Հունիսի 16-ին լրանում է «Մասրիկ» արևային էլեկտրակայանի կառուցման նախաորակավորման մրցույթին մասնակցության հայտերի ընդունման ժամկետը

Արմինֆո.Հունիսի 16-ին լրանում է «Մասրիկ» արևային էլեկտրակայանի կառուցման նախաորակավորման մրցույթին մասնակցության հայտերի ընդունման ժամկետը: Այդ մասին ԱրմԻնֆո-ի թղթակցին հարցազրույցում հայտնել է ՀՀ էներգետիկ ենթակառուցվածքների և բնական պաշարների նախարարության Էներգետիկայի վարչության պետ Հայկ Բադալյանը:

Նրա խոսքով, Հայաստանում առաջին արդյունաբերական նշանակության արևային էլեկտրակայանի սահմանված հզորությունը կկազմի 55 ՄՎտ: Սակայն, կայանի դիզայնից և տեխնոլոգիաներից կախված՝ բացառված չէ, որ կայանի հզորությունն ավելի մեծ կլինի: Ներկայումս, շարունակել է Հայկ Բադալյանը, մրցույթին մասնակցության հայտ է ներկայացրել աշխարհի տարբեր երկրների շուրջ 50 ընկերություն: «Նախագծի նկատմամբ հետաքրքրությունը մեծ է: Նախատեսվում է, որ մինչև 2018 թ. մարտը մրցույթն ամբողջովին կավարտվի, իսկ 2018 թ. վերջին Հայաստանը կունենա նման հզորության առաջին արևային էլեկտրակայանը»,- նշել է վարչության պետը՝ ավելացնելով, որ մինչև 2020 թվականը նախատեսվում է կառուցել 110 ՄՎտ ընդհանուր սահմանված հզորությամբ արդյունաբերական նշանակության արևային էլեկտրակայաններ:

Ավելի վաղ ԱրմԻնֆո-ի թղթակցի հետ զրույցում ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը հայտնել էր, որ ապրիլի 28-ին Հայաստանում մեկնարկել է 55 ՄՎտ հզորությամբ «Մասրիկ» արևային էլեկտրակայանի կառուցման միջազգային հայտամրցույթ: ՀՀ կառավարության հավանությանն արժանացած արևային ֆոտովոլտային կայանների կառուցման ներդրումային ծրագրի համաձայն, նախատեսվում է Հայաստանի վեց տեղամասերում կառուցել մինչև 110 մեգավատ հզորությամբ արդյունաբերական մասշտաբի կայաններ: Ծրագրի ներդրումային ընդհանուր արժեքը գնահատվում է շուրջ 129 մլն դոլար։ Կայանների կառուցման համար ընտրված վեց տեղանքներից երկուսի համար իսպանական «Արիես Ինժեներիաե խորհրդատվական ընկերությունն արդեն իրականացրել և ներկայացրել է տեխնիկատնտեսական հիմնավորումները։ Դրանք վերաբերում են Գեղարքունիքի և Արագածոտնի մարզերի վարչական սահմաններում գտնվող «Մասրիկ» և «Դաշտադեմ» տեղանքներին։ Աշխատանքները մյուս չորս տեղանքների տեխնիկատնտեսական հիմնավորումների վերաբերյալ շարունակվում են: Մրցույթի հիմնական պայմաններից մեկը լինելու է առաջարկվող սակագինը։ Առավելությունը տրվելու է նվազագույն սակագնային առաջարկությանը։

Այլընտրանքային էներգետիկայի զարգացման կլիմայական ներդրումային հիմնադրամը Հայաստանին տրամադրել է 28 մլն.դոլար, որից 2 մլն.դոլարը կլինի դրամաշնորհի, իսկ 26 մլն.դոլարը` վարկի տեսքով: Վարկի պայմանները շատ ձեռնտու են՝ տարեկան 0.25%, 40 տարի մարման ժամկետով և առաջին 20 տարիների համար արտոնյալ ժամանակահատվածով: Դրամաշնորհային միջոցներով կկատարվեն տեղի հետազոտման աշխատանքները, ինչպես նաև նախագծի տեխնիկա-տնտեսական հիմնավորման մշակումը, որը նախատեսվում է 100-120 մեգավատ հզորությամբ կայանի համար: