա համար օգտագործելով կուտակված շահույթի առյուծի բաժինն ու թողարկման եկամուտը:

2016 թվականին բանկն ակտիվներն ավելացրել է 4%-ով, մինչև 283.8 մլրդ դրամ կամ 586.5 մլն դոլար, որոնց կառուցվածքում 175 մլրդ դրամ կենտրոնացվել է վարկային պորտֆելում (ներառյալ լիզինգը), 51.3 մլրդ դրամ` կանխիկ դրամական միջոցներում և ԿԲ թղթակցային հաշիվներում (21,3% տարեկան աճով), շուրջ 26 մլրդ դրամ` պետական պարտատոմսերի պորտֆելում (41% տարեկան աճով):

Բանկի ընդհանուր պարտավորությունները 2016 թվականին ավելացել են 3,6%-ով, մինչև 227 մլրդ դրամ կամ 469.1 մլն դոլար` հաճախորդների ժամկետային և ցպահանջ ավանդների մինչև 136.2 մլրդ դրամ (281.4 մլն դոլար) և ներգրավված փ/ձ վարկերի 4,4%, մինչև 87.8 մլրդ դրամ (181.4 մլն դոլար) համանման աճի հաշվին: Ընդ որում, միջազգային ֆինանսական կառույցներից ներգրավված վարկերի ծավալով «ԱԿԲԱ-Կրեդիտ Ագրիկոլ Բանկն» ամրապնդվել է առաջատար հնգյակում:

Պարտավորությունների համեմատ ակտիվների հոդվածների աճի ավելի բարձր տեմպերի շնորհիվ բանկը կարողացել է հաշվետու տարվա ֆինանսական արդյունքը բացասական 40 մլն դրամից հասցնել դրական 2.2 մլրդ դրամի: Մասնավորապես, բանկի անտոկոս եկամուտներն ավելացել են տարեկան կտրվածքով 26,3%-ով` անտոկոս ծախսերի 10,7% աճի դեպքում: Ընդ որում, դրանց կառուցվածքում միջնորդավճարային եկամուտներն ավելացել են 9%-ով`  միջնորդավճարային ծախսերի 38,5% աճի դեպքում, ծախսերը նույնպես ավելացել են գրեթե միանման` 2-2,3 անգամ, իսկ վարչական ծախսերը կրճատվել են 7,7%-ով: Դրան զուգընթաց արձանագրվել է տոկոսային եկամուտների և ծախսերի տարեկան անկում, համապատասխանաբար` 2% և 9,5%:

2017 թվականի հունվարի 1-ի դրությամբ «ԱԿԲԱ-Կրեդիտ Ագրիկոլ Բանկի» կապիտալի բավարարության նորմատիվը կազմել է 19,21% (N1` պահանջվող min 12% դեպքում), ընդհանուր իրացվելիությանը` 29,42% (N2/1` պահանջվող min 15%), ընթացիկ իրացվելիությանը` 219,75% (N2/2`  պահանջվող min 60% դեպքում): 2016 թվականի հունվարի 1-ին բանկի N1 նորմատիվը կազմում էր 16,55%, N2/1` 28,49%, N2/2` 218,7%:

Հիշեցնենք, որ «ԱԿԲԱ-Կրեդիտ Ագրիկոլ Բանկը» Հայաստանում գործում է 1995 թվականից: 2006 թվականի սեպտեմբերից որպես բանկի մեծամասնական բաժնետեր հանդես է գալիս եվրոպական խոշորագույն Credit Agricole S.A.  բանկային խումբը` կապիտալում 15,56% բաժնեմասով, որին  մասնակցության չափով հետևւոմ է SJSC "Sacam International" բաժնետիրական ընկերությունը (Credit Agricole S.A խմբի անդամ)` 12,44%, սրանցից զատ կապիտալում ներկա են գյուղացիկաան փոխօգնության 10 տարածաշրջանային միություններ: Մասնաճյուղերի ցանցի ընդգրկմամբ և մարզային մասնաճյուղերի թվով բանկն զբաղեցնում է երկրորդ տեղը: Ըստ գյուղատնտեսական վարկերի պորտֆելի «ԱԿԲԱ-Կրեդիտ Ագրիկոլ Բանկն» ավանդաբար առաջատար է. այդ ոլորտում բանկի վարկային պորտֆելին բաժին է ընկնում է շուրջ 40%: Բանկային համակարգի գյուղատնտեսական վարկերի ընդհանուր ծավալում «ԱԿԲԱ-Կրեդիտ Ագրիկոլ Բանկի» բաժինը գերազանցում է 53%-ը: Սակայն բանկը չի սահմանափակվում ագրոհատվածով, ակտիվորեն ֆինանսավորում է ՓՄՁ, արդյունաբերության և առևտրի ոլորտները` համարվելով առաջտատար նաև մանրածախ վարկավորման գծով: