Երեթշաբթի, 3 Հոկտեմբերի 2017 16:56

Արմինֆո. Հայաստանի խաղողագործության և գինեգործության հիմնադրամի հրավերով Զարգացող երկրներից  ներմուծման խթանման կենտրոնի (CBI) աջակցությամբ քառօրյա այցով Հայաստան էին ժամանել գինու խոշոր գնորդներ աշխարհի 6 երկրներից:

 

Ինչպես ԱրմԻնֆո-ին հաղորդեցին Գյուղնախարարության մամուլի ծառայությունից, Լեհաստանը, Լիտվան, Բելգիան, Մեծ Բրիտանիան, Հոլանդիան և Բալթյան երկրները ներկայացնող գինու վաճառքի մասնագետները հիմնադրամի մասնագիտական խմբի ուղեկցությամբ Վայոց ձորի և Արագածոտնի մարզերում ծանոթացել են տեղական գինու արտադրության ժամանակակից տեխնոլոգիաներին և առանձնահատկություններին, հայկական գինիների տեսականուն, հայկական գինեգործության հազարամյա ավանդույթներին:

 

Գնորդները «Տրինիտի», «Գետնատուն»,  «Վան Արդի», «Արմենիա Վայն», «Գոլդեն Գրեյփ ԱրմԱս», «Պռոշյանի», «Ոսկեվազի» գինու գործարաններում ծանոթացել են արտադրական գործընթացին, գործարանների առանձնահատկություններին և արտադրական ծավալներին: Գործնական քննարկումներ են անցկացվել գործարանների սեփականատերերի և գինեգործների հետ՝ արտահանման թիրախային շուկաներում հայկական գինիների ծավալներն ընդլայնելու ուղղությամբ:

 

Հյուրերին հատկապես ոգևորել է Արենի քարանձավ կատարած այցելությունը, որտեղ վերջիններս ծանոթացել են հայ գինեգործական ավանդույթների ավելի քան 6200-ամյա պատմությանը։ Հնագույն գինեգործական համալիրը տպավորել է օտարերկրյա մասնագետներին: «Հայաստանն անչափ գրավիչ երկիր է, ես պարզապես ապշած եմ քարանձավը տեսնելուց հետո: Ձեր երկիրը հզոր գինեգործական պատմություն և արտահանման մեծ ներուժ ունի»,-նշել է Յուլիա Մաքսիմովսկայան, ով ժամանել է Մեծ Բրիտանիայից։

 

Այցի շրջանակներում գնորդները մասնակցել են Արցախում կայացած գինու փառատոնին, ծանոթացել տեղական գինիների տեսականուն, այցելել են «Կատարո» գինու բրենդը ներկայացնող «Անուշ-1»  և «Բերդաշեն» գինու բրենդը ներկայացնող Ստեփանակերտի կոնյակի և գինու գործարաններ: 

 

Այցի ավարտին հիմնադրամի կողմից կազմակերպած  B2B հանդիպման շրջանակներում հայկական գինի արտադրող 16 ընկերությունների ներկայացուցիչներ հանդիպում են ունեցել գնորդների հետ, անցկացվել է գինիների համտես, քննարկվել են հետագա համագործակցության, պայմանագրեր կնքելու և արտահանման հեռանկարները:

 

Գնորդները բարձր են գնահատել տեղական խաղողի, ինչպես նաև մրգային հումքով պատրաստված գինիները՝ նշելով, որ դրանք լիովին համապատասխանում են միջազգային շուկայի պահանջներին:

 

ՀՀ ազգային վիճակագրական ծառայության տվյալների համաձայն, 2017 թվականի հունվար-օգոստոս ամիսներին Հայաստանում արտադրված կոնյակի ծավալը նախորդ տարվա նույն ժամանակահատվածի համեմատ ավելացել է 60,7%` կազմելով 18,4 մլն լիտր: Հաշվետու ժամանակահատվածում գինու արտադրության ծավալն ավելացել է 35,2%` կազմելով 5,1 մլն լիտր, իսկ օղու արտադրության ծավալը նվազել է 31,9% և կազմել է 3,5 մլն լիտր: Հաշվետու ժամանակահատվածում արտադրվել է 305 հազար լիտր շամպայն` նախորդ տարվա նույն ժամանակահատվածի 253,9 հազար լիտրի դիմաց, իսկ գարեջուր` 15,7 մլն լիտր (9,6% աճ): Ընդ որում, վիսկիի արտադրությունը կազմել է 849,7 հազար լիտր (17% անկում): Ոչ ալկոհոլային ըմպելիքների արտադրության ծավալը կազմել է 60,7 մլն լիտր, ինչը 31,4% ավելի է 2016 թվականի նույն ժամանակահատվածի համեմատ: ՀՀ մաքսային ծառայության հաշվետվության համաձայն, 2016 թվականին Հայաստանն արտահանել է 1.8 մլն լիտր գինի` 27,7% տարեկան աճ, մաքսային արժեքի 43,6% մինչև 5.9 մլն դոլար աճի պայմաններում: Առաջին կիսամյակում գինու արտահանումն ավելացել է 61% մինչև 1271.9 հազար լիտր` մաքսային արժեքի 84,3% մինչև  4.7 մլն դոլար աճի պայմաններում: