«Թեղուտ» ՓԲԸ-ն հերքում է դանիական EKF ընկերոթյան ֆինանսավորման դադարեցման մասին ԶԼՄ-ների տեղեկատվությունը

Արմինֆո.Այսօր «Թեղուտ» ՓԲԸ-ն հերքել է «Թեղուտ» ՓԲԸ-ի դանիական EKF ընկերության (Denmark's Export Credit Agency) հարաբերութոյւնների հետ կապված որոշ հայկական լրատվամիջոցների նախկինում հրապարակված տեղեկատվությունը: Մասնավորապես, խոսքը գնում է Լոռու մարզի Թեղուտի պղնձամոլիբդենային հանքավայրի շահագործման ծրագրի իրականացման նպատակով դանիական ընկերության կողմից տրամադրված վարկերի մասին: Այս մասին ԱրմԻՆֆո գործակալությանը տեղեկացվել է «Վալլեքս» խմբի ընկերությունների տեղեկատվության և հասարակայնության հետ կապերի բաժինից:

Աղբյուրը նշում է, որ Ընկերության կողմից ՀՀ Լոռու մարզի Թեղուտի պղինձ-մոլիբդենային հանքավայրի շահագործման ծրագիրն իրականացվել է «Վալլեքս» խմբի ընկերությունների սեփական և ՎՏԲ խմբից ներգրավված վարկային միջոցների հաշվին։ Ընկերության և EKF կազմակերպության միջև որևէ վարկային պայմանագիր երբևէ չի կնքվել, Ընկերությունը EKF կազմակերպությունից վարկային միջոցներ չի ստացել, ուստի չի կարող մեկնաբանել EKF կազմակերպության կողմից հրապարակված՝ «ֆինանսավորումը հայկական հանքարդյունաբերական նախագծից» դուրս բերելու վերաբերյալ տեղեկատվությունը։ Ավելին, EKF կազմակերպության հետ ունեցած հարաբերությունների շրջանակներում Ընկերությունը չի ստացել նաև դրանք խզելու վերաբերյալ որևէ պաշտոնական ծանուցում։ 

Թեղուտի պղինձ-մոլիբդենային հանքավայրում օգտակար հանածոյի հանքաքարի արդյունահանման և հարստացման գործընթացի կազմակերպան շրջանակներում Ընկերությունը մշտապես միջոցներ է ձեռնարկել սեփական անձնակազմի գիտելիքների ու գործընթացների շարունակական կատարելագործման, ինչպես նաև միջազգայնորեն ճանաչված փորձի ու ստանդարտների, ներառյալ՝ արտադրական անվտանգության և աշխատանքի պաշտպանության և բնապահպանական կառավարման համակարգերի ներդրման ուղղությամբ, համագործակցելով մի շարք միջազգայնորեն ճանաչված կազմակերպությունների, այդ թվում՝ EKF կազմակերպության հետ։ 

Շուրջ 6 տարի ընթացած շարունակական աշխատանքների արդյունքում Ընկերության գործունեությունը ճանաչվել է ISO 14001:2004 (Բնապահպանական կառավարման համակարգեր) և BS OHSAS 18001:2007 (Արտադրական անվտանգության և աշխատանքի պաշտպանության կառավարման համակարգեր) ստանդարտներին համապատասխանող, որի վերաբերյալ՝ 2017 թվականի սեպտեմբերին Ընկերությանը տրվել են համապատասխան հավաստագրեր։

Նշենք, որ այս տարվա հոկտեմբերի 18-ին մի շարք լրատվամիջոցներ իրենց աղբյուրներում տարածեցին տեղեկատվություն, որը վերաբերվում էր «Թեղուտ» ՓԲԸ-ի և Դանիական EKF ընկերության (Denmark's Export Credit Agency) հետ կապված հարաբերություններին, այս տարվա հոկտեմբերի 16-ին EKF պաշտոնական կայքում հրապարակված հաղորդագրության հիման վրա: Այդ կապակցությամբ ընկերությունն անհրաժեշտ համարեց հանրության առջև հանդես գալ հերքող հայտարարությամբ:-