Արմինֆո. ՀՀ Արարատի մարզում հուլիսի 29-ին տեղի ունեցած խորհրդակցության ընթացքում ներկայացված հանձնարարականների կատարման ընթացքը նախօրեին վարչապետ Կարեն Կարապետյանին է ներկայացրել Արարատի մարզպետ Արամայիս Գրիգորյանը:
Անդրադառնալով գյուղատնտեսության ոլորտի ցուցանիշներին՝ Արամայիս Գրիգորյանը զեկուցել է, որ գյուղացիական տնտեսությունների և մշակովի հողատարածքների խոշորացման գործընթացի արդյունքում խոշոր հողակտորներ /5հա և ավելի/ ունեցող գյուղացիական տնտեսությունների թիվն այս պահի դրությամբ 313 է՝ 2016 թ. 280-ի փոխարեն: Ընթացքի մեջ են Վեդու ջրամբարից դեպի շահառու 8 համայնքներ գնացող ոռոգման համակարգերի կառուցման աշխատանքները, որում ընդգրկված է շուրջ 110 մարդ: ԱՄՆ Միջազգային զարգացման և ՄԱԿ-ի գրասենյակների հետ համատեղ աշխատանք է տարվում Հայանիստ համայնքում իրականացված 40 հա հողերի ձկնաբուծարանների հետադարձ ջրերով ոռոգման պիլոտային ծրագրի շարունակականությունն ապահովելու ուղղությամբ: Գյուղացիական տնտեսություններին ներկայացվել են գյուղտեխնիկայի ձեռքբերման նպատակով պետության կողմից իրականացվող նպատակային սուբսիդավորման ծրագրերը. Արդյունքում, 2017 թ. հոկտեմբերի դրությամբ, մարզի Այնթափ, Վանաշեն, Ուրցաձոր, Սուրենավան, Հովտաշատ, Ազատավան համայնքների կողմից ձեռք է բերվել 10 միավոր գյուղատնտեսական տեխնիկա: Գյուղատնտեսության զարգացումը խթանելու նպատակով մասնավոր ընկերությունների կողմից մարզի մի շարք համայնքներում իրականացվում են շուրջ 5000 քմ նոր ջերմոցային տնտեսությունների (լոլիկի և վարունգի արտադրություն) և 3500 քմ ինտենսիվ այգիների կառուցման աշխատանքներ:
Խոսելով ներդրումային ծրագրերի մասին՝ Արարատի մարզպետը նշել է, որ ներդրումների ընդհանուր ծավալը մարզում կազմում է 72 միլիարդ դրամ՝ և պետական ծրագրերով, և դոնոր կազմակերպությունների, և մասնավոր հատվածի կողմից: Մինչև տարեվերջ ներդրումները լիարժեք տեսանելի կլինեն, և արդյունքում աշխատատեղերի թիվը կավելանա 600-700-ով: Արամայիս Գրիգորյանի խոսքով՝ նախորդ տարվա համեմատ ներդրումների աճ է արձանագրվել՝ մոտավորապես 60 մլրդ դրամի չափով: Ամենախոշորը Վեդու ջրամբարի և ոռոգման համակարգի կառուցման ներդրումային ծրագիրն է, որի իրականացման արդյունքում ինքնահոս համակարգով լիարժեք կոռոգվի 4 հա տարածք, և գյուղացիական տնտեսությունները խնդիր չեն ունենա: Ոռոգման ջրի պահանջարկը բավարարելու և գյուղատնտեսական արտադրանքի ինքնարժեքը նվազեցնելու նպատակով կառուցվում է նաև Քաղցրաշենի ինքնահոս ոռոգման համակարգը, որը 12 համայնքի ոռոգման ջրի մեխանիկական համակարգը կփոխարինի ինքնահոսով՝ խնայելով 436 մլն դրամի էլեկտրաէներգիա և 24 մլն դրամ պոմպակայանի շահագործման ծախսեր՝ ոռոգելով 1300 հա հողատարածք՝ նախկին 854 հա փոխարեն:
Ըստ վարչապետի հանձնարարականի՝ մարզպետի կողմից հստակ աշխատանքներ են կատարվել մարզի համայնքների սեփական եկամուտների հավաքագրման ուղղությամբ. Արարատի մարզը պետական բյուջեի մեջ սեփական եկամուտները 20 տոկոսով ավելացնելու պարտավորություն է վերցրել, բայց 2017 թ. առաջին 10 ամսվա արդյունքներով աճը կազմել է 23.5 տոկոս: Արամայիս Գրիգորյանը նշել է, որ հաշվի առնելով այս տեմպը՝ մինչև տարեվերջ մարզը կկարողանա գերակատարել սեփական եկամուտների կատարողականը:
Անդրադառնալով աղբահանության ոլորտին՝ Արամայիս Գրիգորյանը նշել է, որ մարզի համայնքներում առկա 260-ից աղբավայրերից մնացել է 19 խոշոր աղբավայր, հաշվառված 3500 իրավաբանական անձանցից պայմանագիր է կնքվել 2000-ի հետ, և աշխատանքները շարունակական ընթացք են կրում: Վարչապետը, նշելով դրական առաջընթացը, այդուհանդերձ, արդյունքները բավարար չի համարել, և որոշվել է կարճ ժամանակ անց կրկին անդրադառնալ այդ հարցին:
Մարզպետը նշել է, որ Արարատի մարզու զբոսաշրջությունը խթանելու նպատակով ՀՀ զբոսաշրջության պետական կոմիտեի կողմից իրականացվելու է Խոր Վիրապի վանքի հարևանությամբ դիտահարթակի և այցելուների զբոսաշրջային տեղեկատվական կենտրոնի կառուցման ներդրումային ծրագիրը: 2017 թ. տարեկան աշխատանքային ծրագրով իրականացվում են նաև մարքեթինգի և զբոսաշրջային հնարավորությունների ներկայացմանն ուղղված միջոցառումներ:
Հուլիսի 29-ին խորհրդակցության ժամանակ վարչապետն ընդգծել որ, որ Արարատի մարզում առկա են թերհավաքագրումներ և անհամաչափություններ ինչպես համայնքների միջև, այնպես էլ այլ մարզերի համեմատ: «Ուսումնասիրությունները ցույց են տալիս, որ Արարատի մարզի սեփական եկամուտների համար նախատեսված 2,1 մլրդ դրամն իրականում պետք է լինի 3,8-3,9 մլրդ դրամ: Դուք ունեք մեծ հնարավորություններ և 10-15 տոկոս աճը չի կարող բավարար լինել: Դուք ունեք նաև չափազանց մեծ դիսբալանսային ցուցանիշներ: Շատ արագ այդ ամենը պետք է կարգավորեք»,-ընդգծել էր Կարեն Կարապետյանը:
Մինչեւ 2030 թվականը Հայաստանում արեւի էներգիայի համար կարող է ներդրվել մինչեւ 650 մլն դոլար 
Առանց Ջուլֆայի սահմանակետի տարածաշրջանի ապաշրջափակման մասին բոլոր խոսակցություններն արժեք չունեն. փորձագետ
Էկոնոմիկայի նախարարը Կանադայի դեսպանի հետ քննարկել է ֆինանսատնտեսական ոլորտում համագործակցության ակտիվացման հնարավորությունները
Ֆինանսների նախարարությունը 2020 թվականի համար կանխատեսում Է բյուջեի դեֆիցիտ՝ ՀՆԱ-ի 7,4 տոկոսի չափով