Ուրբաթ, 29 Սեպտեմբերի 2017 17:36

Արմինֆո. Եգիպտոսի «Մարկիրլ՚ դեղագործական ընկերությունը մտադիր է արտադրություն կազմակերպել Հայաստանում: Ընկերության ներկայացուցիչները մտադիր են հոկտեմբերի 3-ին այցելել Հայաստան և որոշել ձեռնարկության գտնվելու վայրը: Այդ մասին հաղորդել է տարածքային կառավարման և զարգացման նախարար Դավիթ Լոքյանը սեպտեմբերի 29-ին Հայաստանի և Եգիպտոսի միջկառավարական հանձնաժողովի 5-րդ նիստում` պատասխանելով ԱրմԻնֆո-ի հարցին Նիստը նվիրված էր տնտեսական, գիտական և տեխնիկական համագործակցության հարցերին: Ընդ որում, նախարարը ձեռնպահ է մնացել  արտադրության գործարկման ժամկետը, ինչպես նաև ծրագրի արժեքը նշելուց:

Լոքյանի ասելով, Հայաստանն ու Եգիպտոսը կարող են համատեղ ջանքերով  ապահովել եվրասիական շուկայի պահանջմունքը:  «Մարկիրլ՚ ընկերությունը, որը, նրա ասելով, նոր չէ տեղի շուկայում, երկու տարուց ավելի զբաղվում է իր արտադրանքի իրացմամբ, մտադիր է ավելի քան 26 անվանման դեղորայք արտադրել Հայաստանում: Ավելի առարկայական տեղեկատվության համար պաշտոնյան խորհուրդ է տվել դիմել երկու երկրների դեսպաններին:

Այսօրվա դրությամբ, նախարարի ասելով, ով նաև հայ-եգիպտական միջկառավարական հանձնաժողովի համանախագահն է, չնայած այն հանգամանքին, որ հանձնաժողովն ստեղծվել է 1996 թվականին, հերթական նիստը տեղի է ունենում 12 տարի ընդմիջումից հետո, քանի որ վերջին 4-րդ նիստը կայացել է 2005 թվականին, և երկար տարիներ, աշխարհաքաղաքական զարգացումների և Եգիպտոսում անբարենպաստ քաղաքական պայմանների բերումով, հանձնաժողովի աշխատանքները կասեցվել էին: Դիվանագիտական հարաբերությունների հաստատման 25-րդ տարում Երևանն ու Կահիրեն չեն կարող պարծենալ ապրանքաշրջանառության մեծ ծավալներով. 10-12 տարվա ընթացքում երկրների միջև ապրանքաշրջանառության ծավալները չեն գերազանցում 1-3 մլն դոլարը: Սակայն, Դավիթ Լոքյանը լի է լավատեսությամբ, քանի որ, նրա ասելով, երկրներն ունեն միանման մեկնարկային դիրքեր: «Թե Հայաստանում, թե Եգիպտոսում բնակչության մեկ շնչին բաժին ընկնող ՀՆԱ 3500-3700 դոլարի սահմաններում է: Եվ այստեղ,  և այնտեղ կա ներդրումներ ներգրավելու և արտաքին առևտրի բարձր մակարդակ ապահովելու լուրջ խնդիր՚, - հայտարարել է նա: Իսկ արձանագրված բացասական դինամիկան, ինչպես կարծում է Լոքյանը, պայմանավորված է համակարգման կենտրոնի և համագործակցության հիմքի բացակայությամբ, որոնք կարող էին հանգեցնել ապրանքաշրջանառության ավելացման: «Միջկառավարական հանձնաժողովի աշխատանքի վերսկսումը հիմնական ազդակը կլինի նոր մեկնարկի համար՚, -  հայտարարել է նախարարը: Նա նաև պատասխանատվությամբ հավաստիացրել է, որ կողմերը հետևողական կլինեն համագործակցության ամրապնդման և նախանշված ծրագրերը կյանքի կոչելու  գործում:

Նախարար Լոքյանի կարծիքով, զբոսաշրջության ոլորտը կարող է նպաստել երկկողմ առևտրի ընդլայնմանը: Եգիպտոսը կարող է լուրջ հարթակ դառնալ Հայաստանի համար` արաբական աշխարհի բոլոր երկրներում և աֆրիկյան մայրցամաքում սպառման շուկաների ապահովման առումով: Իսկ Հայաստանը կարող է ԵԱՏՄ և ԵՄ շուկաներ ելքի համար լավագույն հարթակը դառնալ Եգիպտոսի զարգացող տնտեսության համար: Գյուղատնտեսության, կրթության, ՏՏ ոլորտները նույնպես կարող են հետաքրքիր լինել երկու երկրների բիզնեսի համար:

Եգիպտոսում Հայաստանի դեսպան Արմեն Մելքոնյանը կարծում է, որ անցած 25 տարում երկրների միջև հարաբերությունները զարգացել են դինամիկ: Միևնույն ժամանակ, նրա ասելով, քաղաքական, մշակութային, կրթական զարգացած համագործակցության ֆոնին առևտրատնտեսական հարաբերություններն անմխիթար վիճակում են` օբյեկտիվ պատճառների բերումով: Նա նշել է, որ ժամանակին նախատեսվում էր Հայաստանի դեղագործության, ՏՏ, շինարարության ոլորտում եգիպտական խոշոր նախագծերի իրագործում: «Դժբախտաբար, Մերձավոր արևելքում աշխարհաքաղաքական փոփոխությունների արդյունքում նախագծերը կասեցվեցին՚, - հայտարարել է դիվանագետը: Իսկ այսօր կան բոլոր պայմանները հարաբերությունները «մաքուր էջից՚ սկսելու համար. վերացվել են այդ ճանապարհին առկա բազմաթիվ արգելքներ, Եգիպտոսում քաղաքական իրավիճակը կայունացել է, օդային հաղորդակցություն է հաստատվել Երևանի և Եգիպտոսի Շարմ Էլ Շեյխ և Հուրգադա առողջարանային քաղաքների միջև: Տեքստիլի ոլորտում համագործակցությունը հետաքրքիր է երկու երկրների բիզնեսի համար, կան համատեղ արտադրություն կազմակերպելու ծրագրեր, վերջերս ՏՏ ոլորտի հայ-եգիպտական համաժողովի արդյունքում բացահայտվել են նաև այդ ուղղությամբ համագործակցության եզրեր, նշել է դեսպանը:

Եգիպտոսի ներդրումների և զարգացման նախարար Սահար Նասրի ասելով, կողմերը նախանշել են «ճանապարհային քարտեզը՚` հարաբերությունների հետագա ընդլայնման համար: Ինչպես կարծում է նախարարը, երկու երկրների արտաքին առևտրի շրջանառության ներուժը չի համապատասխանում արձանագրված ցուցանիշներն: Եգիպտոսում առկա քաղաքական և  տնտեսական կայությունունը, ինչպես նաև Հայաստանում անցկացվող բարեփոխումները, ինչպես նշել է Նասրը, կօգնեն տնտեսության տարբեր ոլորտներում կապերի իրական խորացմանը: Նշենք, որ միջկառավարական հանձնաժողովի 5-րդ նիստի արդյունքում Հայաստանն ու Եգիպտոսը ստորագրել են մի շարք հուշագրեր և համաձայնագրեր առևտրի և ներդրումների, երիտասարդության և սպորտի, կրթության և գիտության, ինչպես նաև արխիվային գործի ոլորտներում: