Արմինֆո. ԱՄՀ և ՀԲ Ռուսաստանում 2017 թվականին կանպատեսում են 1.5% տնտեսական աճ, բայց դա էական ազդեցություն չի ունենա Հայաստանի տնտեսոթյան վրա: Հունվարի 30-ին կայացած մամուլի ասուլիսում նման կարծիք է հայտնել ՀՀ Կենտրոնական բանկի նախկին նախագահ, ԵՊՀ դոցենտ Բագրատ Ասատրյանը: Նա նշել է, որ Հայաստանի տնտեսությունում էական փոփոխություններ կարելի է ակնկալել միայն Ռուսաստանի ավելի քան 2.5%-3% տնտեսական աճի դեպքում:
Ամփոփելով 2016 թվականի արդյունքները, Բ.Ասատրյանը հայտարարել է, որ տարեկան ցուցանիշները չեն գերազանցի 1%-ը (ըստ նախնական վիճակագրության տնտեսական ակտիվությունն աճել է ընդամենը 0.5%-Խմբ.), ինչն իշխանույթունների աշխատանքի արդյունքն է: «Անցյալ տարվա որոշ դրական միտումներն արձանագրվել են, մասնավորապես, արտահանման և ներմուծման գծով: Ես հույս ունեի, որ 2016 թվականի ապրիլյան և հուլիսյան իրադարձությունները թափ կտան մեր պաշտոնյաներին, բայց ավաղ, տարվա արդյունքներով արձանագրված ցուցանիշները խոսում են այն մասին, որ նրանք այնքան էլ մտահոգված չեն դրանով»,-նկատել է նա:
Որպես օրինակ տնտեսագետը բերել է 2008-2016 թվականներին արձանագրված որոշ ցուցանիշներ (Սերժ Սարգսյանի նախագահության տարիներին): Այսպես, ըստ տնտեսագետի, նշված ժամանակահատվածում Հայաստանի ՀՆԱ նվազել է 11.5%, արտաքին պետական պարտքն աճել է 311%, իսկ աղքատության մակարդակը`26,4%-ից հասել է մինչև 29,8%-ի: Միևնույն ժամանակ, բյուջեի ծախսերը դրամով արտահայտված ավելացել են 166%, իսկ դոլարով`7, 6%, իսկ պետական ապարատի պահպանման ծախսերն աճել են 265%, մինչդեռ կրթության ծախսերն աճել են ընդամենը 123,3%: «Այս թվերը վկայում են, այն մասին, թե իրականում ինչ են իշխանություններն ուզում մեր երկրից: Ցավոք, ես ինձ համար արդեն բացահայտել եմ, որ մեր պաշտոնյաներն ուզում են միայն մեկ բան – սեփական վերարտադրությունը`ցանկացած գնով, մոռանալով, որ հենց իրենք են ստեղծված իրավիճակի հեղինակները: Խոսակցություններ են գնում խելամիտ մոտեցումների կիրառման, մոնոպոլիաների դեմ պայքարի մասին, բայց Հայաստանի տնտեսության ընդհանուր պատկերը մնում է նույնը – օլիգարխիկ համակարգ, որից պաշտոնյաները չեն ուզում հրաժարվել»,-ընդգծել է Ասատրյանը:
Ըստ ՀՀ Ազգային վիճակագրական ծառայության նախնական տվյալների, Հայաստանում տնտեսական ակտիվության աճը 2016 թվականի հունվար-դեկտեմբերին դանդաղել է մինչև 0.5%, 2015-ի նույն ժամանակահատվածի 3.1% աճի համեմատ: 2014-ին այս ցուցանիշը կազմել է 3.9%:
Նշենք, որ Համաշխարհային բանկն իր դեկտեմբերի կանխատեսմամբ վատթարացել է Հայաստանի 2016-ի ՀՆԱ-ի աճի ակնկալիքները, մինչև ստագնացիա (0%, նախկինում կանխատեսումը`3,1%), իսկ հունվարյան կանխատեսումով այն բարելավել է, մինչև 2,4%, 2017-ին արագանալով մինչև 2.7%: ԱՄՀ-ն Հայաստանի ՀՆԱ-ի 2016 թ. աճը կանխատեսում է 3.2%, 2017-ին` 3.4%: ՎԶԵԲ-ը կանխատեսում է Հայաստանի 2016 թ. ՀՆԱ աճը`2%, ԵԱԶԲ -0.6% աճ (նախկին կանխատեսումը`2%), 2017-ին ` 2,9%: Fitch- ը կանխատեսել է 0.8% դանդաղում (նախկին կանխատեսումը`2%), իսկ 2017-ին `2,1%, իսկ 2018 թ-ին`3.1%: Moody's- ը կանխատեսել է 2.2%: ՀՀ Կենտրոնական բանկը ՀՆԱ-ի աճը կանխատեսում է 1.3-1.8%: ՀՀ պետական բյուջեով 2016-ին երկրի ՀՆԱ աճը կկազմի 2,2%, իսկ 2017 թ. - 3,2%: Անկախ տնտեսագետները գտնում են, որ երկիրում 2016-ի աշնանից, ըստ էության, սկսվել է տնտեսական անկում, որը սպառնում է վերածվելու երկարաժամկետ տնտեսական լճացման:
Ինչպես է փոխվել միջին աշխատավարձ ստացող քաղաքացու կենսամակարդակը վերջին տարում
ՊԵԿ կայքում կարելի է գտնել տրանսպորտային միջոցի մասին ամբողջական տեղեկատվություն VIN համարով
ԵԱՏՄ երկրներ ավտոմեքենա վաճառելիս ՊԵԿ-ի տեղեկանքները չեղարկվել են
Հայաստանի տնտեսությունն անառողջ է. տնտեսագետն առաջարկում է առկա խնդիրների լուծման եղանակներ
ԱԶԲ պատվիրակությունն այցելել է Հյուսիս-Հարավ ճանապարհային միջանցքի Սիսիան-Քաջարան հատված