Ուրբաթ, 6 Հոկտեմբերի 2017 18:01

Արմինֆո. Հոկտեմբերի 4-ին հայկական կողմը L-41 ինքնաթիռի ձեռքբերման շուրջ պայմանագիր է ստորագրել չեխական ավիաընկերություններից մեկի հետ, որը թռիչքներ կիրականացնի Կապանի օդանավակայանից վերջինիս շահագործումից հետո: Այդ մասին լրագրողների հետ զրույցում հայտնել է Սյունիքի մարզպետ Վահե Հակոբյանը:

Ինքնաթիռի արժեքը 5.5 մլն եվրո է, և այն 19 տեղանի է: «Թռիչքները կիրականացվեն երկու օրը մեկ: Մարտինը ինքնաթիռը կլինի Հայաստանում»,- հայտնել է Հակոբյանը:

Մարզպետը նշել է, որ ինքնաթիռի ձեռքբերման ծախսերի մի մասը ստանձնել է Զանգեզուրի պղնձամոլիբդենային կոմբինատը: «1,5 մլն-ն տրամադրել է կոմբինատը, գումարի մնացած մասը կփոխանցվի լիզինգի եղանակով»,- նշել է Հակոբյանը:

Միաժամանակ Հակոբյանն ընդգծել է, որ տոմսերի վերջնական արժեքը դեռ որոշված չէ, սակայն, նախնական հաշվարկներով, դրանք կարժենան 30-40 հազար դրամ: «Կլինեն սուբսիդավորված տոմսեր ուսանողների, առողջական խնդիրներ ունեցողների համար, որպեսզի նրանք կարողանան շտապ Երևան մեկնել»,- ընդգծել է Սյունիքի մարզպետը:

Նա նշել է, որ 2017 թ. առաջին կեսի վերջում սկսվել են Սյունիքի օդանավակայանում վերանորոգման աշխատանքները, վերանորոգումն արժեցել է $ 2 մլն: «Մենք պետք է հեշտացնենք մարզ այցելությունների հնարավորությունը, այդպիսով՝ մենք կակտիվացնենք կյանքը Սյունիքում: Մենք մեծ հույսեր ենք կապում դրա հետ»,- ասել է Վահե Հակոբյանը:

Միաժամանակ նա նշել է, որ Կապանում կբացվի իտալական պիցայի արտադրության գործարան: Իտալական պիցայի կիսաֆաբրիկատը կպատրաստվի տեղական արտադրության մթերքներից, և նախապատվությունը կտրվի Սյունիքի արտադրողերին: «Գործարանի շահագործման արդյունքում 50 աշխատատեղ կստեղծվի Կապանի բնակիչների համար»,- ընդգծել է Սյունիքի մարզպետը: Կապանում կբացվի նաև Multi Brand Outlet»: Դա, նրա խոսքով, կնպաստի իրանցի զբոսաշրջիկների հոսքի ներգրավմանը: