«Ագապե» ընկերությունը մտադիր է նավթի և բնական գազի երկրաբանական ուսումնասիրություն իրակաանցնել Հայաստանում

Արմինֆո. ՀՀ բնապահպանության նախարար Արծվիկ Մինասյանը հանդիպել է «Ագապե» ՍՊԸ-ի հիմնադիր և գործադիր տնօրեն Գրեմ Ջոնսոնին և ֆինանսական տնօրեն Քրիստինե Վարդանյանին`  վերջիններիս խնդրանքով: Ինչպես ԱրմԻնֆո-ին հաղորդեցին նախարարության մամու լի ծառայությունից, Գրեմ Ջոնսոնը տեղեկացնել է, որ ընկերությունը հետաքրքրված է Հայաստանի տարածքում նավթի և գազի արդյունահանման հեռանկարով և ներկայացրել իրենց առաջիկա նկատառումները:

Ընկերությունը նախատեսել էր  ՀՀ  Վայոց ձորի  և Սյունիքի մարզերում իրականացնել նավթի և բնական գազի երկրաբանական ուսումնասիրություն` սեյսմավիբրատորների օգնությամբ և «Շրջակա միջավայրի վրա ազդեցության փորձաքննական կենտրոն» ՊՈԱԿ է ներկայացրել համապատասխան հայտեր: ՀՀ Սյունիքի մարզում ուսումնասիրություն իրականացնելու հայտը մերժվել է փաստաթղթերի ոչ լիարժեք լինելու պատճառով, իսկ ՀՀ 5-րդ պայմանական տարածքի / ՀՀ Վայոց ձոր/ նախնական գնահատման հայտի վերաբերյալ նշանակվել է հանրային քննարկում ՀՀ Վայոց ձորի մարզպետարանում, հոկտեմբերի 5-ին, ժամը 12:00-ին:

Հետախուզական աշխատանքների արդյունքում, եթե հաստատվեն նավթի և գազի արդյունաբերական ծավալները, ընկերությունն օրենքով սահմանված կարգով կդիմի «Շրջակա միջավայրի վրա ազդեցության փորձաքննական կենտրոն» ՊՈԱԿ` բնապահպանական փորձաքննության` արդյունահանում իրականացնելու նպատակով:

Բնապահպանության նախարար Արծվիկ Մինասյանը հետաքրքրվել է այս փուլում` երկրաբանական ուսումնասիրության գործընթացում, շրջակա միջավայրի վրա հնարավոր ազդեցության հավանականության մասին:

«Ագապե» ՍՊԸ-ի տնօրենը տեղեկացրել է, որ սեյսմահետախուզությամբ  ձայնային ալիքներ է ուղարկվում (օգտագործելով տատանում առաջացնող սարքեր, ինչպիսիք են սեյսմավիբրատորները) Երկրի ընդերք, որտեղ երկրակեղևում գտնվող տարբեր շերտերն անդրադարձում են այդ ալիքները: Անդրադարձած ալիքները նախապես որոշված ժամանակահատվածում գրանցվում են հատուկ սեյսմաընդունիչների /գեոֆոնների/ միջոցով` հնարավոր ածխաջրածինների պաշարները որոշելու նպատակով: Հետախուզման համար նախատեսված 4 սեյսմավիբրատորներից 16.5 մետր հեռավորության վրա ձայնային ալիքների ազդեցությունը կարելի է համեմատել մարդու  վազքի ազդեցության ուժի հետ, ինչն  աննշան ներգործություն կունենա շրջակա միջավայրի վրա: «ԱԳԱՊԵ» ընկերությունն այս փուլում կարող է իրականացնել հեռանկարային տարածքների միայն մակերևութային երկրաքիմիական քարտեզագրման ուսումնասիրություններ:

Նկատելով, որ յուրաքանչյուր պետության համար կարևոր է սեփական նավթի և գազի պաշարների առկայությունը` Արծվիկ Մինասյանը` որպես բնապահպանության ոլորտում լիազոր գերատեսչության ղեկավար, առաջնային է համարել ցանկացած նախաձեռնություն իրականացնելիս բնապահպանական նորմերին անվերապահ հետևելը և շեշտել շրջակա միջավայրի վրա ազդեցության մասնագիտական գնահատման անհրաժեշտությունը:

Հավելենք, որ «Ագապե՚ ընկերությունը  պաշտոնապես գրանցված է Կանադայում (Մոնրեալ): Ավելի վաղ մեկ այլ կանադական ընկերություն` Vangold Resources Limited-ը, ձեռք էր բերել Blackstairs Energy ընկերությունը, որը 2007 թվականից անհաջղո զբաղվել է ածխաջրածնային պաշարների որոնմամբ Սյունիքի, Վայոց ձորի և Գեղարքունիքի մարզերում: Կանադացի ձեռներեցները Հայաստանի կառավարության քննարկմանն են ներկայացրել խոշոր ներդրումային նախագիծ, սակայն մինչ օրս դեռ նավթի ու գազի հոտ անգամ չի զգացվում: