Հինգշաբթի, 6 Հուլիսի 2017 16:30

Արմինֆո. Հայաստանի տնտեսական ներուժը պետք է կենտրոնացնել արտահանման վրա, իսկ արտահանման մասնաբաժինը ՀՆԱ-ում 4-5 տարի անց նախատեսվում է ներկայիս 33%-ից ավելացնել մինչև 42-43%, հուլիսի 4-ին Երևանում կայացած Fitch Rating գործակալության համաժողովի շրջանակներում այդպիսի կարծիք է հայտնել ՀՀ տնտեսական զարգացման և ներդրումների նախարարի տեղակալ Տիգրան Խաչատրյանը: Փոխնախարարը նշել է, որ կառավարության ծրագրերի համաձայն՝ տնտեական աճի հիմնական դրայվերն առաջիկա 3-4 տարում ապրանքների և ծառայությունների արտահանումը կլինի:

 

Նրա խոսքով, այդ նշագծին հասնելու համար անհրաժեշտ է օրենսդրորեն բարեփոխել արտահանման կողմնորոշում ունեցող սուբյեկտների գործունեոթւյան դաշտ: Բացի այդ, հարկավոր է օգտվել ԵԱՏՄ շուկաներ հայկական արտադրանքի առաջմղման մեծ ներուժից, որտեղ Հայաստանի կողմից օգտագործվող հնարավորությունները դեռևս ցածր մակարդակի վրա են: «Այլ կերպ ասած՝ առաջիկա տարիներին մենք պետք է ձգտենք, որպեսզի հայկական ապրանքներն ու ծառայությունները ներկայացված լինեն ԵԱՏՄ շուկաներում  ավելի տպավորիչ ծավալներով, առավել ևս, որ եվրասիական տարածությունում հաստատված արտոնյալ ռեժիմը նպաստում է դրան»,- ընդգծել է Տ. Խաչատրյանը; 

 

Օտարերկրյա ներդրումների հետ կապված ծրագրերի առնչությամբ նա չի բացառել, որ 2017 թ. վերջին դրանց մասնաբաժինը ՀՆԱ-ում կարող է հասնել 5%-ի, և հաջորդ տարիներին այդ ցուցանիշը պետք է Հայաստանի մակրոտնտեսական իրականության մասը դառնա:

 

Տ. Խաչատրյանը նշել է նաև, որ ծառայությունների ոլորտում գերակայություն է  մնում զբոսաշրջությունը: «Ընթացիկ տարվա առաջին կիսամյակի արդյունքների համաձայն՝ Հայաստան այցելած զբոսաշրջիկների տարեկան աճ կարող է ապահովվել 30% մակարդակի վրա, իսկ առաջիկա 4-5 տարում ակնկալում ենք հասնել 3-5 մլն մարդ նշագծին»,- ասել է նա: 

 

Իսկ  արդյունաբերական հատվածում մեծ ներուժ է բխում թեթև արդյունաբերությունից, այնպիսի ենթաճյուղերից, ինչպես՝ տեքստիլ արտադրությունը և կաշվի արտադրությունը:    

 

ՀՀ Ազգային վիճակագրական ծառայության տվյալներով, տնտեսական ակտիվությունը 2017 թ. հունվար-մայիսին ավելացել է 6,4%-ով՝ արտահանման 20,9% և ներմուծման 24,4% աճի պայմաններում: Ընթացիկ տարվա մայիսին 2016 մայիսի համեմատ տնտեսական ակտիվությունն ավելացել է 8,9%-ով՝ արտահանման 38,7% և ներմուծման 61,7% աճի դեպքում: Մեկ տարի առաջ՝

2016 թվականի հունվար-մայիսին, տնտեսական ակտիվությունը Հայաստանում տարեկան կտրվածքով աճել է 5.5%, այդ թվում, արտահանումն աճել է 20.1% և ներմուծումը՝ 0,9%: 

 

ՀՀ զբոսաշրջության պետական կոմիտեի տվյալներով՝ Հայաստանի զբոսաշրջության հատվածը 2016 թվականը փակել է 5,7% աճով: Տարվա ընթացքում հանրապետություն այցելել է 2.867 մլն օտարերկրյա քաղաքացի, որոնցից 1.259 մլն` զբոսաշրջության նպատակով: