Երեթշաբթի, 8 Օգոստոսի 2017 11:35

Արմինֆո. Հայաստանն ու Ռուսաստանը որոշակի քայլեր կձեռնարկեն հայկական շուկա ալմաստի հումքի մատակարարումների ծավալն ավելացնելու ուղղությամբ: Նախօրեին Մոսկվայում համապատասխան պայմանավորվածություն է ձեռք բերվել ՌԴ ֆինանսնեիր փոխնախարար Ալեքսեյ Մոիսեևի հետ Հայաստանի պատվիրակության հանդիպման ընթացքում, որի կազմում էին Ռուսաստանի Դաշնությունում Հայաստանի Հանրապետության արտակարգ և լիազոր դեսպան Վարդան Տողանյանը, տնտեսական զարգացման և ներդրումների նախարարի խորհրդական Գագիկ Մկրտչյանը և ՌԴ-ում ՀՀ առևտրական ներկայացուցիչ Կարեն Ասոյանը:

Ինչպես ԱրմԻնֆո-ին հաղորդեցին ՀՀ տնտեսական զարգացման և ներդրումների նախարարության մամուլի ծառայությունից, հանդիպման ընթացքում քննարկվել են ոսկեգործության և ադամանդագործության ոլորտում Հայաստանի և Ռուսաստանի միջև համագործակցության ընդլայնման հնարավորությունները։ Կողմերը քննարկել են, մասնավորապես, ալմաստի հումքի մատակարարումների արդյունավետության բարձրացման խնդիրը՝ ինչպե՛ս «Ալռոսայից», այնպե՛ս էլ  «Գոխրանից»։ Հայկական պատվիրակության անդամները ՌԴ ֆինանսների փոխնախարարի ղեկավարած խմբի հետ զրույցում անդրադարձել են նաև պետական հարգադրոշման և հարգորոշման փոխադարձ ճանաչման հարցերին։

Կողմերը քննարկել են խնդիրների լուծման նորարական մոտեցումների և նոր մեխանիզմների կիրառումը։ Պայմանավորվածություն է ձեռք բերվել հնարավորինս սեղմ ժամկետներում անցնել գործնական քայլերի։ Տնտեսական զարգացման և ներդրումների նախարարի խորհրդական Գագիկ Մկրտչյանի խոսքով՝ այդ պայմանավորվածությունների իրականացումը կապահովի ոլորտի աճի շարունակականությունը։

Հիշեցնենք, որ 2016 թվականի մայիսի 25-ին ՌԴ Դաշնության խորհուրդը վավերացրել էր Հայաստանի հետ համաձայնագրին կից արձանագրությունը, որով փաստաթղթի կարգավորման ոլորտից հանվել են ամշակ բնական ալմաստները, քանի որ 2014 թվականի մայիսին Հայաստանը միացել է ԵԱՏՄ պայմանագրին: Փաստաթղթով ամրագրվում է Ռուսաստանից առանց մաքսատուրքի մատակարարվող նավթամթերքի և գազի վերջնական ցանկը:

Ազգային վիճակագրական ծառայության տվյալների համաձայն, 2016 թվականին  Հայաստանում ադամանդների արտադրության ծավալն ավելացել է 54,2%-ով և կազմել  տարեկան 125431 կարատ` 2015 թվականի 81346 կարատի դիմաց: Ընդ որում, թանկարժեք և կիսաթանկարժեք քարերի, թանկարժեք մետաղների և դրանցից պատրաստված իրերի արտահանումը 2016 թվականի արդյունքների համաձայն կազմել է 337,3 մլն դոլար, իսկ ներմուծումը` 161,5 մլն դոլար (36,8% աճ):