Չորեքշաբթի, 19 Ապրիլի 2017 20:06

Արմինֆո. «Սպայկա» ընկերության ներդրումների ընդհանուր ծավալը, որն զբաղվում է նաև մրգերի ու բանջարեղենի արտահանումով և վաճառքով դեպի Ռուսաստան և Եվրոպա, 2017 թվականին կկազմի 68 մլն.դոլար: Այս մասին ապրիլի 19-ին հայտարարել են ընկերության ներկայացուցիչները Նախագահ Սերժ Սարգսյանի կողմից ընկերության կատարած այցի ընթացքում: Ջերմոցային տնտեսությունում շրջայցից հետո Նախագահը «Գրինհաուզի» վարչական շենքում ծանոթացել է ընկերության ղեկավարության ներկայացրած տարեկան հաշվետվությանը և առաջիկա ծրագրերին:

Ընկերության պատասխանատուները ներկայացրել են, որ 2016թ. դրությամբ «Սպայկա»-ի ուղղակի ներդրումները կազմել են 86 մլն ԱՄՆ դոլար, ընկերությունն ունեցել է 926 մշտական աշխատատեղ, իսկ 2017թ. տարեվերջին ներդրումների ընդհանուր չափը կկազմի 154 մլն ԱՄՆ դոլար, մշտական աշխատատեղերի քանակը կհասցվի 1 316-ի:

Ինչպես լրագրողներին հայտնել է ընկերության ծրագրերի կառավարման բաժնի ղեկավար Կարեն Բաղդասարյանը, 2017 թվականին ջերմոցային համալիրը կընդլայնվի 55 հեկտարով, տարեկան արտադրական հզորությունը կկազմի 25 հազար տոննա, իսկ ինտենսիվ այգիների տարածքը կավելանա 1060 հեկտարով: Ընկերությունը նախատեսում է ջերմոցային տնտեսությունում արտադրել նաև դդմիկ, սմբուկ և պղպեղ:

Նշենք, որ «Սպայկա» ընկերությունն իր գործունեությունն սկսել է 2001 թվականին, որպես միջազգային բեռնափոխադրող: Մինչև 2010 թվականն ընկերությունը տարածաշրջանային մակարդակով առաջատար դիրքեր էր զբաղեցնում բեռնափոխադրումների ծառայությունների ոլորտում: Ընկերության տրանսպորտային պարկը 200 տրանսպորտային միջոցներից: