Վարչապետի մոտ քննարկվել են Եվրամիության հետ առևտրում Հայաստանի միջազգային պարտավորություններին առնչվող հարցեր

Արմինֆո. Վարչապետ Կարեն Կարապետյանի մոտ այսօր տեղի ունեցած աշխատանքային խորհրդակցության ընթացքում քննարկվել են Եվրոպական միության «Արտոնությունների ընդհանրացված և համալրված համակարգ»-ից (GSP+) օգտվելու նպատակով Հայաստանի ստանձնած միջազգային պարտավորությունների կատարման ընթացքին առնչվող հարցեր: 

Ինչպես ԱրմԻնֆո-ին հաղորդեցին կառավարության տեղեկատվության և հասարակայնության հետ կապերի վարչությունից, կառավարության ղեկավարին զեկուցվել է ըստ ոլորտների կատարված աշխատանքների, միջանկյալ արդյունքների և հետագա քայլերի մասին: Վարչապետ Կարապետյանը մի շարք հանձնարարականներ է տվել պատասխանատուներին՝ համակարգված կերպով աշխատանքները շարունակելու և սահմանված ժամկետներում դրանք ավարտին հասցնելու վերաբերյալ:

Նշենք,  2009 թվականի հունվարի 1-ից Հայաստանը ներառված է Եվրամիությունից GSP+ ռեժիմ ստացած երկրների ցուցակում: 2006-2008 թթ. Հայաստանն օգտվել է ԵՄ ընդհանուր արտոնությունների համընդհանուր համակարգից, որն արտոնյալ մուտք է տրամադրել ԵՄ շուկաներ` 3300 ապրանքների զրոյական մաքսատուրքի տեսքով, և նվազեցրել է այլ 3900 անվանման ապրանքների սակագները:

2008 թվականի դեկտեմբերի 9-ին Եվրահանձնաժողովը ըդնունել է բանաձև, որի համաձայն, Հայաստանին շնորհվել է հատուկ խթան (GSP+1) կայուն զարգացման և արդյունավետության համար GSP կարգավորման  2009-2011թթ. նախագծի շրջանակում, որը երկարաձգվել է և գործում է առ այսօր: Դա Հայաստանին թույլ է տալիս  ԵՄ արտահանել 7200 անվանման ապրանքներ` առանց որևէ մաքսատուրքի: Այդ ընդլայնված առավելությունները GSP կարգավորման ժամկետում պահպանելու համար   Հայաստանը պետք է իրականացնի կայուն զարգացման և պատշաճ կառավարման բնագավառի 27 հիմնական միջազգային կոնվենցիաների դրույթները: