Հայաստանի ջրամբարներում ջրի մակարդակը նվազել է 9%-ով, ողջ հույսը նոր ծրագրի իրագործումն է

Արմինֆո. Չնայած այն հանգամանքին, որ Հայաստանի ջրամբարներում ջրի մակարդակը նվազել է 9%-ով (մինչև 570 մլն խմ), ոչ մի ֆերմեր ջրի պակաս չի զգա: Մամուլի ասուլիսում այդ մասին հայտարարել է Հայաստանի ջրային տնտեսության պետական կոմիտեի ղեկավար Արսեն Հարությունյանը: Նա ընդսմին հավելել է, որ երկրում ընդունվել է ջրամբարների կառուցման ծավալուն ծրագիր, որոնք արմատապես կփոխեն ոռոգման ջրով համայնքների ապահովմանն առնչվող իրավիճակը:

ԱրմԻնֆո-ի տվյալներով, Հայաստանում  իրագործվում են Վեդիի, Կապսի, Եղվարդի և Մաստարայի ջրամբարների կառուցման նախագծեր: Վեդիի ջրամբարի պատվարի և օժանդակ շինությունների կառուցման մանրամասն նախագիծն արդնե պատրաստ է, իսկ շինարարությունն սկսելու համար անհրաժեշտ փաստաթղթերի նախապատրաստման աշխատանքներն արդեն ավարտվել են: Նախատեսվում է կառուցել 85 մ բարձրությամբ, 29 մլն խմ տարողությամբ պատվար, ինչի արդյունքում կհաջողվի ոռոգել մոտ 3,2 հազար հա տարածք: Շինարարական աշխատանքները կտևեն շուրջ 4 տարի:

Ինչ վերաբերչում է Կապսի ջրամբարի կառուցման գործընթացին, որի աշխատանքները դադարեցվել էին 1994 թվականին, ապա առաջին փուլում շինարարության ներդրումային ծախսերը (55 մ պատվար 25 մլն խմ ջրի շավալով) գնահատվում են 60 մլն եվրո: Առաջին փուլի արդյունքում նախատեսվում է ապահովել 12,3 հազար հա տարածքի ոռոգում, իսկ երկրորդ փուլի արդյունքում` (գնահատվում է 70 մլն եվրո)` 2,2 հազար: Շինարարությունն սկսելու համար անհրաժեշտ փաստաթղթերի նախապատարաստումը կավարտվի 2017 թվականի երկրորդ կեսին: Ընդհանուր առմամբ,  շինարարական աշխատանքները կտևեն 4 տարի:

Նախատեսվում է նաև մշակել Եղվարդի ջրամբարի վերակառուցման նոր տարբերակ` 90 մլն խմ տարողությամբ, որի հիմնական աղբյուրը կլինի Հրազդան գետը: Ջրամբարի վերակառուցումը թույլ կտա ապահովել 12,2 հազար հա տարածքի հուսալի ոռոգում, ինչպես նաև մեխանիկական ոռոգումը կփոխարինվի ինքնահոսի, ինչը թույլ կտա տարեկան տնտեսել 28,6 մլն կվտ/ժ էլեկտրաէներգիա: Ջրամբարի շինարարական աշխատանքները կսկսվեն 2018 թվականին և կշարունակվեն 5 տարի:

Ջրամբար է նախատեսվում կառուցել նաև Մաստարայում` 10,2 մլն խմ տարողությամբ: Այն թույլ կտա ապահովել 3,7 հազար հա տարածքի հուսալի ոռոգում, մեխանիկական ոռոգումը կփոխարինվի ինքնահոսով, ինչի արդյունքում տարեկան հնարավոր կլինի տնտեսել շուրջ 2,1 մլն կվտ/ժ էլեկտրաէներգիա: Վերջերս Վերակառուցման և զարգացման բանկը 26 մլն դոլար է տրամադրել այդ նախագծի իրագործման համար: