Հինգշաբթի, 16 Փետրվարի 2017 15:38

Արմինֆո. 2017 թվականին Հայաստանում կշարունակվի ինտենսիվ այգիների հիմնադրումը: Այս մասին փետրվարի 16-ին Երևանում կայացած մամուլի ասուլիսում հայտարարել է ՀՀ գյուղատնտեսության նախարար Իգնատի Առաքելյանը:

 

Նրա խոսքով, դա թույլ կտա արտադրել բարձր որակի արտադրանք, համաձայն միջազգային բոլոր ստանդարտների: Ավանդական այգիների արտադրանքը որակով զգալիորեն զիջում է ինտենսիվ այգիների արտադրանքին: Ավելին, ինտենսիվ այգիների բերքը ներկայումս չի արտահանվում, քանի որ մեծ է պահանջարկը ներքին շուկայում: Օրինակ, Ռուսաստանը պահանջում է, որպեսզի Հայաստանը մատակարարի ինտենսիվ այգիների արտադրանքը: Հետևաբար, այդ այգիների արտադրանքի իրացման առումով պրոբլեմներ չեն լինի:

 

Արտահանվում են նաև բարձր տեխնոլոգիական ջերմոցային տնտեսություններում արտադրված լոլիկները: Հիմնական պրոբլեմն այստեղ լոգիստիկան է: Ինչ վերաբերվում է փոքր և միջին ջերմոցային տնտեսություններին, ապա վերջիններիս աջակցում է երկրի կառավարությունը: «Ապրանքներ մատակարարլիս ֆերմերները պետք է հաշվի առնեն սեզոնային գործոնը, վերլուծեն շուկաները: Շատերն են դա անում և գիտեն, թե երբ է պետք շտապել, իսկ երբ`սպասել»,-նշել է նախարարը:

 

Նշենք, որ գյուղատնտեսության ոլորտի ներդրումային ծրագրերի իրականացման հարցերը քննարկվել են փետրվարի 9-ին նախարարի ղեկավարոթյամնբ տեղի ունեցած աշխատանքային խորհրդակցությունում: Նախարարը նշել է, որ 2017-ին կիրականացվեն 120 մլն.դոլարի ծրագրեր: Նա նշել է, որ ներդրումները կուղղվեն սպանդանոցների և պահածոների գործարանի շինարարությանը, տնային ջերմոցային տնտեսությունների ընդլայնմանը, ինտենսիվ այգիների ստեղծմանը, կոնյակի արտադրության արդիականացմանը և այլ ոլորտներին: