Հինգշաբթի, 20 Ապրիլի 2017 12:03

Արմինֆո. 2017թ.-ի ապրիլի 20-ին «ԱՄԵՐԻԱԲԱՆԿ» ՓԲԸ-ի անվանական, արժեկտրոնային պարտատոմսերը ցուցակվել և ընդգրկվել են ՆԱՍԴԱՔ ՕԷՄԷՔՍ Արմենիայի պարտատոմսերի հիմնական (Abond) ցուցակում, ինչպես նաև ցուցակման պահից թույլատրվել են նշված պարտատոմսերով հասցեական առևտուրը և ռեպո գործարքների կնքումը:  Ընդհանուր առմամբ, «ԱՄԵՐԻԱԲԱՆԿ»-ն իրականացրել է պարտատոմսերի չորս թողարկում` երեք դոլարային (երկուսը` 15-ական մլն դոլար ծավալի 6,75% և 5,6% արժեկտրոնային եկամտաբերությամբ, մեկը` 5 մլն դոլար ծավալի, 5,75% եկամտաբերությամբ) և մեկ դրամային` 1 մլրդ ծավալի, 10,75% եկամտաբերությամբ:

Ինչպես ԱրմԻնֆո-ին հաղորդեցին բորսայի մամուլի ծառայությունից, «ԱՄԵՐԻԱԲԱՆԿ»-ի երրորդ դոլարային թողարկման պարտատոմսերը (ISIN - AMAMRBB24ER7) բորսայում կշրջանառվեն AMRBB4 բորսայական հապավմամբ: Ընկերության պարտատոմսերի այս թողարկումը ներառում է 150,000 հատ անվանական, արժեկտրոնային պարտատոմս` 100 ԱՄՆ դոլար անվանական արժեքով, արժեկտրոնի 5.6% տոկոսադրույքով և 27 ամիս շրջանառության ժամկետով:

Այդպիսով, ՆԱՍԴԱՔ ՕԷՄԷՔՍ Արմենիա ֆոնդնային բորսայում արդեն գնանշվում են «ԱՄԵՐԻԱԲԱՆԿ»-ի  պարտատոմսերի չորս թողարկում` երեք դոլարային (երկուսը` 15-ական մլն դոլար ծավալի 6,75% և 5,6% արժեկտրոնային եկամտաբերությամբ, մեկը` 5 մլն դոլար ծավալի, 5,75% եկամտաբերությամբ) և մեկ դրամային` 1 մլրդ ծավալի, 10,75% եկամտաբերությամբ:

Ընդհանուր առմամբ, 2017-ի ապրիլի 20-ի դրությամբ ՆԱՍԴԱՔ ՕԷՄԷՔՍ Արմենիա Ֆոնդային բորսայում շրջանառվում են 10 թողարկողների  կորպորատիվ պարտատոմսերի 30 թողարկումներ, որոնցից 17-ն իրականացվել են 6 թողարկող-բանկերի կողմից, ընդ որում, 14-ը` դոլարային թողարկումներ. Արարատբանկի 6 թողարկումները (5-ը` դոլարային), Ամերիաբանկի 4 թողարկումները (3-ը` դոլարային), ԱՐՄՍՎԻՍԲԱՆԿ-ի 3 թողարկումները (բոլորը` դոլարային), Անելիք բանկի, Յունիբանկի և Հայբիզնեսբանկի մեկական դոլարային թողարկումները:

Նշենք նաև,  Ամերիաբանկը սեփական պարտատոմսերի թողարկմանը ձեռնամուխէ եղել 2016 թվականի մարտի վերջին, և մեկնարկային թողարկումը եղել է դոլարային: 2017 թվականի ապրիլի 20-ի դրությամբ բանկն արդեն ունի պարտատոմսերի չորս թողարկում, որոնցից երեքը` դոլարային: Բացի այդ, 2016 թվականի հունիսին Ամերիաբանկն իր ներդրումային կառավարչի` responsAbility Investments AG ընկերության միջոցով հաջողությամբ տեղաբաշխել է  20 մլն դոլար ծավալի պարտատոմսերը Լյուքսեմբուրգի չորս ներդրումային ֆոնդերում, նախատեսելով հավաքված հասույթն ուղղել ՓՄՁ վարկավորմանը և էներգաարդյունավետության ու վերականգնվող էներգիայի նախագծերի ֆինանսավորմանը:

Հիշեցնենք, որ  «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: Բանկի բաժնետիրական կապիտալում 2015 թվականի դեկտեմբերից Վերակառուցման և Զարգացման Եվրոպական Բանկի մասնակցոթյամբ փոփոխվեցին բաժնետերերի մասնաբաժինները, մասնավորապես, Ameria Group CY ՍՊԸ – 65,8%, ՎԶԵԲ - 20,7%, ESPS Holding Limited - 13,5%:

Ըստ ԱրմԻնֆո գործակալության` Հայաստանի Բանկերի Եքսպրես Ռենկինգի, Ամերիաբանկի ընդհանուր կապիտալը 2016 թվականին աճել է 8.6%, մինչև 64,4 մլրդ դրամ կամ $ 133,1 մլն., կուտակված շահույթի է 23.4% աճի հաշվին, մինչև 24,3 մլրդ դրամ կամ $50.1 մլն. ինչպես նաև վերագնահատման պահուստի կտրուկ փոփոխության հաշվին` բացասականից դրական մակարդակ: 2016 թվականը Բանկը եզրափակել է 6,2 մլրդ դրամ կամ $ 12.8 մլն. զուտ շահույթով, ապահովելով 29.2% աճ: Ամերիաբանկի նորմատիվային ընդհանուր կապիտալը 2017 թվականի հունվարի 1-ին կազմել է 81.9 մլրդ դրամ, 3 անգամ գերազանցելով ընդհանուր կապիտալի նորմատիվային պահանջը (30 մլրդ.դրամ): Բանկի կապիտալի համարժեքության նորմատիվը 2016 թվականի արդյունքներով կազմել է 15.87% (նորմատիվը` 12%), իսկ ընդհանուր իրացվելիության նորմատիվը`31,23% (նորմատիվայինը`15%), ընթացիկ իրացվելիության նորմատիվը`133,17% (նոարմատիվայինը`60%), նախորդ տարվա, համապատասխանաբար`15.07%, 29.91% և 151.26% փոխարեն: Բանկն առաջատարն է նաև արդյունաբերական ոլորտի վարկավորման հատվածում (ներառյալ էներգետիկ համալիրը), գյուղատնտեսության, շինարարության, առևտրի, տրանսպորտի և կապի, հանրային սննդի և ծառայությունների, հիփոթեքային վարկավորման ոլորտներում: Բանկն առաջատարն է նաև ժամկետային ավանդների և ցպահանջ ավանդների ծավալներով: