Երեթշաբթի, 21 Մարտի 2017 17:15

Արմինֆո.Ամերիաբանկն իր հաճախորդների համար առավել թիրախավորված բանկային պրոդուկտներ առաջարկելու նպատակով հանդես է գալիս տնտեսության որոշակի ճյուղերի աշխատակիցների համար նախատեսված  նոր` հատուկ ծրագրով: Ծրագիրն առաջարկում է տեղեկատվական տեխնոլոգիաների և հեռահաղորդակցություն, արդարադատության, առողջապահության, հաշվապահական հաշվառման, աուդիտի, ապահովագրության և վարկային կազմակերպությունների,  հանքարդյունաբերության և էներգետիկայի ոլորտի աշխատակիցների համար բանկային մի շարք ծառայությունների արտոնյալ պայմաններ:

Այս մասին մարտի 21-ին կայացած մամուլի ասուլիսում հայտարարել է Ամերիաբանկի Տնօրինության անդամ, Մանրածախ գործառնությունների գծով տնօրեն Արման Բարսեղյանը, նշելով, որ ընտրությունը պայմանավորված է այդ ոլորտների դիմացկունությունով տնտեսական ցնցումների պայմաններում, մասնավորապես, ռիսկերին դիմակայելու ունակությունով:

 

Մասնավորապես առաջարկվում են սկսած տարեկան 16%-ից վարկային գիծ կամ օվերդրաֆտ` Ամերիաբանկ փոխանցվող եկամտի մինչև 8-ապատիկի չափով և անգրավ սպառողական վարկեր` Ամերիաբանկ փոխանցվող եկամտի մինչև 12-ապատիկի չափով: Տրամադրվում են նաև այլ վարկեր` Ամերիաբանկում գործող տարեկան տոկոսադրույքից մինչև 1%-ով ցածր տոկոսադրույքով, ինչպես նաև անշարժ գույքի գրավով վարկեր (ներառյալ հիփոթեքային վարկեր)`Ամերիաբանկում գործող պայմանների համեմատ վարկ/գրավ հարաբերակցության մինչև 15% բարձր ցուցանիշով:

 

Փաթեթի ներքո գործում են արտոնյալ սակագներ վճարային քարտերի համար, այդ թվում` ArCa քարտերը կտրամադրվեն անվճար, Visa Electron/Cirrus Maestro` 1,000 ՀՀ դրամ, Visa Classic/MasterCard Standard` 3,000 ՀՀ դրամ, առանց փաթեթի Visa/Mastercard Gold տեսակի քարտը`10,000 ՀՀ դրամ տարեկան սպասարկման վճարով:

 

Բանկային ծառայություններից օգտվելն ավելի հարմարավետ դարձնելու համար նշված ոլորտների աշխատակիցներին կտրամադրվեն անվճար ինտերնետ/մոբայլ բանկինգ և հեռախոսային բանկինգ ծառայությունները:

 

Նշենք, որ Ամերիաբանկն 2016 թվականին պլաստիկ քարտերի թիվն ավելացրել է 10%, 68497-ից մինչև 75154 քարտ: Բանկի կողմից տրամադրվող մանրածախ վարկերի ծավալն ավելացել է 81%, մինչեւ 12.9 մլրդ դրամ: Իսկ մանրածախ վարկավորման ընդհանուր ծավալը 2016-ին աճել է 28,5%, մինչև 57.2 մլրդ դրամ: Ամերիաբանկի ժամկետային ավանդների պորտֆելն աճել է 22%, մինչև 129 մլրդ դրամ:

 

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2016 թվականին Ամերիաբանկի ակտիվներն աճել են 39.2%  մինչև 718.3 մլրդ դրամ կամ $ 1.5 մլրդ, վարկային պորտֆելի 61.4% աճի և պետական պարտատոմսերում կատարված 44.2% ներդրումների հաշվին: Արդյունքում, բանկի վարկավորման ծավալը հասավ 511.6 մլրդ դրամի կամ $ 1.1 մլրդ-ի, իսկ ներդրումները պետական ​​պարտատոմսերում հասան 47.5 մլրդ դրամի կամ $ 98.1 մլն-ի, ընդհանուր կապիտալն աճեց 8.6%, մինչև 64.4 մլրդ դրամ, կամ $ 133,1 մլն, հիմնականում կուտակված շահույթի 23.4% աճի, մինչև 24.3 մլրդ դրամ կամ $ 50.1 մլն: 2016 թվականն Ամերիաբանկը եզրափակել է 6,2 մլրդ դրամ կամ $ 12.8 մլն. զուտ շահույթով, աճը`29.2%: Ամերիաբանկի նորմատիվային ընդհանուր կապիտալը հասել է 81.9 մլրդ դրամի, ինչը գրեթե 3 անգամ գերազանցում է պահանջվող նվազագույն նորմատիվը (30 մլրդ դրամ): Կապիտալի համարժեքության նորմատիվը 2016 թվականի արդյունքներով կազմել է 15.87% (պահանջվող նորմատիվը`12%), իսկ ընդհանուր իրացվելիությունը`31,23% (պահանջվողը`15%), ընթացիկ իրացվելիությունը`133,17% (պահանջվողը`60 %), նախորդ տարվա, համապատասխանաբար, 15.07%, 29.91% և 151.26% փոխարեն:

 

Նշենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: 2017 թվականից Բանկի բաժնետերերն են` Ameria Group CY ՍՊԸ – 65.8%, ՎԶԵԲ - 20,7%, ESPS Holding Limited - 13,5%: