Չորեքշաբթի, 20 Սեպտեմբերի 2017 17:35

Արմինֆո. ՀՀ տարածքային կառավարման և զարգացման նախարար Դավիթ Լոքյանը սեպտեմբերի 20-ին  ընդունել է Զարգացման գերմանական բանկի (KFW) Վանաձորի կոշտ կենցաղային թափոնների ծրագրի ղեկավար Ալերո Ագբոգհորոմային, ծրագրի ավագ տեխնիկական պատասխանատու Բերնհարդ Շենքին, Բանկի հայաստանյան ներկայացուցիչ Զառա Չատինյանին:

Դավիթ Լոքյանը բարձր է գնահատել նախարարության և Բանկի միջև առկա համագործակցությունը կոշտ կենցաղային թափոնների ծրագրի շրջանակներում: Հանդիպմանը կողմերն անդրադարձել են  Վանաձորի կոշտ կենցաղային թափոնների ծրագրի նախնական փուլում ի հայտ եկած խնդիրներին, մասնավորապես՝ աղբավայրի տեղադիրքի և աղբահանության հետագա  համակարգի կառավարման  հետ կապված հարցերին: Զրուցակիցները քննարկել են նաև  տեխնիկական և կազմակերպչական այլ հարցեր, ուրվագծել  հետագա քայլերը:  Նախարար Լոքյանը  սպառիչ պատասխաններ է տվել հյուրերին ծրագրի  ընթացքի մասին, ներկայացրել աղբահանության համակարգի ներկա իրավիճակը և  օրենսդրական դաշտը, այդ թվում նախատեսվող բարեփոխումները: 

Հիշեցնենք,  որ Վանաձորի կոշտ կենցաղային թափոնների ծրագիրն իրականացվում է հայ-գերմանական ֆինանսական համագործակցության շրջանակում՝ KFW Զարգացման բանկի կողմից տրամադրված աջակցության միջոցով, և  ընդգրկում է թափոնների կառավարման` այդ թվում փողոցների սանիտարական մաքրման, աղբահանության, թափոնների օգտահանման, փոխաբեռնման, տեղափոխման և տեղադրման ենթակառուցվածքների և ծառայությունների որակական զգալի փոփոխություններին ուղղված միջոցառումներ: Ծրագիրն ունի ապակենտրոնացված բնույթ. այն ընդգրկում է Լոռու մարզը և  հարևանությամբ գտնվող Տավուշի մարզի Դիլիջան քաղաքը: