Չորեքշաբթի, 26 Ապրիլի 2017 18:25

Արմինֆո. Տնտեսական մրցակցության պաշտպանության պետական հանձնաժողովը ստացել է բողոքներ տարբեր վաճառակետերում բջջային կապի լիցքավորման քարտերի գնի բարձրացման վերաբերյալ: Խնդրի առնչությամբ մամուլում ևս եղել են մի շարք հրապարակումներ:

Ինչպես ԱրմԻնֆո գործակալությանը տեղեկացվել է ՏՄՊՊՀ մամուլի ծառայությունից, վերոնշյալի հիման վրա Հանձնաժողովը իրականացրել է ուսումնասիրություն, որի ընթացքում տեղեկատվություն է պահանջել բջջային կապի ոլորտում գործող երեք ընկերություններից: Ներկայացված տեղեկատվության վերլուծությունից պարզվում է, որ «Յուքոմ», «ՎիվաՍելլ-ՄՏՍ»  և «ԱրմենՏել» ընկերությունները վերալիցքավորման քարտերի վաճառքը հիմնականում կազմակերպում են միջնորդների միջոցով, որոնք էլ իրենց հերթին վերավաճառում են քարտերը՝ ստանալով որոշակի միջնորդավճարներ:

Բջջային կապի օպերատորները ՏՄՊՊՀ-ին տեղեկացրել են, որ տարեսկզբից նվազեցրել են լիցքավորման քարտերի վերավաճառքով զբաղվողների միջնորդավճարները: Ընկերություններն այս քայլը մեկնաբանում են  իրենց մարքետինգային քաղաքականությամբ, ըստ որի, որոշակի բիզնես ռիսկերով պայմանավորված՝ առաջացել է ծախսերը նվազեցնելու անհրաժեշտություն: Այսպես.  «ՎիվաՍելլ-ՄՏՍ»-ի դեպքում միջնորդավճարի նվազումը կազմում է մոտ 2.5  տոկոս, «Յուքոմի» դեպքում՝  մոտ 3, իսկ «ԱրմենՏելի» պարագայում՝ մոտ 2 տոկոս:

Կարևորելով սպառողների շահը, Հանձնաժողովն առաջին հերթին ուսումնասիրել է, թե օպերատորները ինչ այլընտրանքային տարբերակներ են առաջարկում, որպեսզի  սպառողները կարողանան քարտեր գնել դրանց անվանական արժեքին համապատասխան՝ առանց հավելյալ գումարի: Պարզվել է, որ բոլոր օպերատորների պարագայում կարելի է խնդիրը համարել կարգավորված, քանի որ թե գրասենյակային ցանցի, թե օնլայն տարբերակով և թե վճարային համակարգերի միջոցով հնարավոր է ձեռք բերել լիցքավորման քարտ՝ առանց հավելյալ գումարի՝ 500 դրամ լիցքավորելու դեպքում վճարելով 500, 1000-ի դեպքում՝ 1000 դրամ և այլն:

Ստացվում է, որ խնդիրն առաջացել է վերավաճառողների, այլ կերպ ասած՝ երկրորդային շուկայում, որտեղ գործում են հազարավոր անհատներ և ընկերություններ: Հանձնաժողովում կազմակերպված քննարկումների ընթացքում բջջային կապի օպերատորները պատրաստակամություն են հայտնել հնարավորության սահմաններում վերահսկելու դաշտը և անգամ խզելու պայմանագրերը այն միջնորդների հետ, ովքեր քարտերը կվերավաճառեն անվանական արժեքից բարձր գնով:  Նիստում ներկայացվեց նաև, որ ուսումնասիրվել է, թե որքանով է սպառողների համար հասանելի այլընտրանքային լիցքավորման տարբերակները, որպեսզի սպառողները զերծ մնան հավելյալ գումար վճարելուց: Հանձնաժողովը ամրագրել է, որ հանրապետության ողջ տարածքում գործում են բջջային կապի օպերատորների տասնյակ գրասենյակներ, բացի այդ հասանելի են առցանց վճարման համակարգերն ու տերմինալները, որոնց միջոցով այս ծառայության համար լրացուցիչ գումար, այլ կերպ ասած՝ միջնորդավճար չի գանձվում:

Հանձնաժողովի նախագահ Ա. Շաբոյանը  օպերատորներին հորդորեց  լինել առավել հետևողական՝ խնդրի վերջնական կարգավորման հարցում և հնարավորինս կանխել իրենց ծառայությունների գնի բարձրացումը՝ երկրորդային շուկայում : 

ՏՄՊՊՀ-ի որոշմամբ «Յումակս» (DHL) ընկերությանը տրվեց նախազգուշացում՝ խախտումը վերացնելու հանձնարարականով: Այսօր կայացած ՏՄՊՊՀ նիստում կայացվեց նաև որոշում՝ մրցակցային օրենսդրության խախտման համար  կիրառել նախազգուշացում՝ «Յումակս» ընկերության հանդեպ: 

Հիշեցնենք, որ Հանձնաժողովին էին  դիմել մի քանի տասնյակ մաքսային բրոքերներ, ինչպես նաև խոշոր տնտեսվարողներ՝ («Զիգզագ», «Վորլդ Վիժն», «Յուքոմ», «Արարատ գինու կոնյակի գործարան», «Ռուսալ  Արմենալ» և այլն), որոնք  բողոքում էին մեր երկրում միջազգային փոստային առաքումներ և բեռնափոխադրումներ իրականացնող DHL ընկերության հայաստանյան ներկայացուցիչ «Յումակս» ՍՊԸ-ի գործունեությունից:  Խնդիրն այն է, որ  «Յումակս» ընկերությունը տեղեկացրել էր, որ DHL–ի ցանցով ներմուծված բեռների մաքսային ձևակերպումները իրականացվելու են բացառապես իրենց կողմից: Հակառակ դեպքում, մաքսային ձևակերպումներից հրաժարվող բոլոր ընկերությունների և ֆիզիկական անձանց բեռները ետ կուղարկվեն: Ուսումնասիրության ընթացքում Հանձնաժողովը պարզել է, որ Հայաստան ուղարկվող բեռների և փոստային առաքումների բավականին մեծ մասը բերվում է հենց DHL ընկերության միջոցով, հետևապես վերջինիս նման վարքագիծը սահմանափակում է դաշտում մրցակցությունը՝ բացասաբար անդրադառնալով բրոքերների հետագա գործունեության վրա:

Մրցակցային օրենսդրության  խախտման փաստով, «Յումակս» (DHL) ընկերությանը տրվել է նախազգուշացում՝ կարճ ժամկետում խախտումը և սահմանափակումները վերացնելու հանձնարարականով: Տեղեկացնենք, որ արդեն իսկ վարույթի ընթացքում ընկերությունը կատարել է ՏՄՊՊՀ պահանջը, հայտարարության միջոցով տեղեկացնելով, որ բոլորը սահմանափակումներն արդեն իսկ վերացված են և ընկերությունը պատրաստ է աշխատելու նախկին սկզբունքով: Հայտարարությունը տեղադրել է նաև ընկերության  պաշտոնական կայքում: