Երկուշաբթի, 7 Օգոստոսի 2017 16:41

Արմինֆո. Հայաստանից Վրաստան տուրիստական հոսքը 2017 թ. հուլիսին աճել է 25,4%-ով: «Business Վրաստան» թերթի համաձայն՝ այս տարվա հուլիսին դիտվել է Ադրբեջանից Վրաստան մեկնողների թվի զգալի աճ, անցած ամիս Ադրբեջանից Վրաստան է մեկնել 13,8%-ով ավելի շատ զբոսաշրջիկ, քան 2016 թ. հուլիսին: Ռուսաստանից զբոսաշրջիկների հոսքն ավելացել է 60,4%-ով, Հայաստանից՝ 25,4%-ով, Թուրքիայից՝ 0,6%, Իրանից՝ 85,8%-ով:

Ընդհանուր առմամբ հուլիսին Վրաստանն ընդունել է 982 487 օտարերկրյա զբոսաշրջիկ, ինչն 28,5%-ով ավելի է անցած տարվա նույն ժամանակաշրջանի համեմատ:

Համեմատության համար նշենք, որ ընթացիկ տարվա առաջին կիսամյակում օտարերկրյա քաղաքացիների Հայաստան կատարած այցելությունների թիվը գերազանցել է 1.3 միլիոնը, տարեկան աճը`24.3%: Հայաստան կատարած այցելությունների թվով առաջին եռյակում են Ռուսաստանը, Վրաստանը և Իրանը: Հաշվետու ժամանակահատվածում ռուսաստանցիների այցելությունների թիվն աճել է 33,7%, մինչև 241 հազար: Երկրորդ տեղում է Վրաստանը` 151 հազար, տարեկան աճը`11%: Եռյակը եզրափակում է Իրանը`89.8 հազարի, տարեկան աճը`27.4%: