Արմինֆո. Հայաստանի պարտատոմսերի շուկան բավականին լավ է կազմակերպված, իսկ ռեգուլյատորների կողմից ձևավորված միջավայրը նպաստում է ներդրողների ներգրավմանը: Հունիսի 29-ին ԱրմԻնֆո գործակալությանը նման կարծիք է հայտնել Առևտրի և զարգացման սևծովյան բանկի (BSTDB) գլխավոր գանձապես Քրիստոֆեր Բեստը, BSTDB առաջին դրամային թողարկման տեղաբաշխմանը նվիրված մամուլի ասուլիսում, որի անդերրայթերը և մարկետ-մեյքերներն են Արարատբանկը և Future Capital Market ներդրումային ընկերությունը:
Նա նշել է, որ հայաստանյան շուկայում BSTDB այս նախաձեռնության հաջող փորձի շրջանակներում չի բացառվում նաև երկրորդ`դրամային թողարկումը: Բեստն ընդգծել է, որ Արարատբանկի ընտրությունը պատահական չէր: «Նապապես մենք հանդիպումներ ունեցան մի քանի հայկական բանկերի հետ և ընտրեցինք այն բանկին, որը մեզ ավելի ընդունելի էր սակագների և առաջարկվող ծառայությունների առումով: Պետք է նշեմ, որ ուրախ ենք համագործակցել հենց Արարատբանկի հետ, քանի որ այն, իրոք, իրեն դրսևորեց որպես արժեքավոր գործընկեր»: Նա չի բացառել նաև, որ հաջորդ թողարկման ընթացքում նույնպես անդերրայթերը կարող է լինել Արարատբանկը:
Ինչպես նշել է Բեստը, BSTDB համագործակցության համար բաց է նաև Հայաստանի մյուս բանկերի հետ: Նա հիշեցրել է, որ Սևծովյան բանկը վարկային ծրագրերի շրջանակներում հակագործակցում է 6-7 հայկական բանկերի հետ, որոնց թվում են`Արդշինբանկը, Ամերիաբանկը, ԱԿԲԱ Կրեդիտ Ագրիկոլ Բանկը:
Մամուլի ասուլիսի ընթացքում Արարատբանկի գործադիր տնօրեն Աշոտ Օսիպյանը նշել է, որ տեղաբաշխման արդյունքում հավաքված միջոցները թողարկողի ցանկությամբ կուղղվեն Հայաստանի հիփոթեքային շուկայի զարգացմանը, ինչը կնպաստի շինարարության հատվածի զարգացմանը: Նա հաղորդել է, որ Բանկի դրամային պարտատոմսերի տեղաբաշխումը ֆոնդային բորսայում եղել է հրապարակային, իսկ մասնակիցների թիվը հասել է 16-ի:
Հիշեցնենք, որ 2017 թվականի հունիսի 27-ին ՆԱՍԴԱՔ ՕԷՄԷՔՍ Արմենիայում տեղի էր ունեցել Սևծովյան Առևտրի և Զարգացման Բանկի (BSTDB) ՀՀ դրամով արտահայտված անվանական արժեկտրոնային պարտատոմսերի (BSTBB1) տեղաբաշխումը: Տեղաբաշխվել է 2 մլրդ.դրամ ծավալով արժեկտրոնային պարտատոմսերը: Ազգային հիփոթեքային ընկերության կողմից նախորդ տարի իրականացված 2.127 մլրդ.դրամ ծավալով բոնդերի տեղաբաշխումից հետո սա իր ծավալներով երկրորդ դրամային տեղաբաշխումն է: Տեղաբաշխման ընթացքում պահանջարկը գերազանցել էր առաջարկը, կազմելով 2,691,574,896.50 ՀՀ դրամ: Թողարկումն ամբողջությամբ տեղաբաշխվել է, ինչի արդյունքում բանկին հաջողվել է ներգրավել 2,005,573,856.5 ՀՀ դրամ: Տեղաբաշխված պարտատոմսերի կտրման գինը կազմել 10,000.13 ՀՀ դրամ, կտրման եկամտաբերությունը` 8.4545%, իսկ միջին կշռված եկամտաբերությունը` 8.3481%: Ըստ աղբյուրի, այս թողարկումը (ISIN - AMBSTBB21ER4) պարունակում էր 200 հազար պարտատոմս, 10,000 ՀՀ դրամ անվանական արժեքով, 8.455% արժեկտրոնի տոկոսադրույքով և 3 տարի շրջանառության ժամկետով:
Ըստ վերջին տվյալների, 3 տարի շրջանառության ժամկետով պարտատոմսերի միջին կշռված եկամատաբերությունը կազմում է 8.2273%, իսկ մեկ տարուց ավելի շրջանառության ժամկետով դրամային ավանդների տոկոսադրույքը`11.7%:
Նշենք, որ այսօր ՆԱՍԴԱՔ ՕԷՄԷՔՍ Արմենիա բորսայում շրջանառվում է 9 թողարկողների դրամային 12 թողարկումները, ընդ որում, 5 դրամային թողարկողները բանկեր են:-կ-