Արմինֆո. ՀՀ տնտեսական զարգացման և ներդրումների նախարար Սուրեն Կարայանը հանդիպել է իռալնդացի գործարար Մայքլ Բյուրքի հետ, ով Հայաստանում գործունեություն է ծավալում դեղագործական ոլորտում:
Ինչպես ԱրմԻնֆո-ին հաղորդել են նախարարության մամուլի ծառայությունից, նախարար Սուրեն Կարայանը գործարարին է ներկայացրել այս ոլորտում հաջողություն գրանցելու հնարավորությունները և հեռանկարները: Նախարարի խոսքով` ոլորտի զարգացման և արտահանման խթանման համար էական նշանակություն ունի Եվրասիական տնտեսական միության տարածքում այս տարվա հունվարի 1-ից գործող դեղերի միասնական շուկան, որը դյուրացրել է դեղերի գրանցման գործընթացը:
Մայքլ Բյուրքը նշել է, որ հետաքրքրված է իրականացելու աշխատանքներ Հայաստանում դեղերի փաթեթավորման ձեռնարկության հիմնման ուղղությամբ:
Նախարար Սուրեն Կարայանը հայտնել է, որ նախարարությունը պատրաստ է աջակցել գործարարին իր աջակցության գործիքակազմով և Հայաստանի զարգացման հիմնադրամում գործող «մեկ պատուհանի» շրջանակներում: Իռլանդացի գործարարի առաջարկով համագործակցություն կհաստատվի Ireland Enterprise և Իռլանդիայի զարգացման գործակալությունների հետ, որոնք կառավարության և ներդրողների ու գործարարների հետ փոխգործակցության հաջողված փորձ ունեն:
Հայաստանի ազգային վիճակագրական ծառայության տվյալների համաձայն, 2016 թվականի հունվար-նոյեմբեր ամիսներին դեղագործական արտադրանքի ծավալը կազմել է 7,1 մլրդ դրամ` 2,2% տարեկան աճով: Մշակման արդյունաբերության կառուցվածքում դեղագործության ճյուղին բաժին է ընկնում 1%-ից էլ պակաս:
RUB | 4.18 | -0.02 |
USD | 390.04 | -1.40 |
EUR | 415.63 | -1.21 |
GBP | 481.74 | -0.75 |
CAD | 284.60 | -0.69 |
JPY | 25.20 | -0.09 |
CNY | 53.82 | -0.22 |
CHF | 427.68 | -1.72 |