Հինգշաբթի, 25 Մայիսի 2017 14:21

Արմինֆո. Իշխանությունների գլխավոր խնդիրը Հայաստանում ստվերային շրջանառության կրճատումն է, մամուլի ասուլիսի ժամանակ հայտարարել է ԱԺ ֆինանսաբյուջետային հարցերի մշտական հանձնաժողովի ղեկավար Գագիկ Մինասյանը:

Նա նշել է, որ այս տարի Հայաստանը տնտեսական աճ է արձանագրել, ինչն անդրադարձել է գրեթե բոլոր ոլորտների վրա, իսկ դա առաջին հերթին կհանգեցնի պետեկամուտների ավելացման: Մինասյանի կարծիքով, տվյալ պահին հատկապես ակտիվ է զարգանում շինարարության ոլորտը:  «Կարծում եմ՝ շուտով Հայաստանում ֆինանսական նոր հնարավորություններ կհայտնվեն»,- նշել է Մինասյանը: 

Նա նաև հայտարարել է, որ շատ կարևոր է ներդրումների ներգրավման հարցը: Խնդիրները, Մինասյանի կարծիքով, կապված են այն բանի հետ, որ ներդրողը հաշվի է առնում երկրի տնտեսության բոլոր մինուսները և պլյուսները: «Մեր դեպքում մինուսներ են՝ չհայտարարված պատերազմը և Հայաստանի սահմանների փաստացի շրջափակումը: Սակայն, մոտ ժամանակներս  կընդունվեն օրենքներ, որոնք կխթանեն բիզնեսի զարգացումը Հայաստանում, գործարարների համար որոշակի արտոնություններ կսահմանվեն, ինչն իր հերթին գրավիչ գործարար միջավայր կստեղծի ներդրումների համար: Հայաստանի համար մինուսներից մեկը ոչ մեծ ներքին շուկան է, հետևաբար՝ պետք է ավելի շատ աշխատել և զարգացնել արտաքին շուկան»,- նշել է պատգամավորը: