Ուրբաթ, 2 Հունիսի 2017 19:28

Արմինֆո. Հայաստանի բանկային համակարգի վարկային պորտֆելում 2017 մայիսին  առյուծի բաժինը կազմում է արտարժութային բաղադրիչը` 63% կամ 1.447 տրլն դրամ,  տարեկան կտրվածքով ավելանալով 9.6%` չհաշված երկարաձգված և ժամկետանց վարկերը: Իսկ դրամային վարկավորմանը բաժին է ընկնում 37% կամ 850.6 մլրդ դրամ` 27.8%  տարեկան աճով: 

Ըստ Կենտրոնական բանկի տվյալների, որոնք ԱրմԻնֆո-ին տրամադրել է  ՀՀ ազգային վիճակագրական ծառայությունը, 2017 թվականի մայիսին բանկային վարկավորման ընդհանուր ծավալն աճել է տարեկան 14.2%-ով` հասնելով 2.449 տրլն դրամի: Իսկ չհաշված երկարաձգված և ժամկետանց վարկերը` Հայաստանի բանկային համակարգի վարկային ներդրումներն ավելացել են տարեկան կտրվածքով 15.7%-ով` կազմելով 2.298 տրլն դրամ:

Երկարաձգված և ժամկետանց վարկերի բաժինը 2017 թ. մայիսին կազմել է, համապատասխանաբար, 4.74% (նախորդ տարվա 5.19% դիմաց) եւ 1.41% (նախորդ տարվա 2.16% դիմաց):  Տարեկան կտրվածքով Հայաստանի բանկերի ժամկետանց վարկերի ծավալը նվազել է 25.5% -ով` մինչև 34,5 մլրդ դրամ, իսկ երկարաձգված վարկերինը աճել է 4,4%-ով` մինչև 116.2 մլրդդրամ:

Ըստ վիճակագրական տվյալների, դրամային վարկերի միջին տոկոսադրույքը 2017թ. մայիսին ձևավորվել է 15.18% մակարդակում (նախորդ տարվա 17.94% դիմաց): 28.04.17 դրությամբ դոլարի նկատմամբ  դրամի հաշվարկային փոխարժեքը կազմել է 484,68 դրամ/1դոլար: